Қолөнер – сырлы өнер. Онда сан ұрпақтың тыныс-тіршілігі мен қолының табы бар. Байқап қарайтын болсақ, әрбір қолөнер туындысы өз заманының материалдық мәдениетінің үлгісі және халық талғамының, әлеуметтік-қоғамдық жағдайының, діни сенімінің, салт-дәстүрдің нақтылы көрінісі дерсің. Атадан мұра болған сол өнердің көрнекті өкілі Дәулет Шоқпаровпен кездесу болды жақында аудандық кітапхананың оқу залында. «Ата өнері – балаға мұра» тақырыбымен өткен шараға мектеп оқушылары қатысып, кішігірім көрмемен танысып, көкейлеріндегі сұрақтарды қойды.
Сонымен қатар, аудандық «Еңбекшіқазақ» газетінің бас редакторы Х.Ахметжанов, «Есік» мемлекеттік тарихи-мәдени қорық-музейінің ғалым-хатшысы Досым Зікірия, аудандық мәдениет және тілдерді дамыту бөлімінің, аудан әкімі аппаратының рухани жаңғыру жұмысы бойынша мамандары келелі кез-десудің куәсі болды. Темірден түйін түйген қолөнер шебері Дәркембай Шоқпарұлы жайлы естеліктерімен бөліскен Х.Ахметжанов қазіргі қолөнерге қатысты пікірін де ортаға салды. Кезекті сөз алған кештің құрметті қонағы Дәулет Дәркембайұлы халықаралық мұражайлар күніне орай ұйымдастырылған шара үшін кітапхана қызметкерлеріне алғыс білдіріп, әкесінің өмірбаянына тоқталды. Дәркембай ұстаның бір ғана торсықты біршама уақыт зерттеп, дүние жүзіне паш еткенін жеткізіп, әкесінің әкесі де өз уақытында танымал ұста болғанын тілге тиек етті. Ақши ауылындағы ұста Д.Шоқпарұлы атындағы қолөнер музейінен арнайы көрме үшін әкелген қолөнер бұйымдарын балаларға таныстырып, олардың жасалу ретін түсіндірді Д.Шоқпаров сөз барысында. Сондай-ақ, осы өнерге қызығушылығы бар өрендерге әрдайым есігі ашық екенін, халықтың қазынасы саналатын өнер арқылы елін, жерін, салт-дәстүрін сүюді бойға сіңіретіндерін жеткізді жеткіншектерге. Келген қонақтардың бәрі ойларын ортаға салып, оқушылар әннен шашу шашты. Шара соңында барша қатысқандарға кітаптар сыйға тарту етілді.
Алмагүл НҰҒМАН
Кезінде Мұстафа Ататүрік айтқан екен: «Біз бәріміз парламент депутаты бола аламыз, министр бола аламыз, тіпті республика президенті де бола аламыз. Бірақ ешқайсымыз өнер адамы бола алмаймыз» деп. Әлбетте, Жаратқаннан берілген риясыз құдірет тек өнер иесіне тән. Сондықтан талант тарландарын алақанға сап аялау – ел еркелеріне жасалған зор қошемет болмақ. Осы орайда жуырда мәдениет және өнер қызметкерлері күніне орай облыс әкімі Амандық Баталов өнер саласы майталмандарының еңбектерін еледі. Ел алдында құрмет-қошеметке бөледі. Арасында біздің де мақтаныштарымыз бар.
