Бәйтерек ауылындағы Әл-Фараби атындағы орта мектептің оқушылары спорт саласындағы зор жетістіктерімен қуантты.

Жуырда Алматы қаласында өткен футболдан халықаралық турнирде мектеп оқушылары топ жарып, І орынды иеленді. Аталған жарыста жас спортшылар жоғары дайындық деңгейін, ұйымшылдық пен жеңіске деген жігерін айқын көрсетті. Олар әрбір кездесуде табандылық танытып, мектеп пен аудан намысын абыроймен қорғады. Жас спортшылар турнир барысында өздерінің шеберлігін, ұйымшылдығын және жеңіске деген жігерін дәлелдей білді. Мектеп намысын абыроймен қорғаған жас чемпиондарымыз: 3 сынып оқушылары Нәби Айтбай, Ернар Ермекұлы, Темірлан Галибек, Әмір Өмірбай, Мансұр Тұрлыбай, Жанали Солтан және Нұрислам Ахымет.

Мектеп әкімшілігі мен сыныптастары жеңімпаздарды ерекше ықыласпен құттықтап, күтіп алды. Жеңімпаздарды мектеп директоры Гүлнар Жанадилова арнайы құттықтап: «Бұл жеңіс – оқушыларымыздың табандылығы мен ата-ана, мектеп ынтымақтастығының нәтижесі. Жас спортшыларымызға алдағы жарыстарда сәттілік тілеймін», – деп ізгі тілегін білдірді.

Салтанатты шара барысында сынып жетекшісі мен ата-аналар атынан оқушыларға естелік сыйлықтар табыс етілді. Бұл жетістік жас ұрпақты спортқа баулудың, саламатты өмір салтын қалыптастырудың нақты көрінісі. Жас спортшыларымызға алдағы  жарыстарда да толағай табыс, жаңа жеңістер тілейміз!

Әсел МЫРЗАБАЕВА,

Әл-Фараби атындағы

 орта мектептің 3 «А» сынып жетекшісі.