Ашылғанына он жылға жуықтаған Ұста Дәркембай атындағы қолөнер мұражайы бүгінде қазақ руханиятының қолтаңбасына айналып келеді. Бабалар өнерін балаға мұра еткен, бар ғұмырын қолөнерге арнаған Дәркембай Шоқпарұлының өмірі мен туындыларын паш ету арқылы әлемге қазақ атын шығарып жүрген мекеме облыс бойынша «Үздік облыстық мәдениет мекемесі» номинациясын жеңіп алды. Облыс әкімі Амандық Баталов мекеме басшысы Дәулет Шоқпаровқа Лада автокөлігінің кілтін салтанатты жағдайда табыстады. Кейіннен мінберге көтеріліп, ойын білдірген Дәулет Дәркембайұлы:
– Мен атадан балаға мирас болған ұста Дәркембай атындағы мұражайда ашылған күннен істеп келемін. Бүгін сол еңбегіміз еленіп, марапатталудамын. Толқу үстінде тұрғанымды жасырмаймын. Елбасымыз өзінің «Ұлы даланың жеті қыры» мақаласында ұлттық сананы жаңғыртуды міндет етті. Осы орайда ұлттық мұрамызды зерделеу, насихаттау, оны ұрпаққа мұра ету жолында тынбай еңбек етіп келемін. Себебі, менің атам да, әкем де, өзім де, ендігі толқын балаларым да ұсталық, зергерлік өнерді меңгерді.
Құрметті, Амандық Ғаббасұлы, шебер де, өнер де қолдаусыз қанат жаймайды. Бүгін біз осынау риясыз қолдауды сезініп отырмыз. Осы орайда әріптестерімнің атынан сіздің қамқорлығыңыз үшін шынайы алғысымызды айтамын, – деді.
Сол секілді Есік археологиялық-өлкетану мұражайы «Үздік музей» номинациясын жеңіп алды. Марапатты облыс басшысы аталмыш мекеме директоры Нарима Тойжановаға табыстады. Ал Ават мәдениет үйінің қызметкері Долкунжан Розахунов «Үздік мәдениет қызметкері» деп танылды. Номинанттарға арнайы дипломмен қоса 100 мың теңге сертификаттар тапсырылды. Ал кітапханашы Галина Свининникова Қазақстан Республикасы Мәдениет және спорт министрінің Алғыс хатын алды.
Қазақ өнерінің абыройын асқақтатып, мәдени құндылықтарына қолтаңбасын қалдырып жүрген жеңімпаздарымызды жетістіктерімен құттықтаймыз!
«Еңбекшіқазақ».
Қазақстан ауылындағы Ж.Қайыпов атындағы орта мектепте асыл тұлға ұстаздардың ерен еңбегін, мол қадірін, тарихтағы баға жетпес орнын паш ету, олардың өмір жолымен жас ұрпақты ұстазды құрметтеуге, адамгершілікке, сыйлап түсіне білуге үйрету, ұстаз мамандығының қыры мен сырын ұғындыру және ұстаз еңбегін бағалай білуге тәрбиелеу мақсатында маңызы зор кездесу кеші өтті.
Ардагер ұстаздар ең алдымен мектепте орналасқан Кеңес одағының батыры Ж.Қайыповқа арналған мұражайды араласа, келесі кезекте өз пәндері бойынша жеткіншектерге ашық сабақтар өткізді, одан әрі кеш оқушылардың көңілді концерттік бағдарламасымен жалғасты. Ансамбль жетекшісі Азат Бақасов бастаған өнерлі оқушылар халық күйімен кеш шымылдығын түрді. Мектеп директоры Шарапат Орынбаева: «Бүгінгі күніме мен осы ұстаздарымның арқасында жеттім. Өзімді ұстаз алдында әрдайым шәкірт сезінемін. Осы мектепті 1981 жылы бітіріп шыққан едік. Енді өзім ұшқан ұямда білім берудемін. Бүгінгі бейнеттің зейнетін көріп отырған аяулы ұстаздар сіздерге зор денсаулық, ата мен әже болып аман сау жүре берулеріңізге тілестеспін», – деген шәкірттік алғысын жеткізсе, директордың тәрбие ісі жөніндегі орынбасары Тәліпжан Естемесов: «Құрметті ардагерлер, алғаш мектеп табалдырығын аттаған кезде Қаныша апайымыз қарсы алып еді. Ол кезде бала шәкірт болсақ, қазіргі күні әріптеспіз. Осы елу жылдан астам уақытта қызмет еткен ұстаздар аттарын атай кетейін. Олар мектебіміздің тұңғыш директоры Ахметжан Кегенбаев, Леонид Борецкий, Хайролла Ғизатов, Раиса Попова, Құсайын Тюпеев, Людмила Фомина және тағы басқа да көптеген адамдар қызмет еткен екен. Бұл есімдерді атаудағы мақсатымыз бүгінгі жастарға, жас мұғалімдер біле жүрсін деген ойымыз. Келешекте осы дәстүр жалғасын тауып үлкенге ізет, кішіге құрмет көрсетілсе нұр үстіне нұр болар еді. Осы кездесуге келгендеріңізге рақмет айтамыз, біз сіздермен мақтанамыз!», – деп ардагер ұстаздарға сыйлықтарын табыс етті. Сонымен бірге, келместің кемесіне мініп, арадан мәңгілікке аттанған аяулы ұстаздарды бір минут үнсіздікпен еске алды мектеп ұжымы. Ғалым да, шахтер да бас иген аяулы ұстаздар қандай қошемет, құрметке лайық. Бүгін білім – өркениетті елдердің құнды капиталына, сенімді тірегіне айналып жатқаны баршаға мәлім. Қазіргі жас маман – болашақ ұлттың ұстазы болары даусыз. Ертең олар да осы аға-апаларындай ұрпаққа саналы тәрбие мен мағыналы білім беретін ұстаз болары сөзсіз. Сонау 1965 жылдан бері осы мектепте қызмет еткен ұстаздар өздерінің жүрекжарды тілектерін жеткізіп, жастық шақтарын еске алып бір марқайып қалды. Мектепте қырық жылға жуық еңбек етіп құрметті зейнет демалысына шыққан ардагер ұстаз Раиса Соколова өз сөзінде: «Мұндай кеш бұл мектептің тарихында, тіпті ауданда болмаған. Сондықтан да барша ұстаздар мен ұйымдастырушыларға зор алғысымды жеткіземін. Бүгін өзіміз қызмет еткен білім ордасына келіп, сонау жылдардағы жүріп өткен жолдарымыз көзден кино ленталарындай сырғып өтіп жатыр. Біз қанша жасадық дегенмен, біздің де білмейтініміз бар. Қазіргі заманда жаңа жаңартылған бағдарлама бойынша оқып жатқан жеткіншектерге болашақта зор табыс тілеймін. Сендердің замандарың цифрлы заман. Көптеген мүмкіндіктерге жол ашылуда. Сондықтан да, тек шабыт, жас ұстаздарға толайым табыс тілеймін», – деді. Гүлзи Садырова мен Қаныша Молдахметова тағы басқа да ұстаздар қауымы өздерінің жүрекжарды лебіздерін жеткізді. Сырға толы мағыналы кештен алар үлгі, мағына жетерлік. «Мен өзімнің ұстазыма әкемнен кем қарыздар емеспін, әкемнен өмір алсам, ал Аристотельден өмірімді жақсы өткізу туралы білім алдым», – деп Александар Македонский айтпақшы, ұлағат иелерінің кездесуі пікір алмасумен жалғасты.
Нұргүл САБАҚАНОВА,
Қазақстан ауылы.
Елбасы Н.Назарбаев «Қазақстанның болашағы – бүгінгі жастар. Сіздер оларға қандай білім берсеңіздер, Қазақстан сол деңгейде болады» деп жалпы ұстаздар қауымына зор жауапкершілік жүктеген еді. Арқалаған аманатқа қиянат жасамау мақсатында Есік мектепаралық оқу-өндірістік комбинатының ұжымы аянбай жан-жақты қызмет етуде. Соның айқын көрінісі – «Қолөнер – еңбектің қайнар көзі» атты аудандық іс-тәжірибелік семинар.
«Қазақстан қайта даярлау біліктілікті арттыру» курсынан келген Махмут Жәлелов, аудандық білім бөлімінің әдіскері Қайрат Әукен кезегімен сөз алып, жиынның нәтижелі өтуін тіледі. Іс-тәжірибелік семинарға аудандағы мектептерден технология пәнінің мұғалімдері келіп, оқушыны шығармашылық жұмысқа тарту арқылы танымдық қабілеттерін арттыру жолындағы тәжірибелерімен бөлісті. Шәкірттердің шеберлігін, білімі мен еңбегін осы күні ұйымдастырылған көрмеден анық байқадық. Іскерлік, икемділік қабілеттерінің арқасында өз қолдарынан шыққан бұйымдарын көпшілік назарына ұсынған өнерлі өрендер ұстаздарының еңбегін ақтады. Шебер сыныптарда тігін бұйымдарымен киім тігу, терме бау тоқу, трикотажды жіптен дорба тоқу көрсетілсе, көркем жобалар осы семинарда көздің жауын алды.
Алмагүл НҰҒМАН.
Елдіктің ерен жеңісі, Тәуелсіздіктің жемісі болған Елордамыздың 20 жылдығы қарсаңында «Street dance battle» жастар арасында би байқауы өтті жақында. Аудан орталығындағы Жамбыл атындағы жастар саябағында жалауы желбіреген шараға 9 команда қатысты. Арасында Талғар ауданынан да үміткерлер бар.
Аудандық ішкі саясат бөлімінің қолдауымен, Есік қаласы әкімі аппараты, аудандық жастар ресурстық орталығы және «Елім-ай» қоғамдық қорының ұйытқы болуымен өткен шара шымылдығын қор төрағасы Жаңаберген Мұхамедов құттықтау сөзімен түрді:
– Астана – ұлтымызды ұлы істерге ұйыстырар саяси сахнамыз. Шындығында, Тәуелсіздігімізбен бірге халқымыз Мәңгілік Мұраттарына қол жеткізді. Біз еліміздің жүрегі, Тәуелсіздігіміздің тірегі – Мәңгілік Елордамызды тұрғыздық. Көрмені қойып, әлемнің назарын өзімізге бұрғыздық. Бүгінге бас қаламызда өтіп жатқан көрмеге құрлық көз тігіп, қызыға да қызғана қарап жатқаны ақиқат. Осындай ғасырға бергісіз Егемендігіміздің 26 жылдығындағы ерен еңбек ұрпақтың Мәңгілік Болашағын баянды етуге арналады, – деді.
Әр топ заманауи би байқауын барынша көрсеткісі келді сахнада. Алайда, хореографтар Ақбота Нұрақын мен Аида Ибрагимова және аудандық жастар ресурстық орталығының маманы, «Улыбка» би тобының түлегі Гаухар Абиырқызы кеткен кемшіліктерді ашып айтты.
Екі сағатқа созылған би жарысының қорытынды-сында орталық жетекшісі Айбек Ілебай және Жаңаберген Мұхамедов жеңімпаздарды салтанатты жағдайда марапаттады. Нәтижесінде есіктік «Көркем-ай» би тобы үшінші орынға табан тіреп, арнайы диплом мен музыкалық аппарат табыс етілді. Ал екінші орынға қаракемерлік «Гучи-лучший» би тобы, үздік бірінші орынға бәйдібекбилік «Әдемі-ай» тобы ие болды. Жеңімпаздар диплом мен түрлі-түсті теледидарға ие болды.
Байқау жастар би кешіне ұласты.
Қайнар ЖҰМАҒОЖА.
Еңбекшіқазақ ауданының Қаракемер ауылы өзіндік тарихы бар киелі мекен. Бүгінде Қаракемер ауылында Мәдениет үйінің ішінен ашылған «Қаракемер балалар театры» жұмыс істеуде. Ашылғанына азғана уақыт болса да көрнекті ойындарымен, мағыналы көріністерімен көрерменнің көзайымына айналып отыр.
Театрымыздың негізін қалаушы ақыл-кеңесімен де, балаларға шынайы ниетімен де, актерлік шеберліктің қыр-сырын үйретіп, балаларды өнер әлеміне қызықтыра жетелеген белгілі режиссер әрі актер Асқар Наймантаев ағамыз. Бүгінде театрымыз арнайы мамандармен толықтырылған.
Театр директоры өнер академиясының түлегі Жарқын Барақбаев болса, режиссері осы өнер ордасынан шыққан жас сценарист Әлішер Кубенкулов. Сондай-ақ, театрымыздың суретшісі Сымбат академиясының дизайнерлік бөлімін тәмамдаған Әйгерім Сүндетбаева. Жұмыла көтерген жүк жеңіл демекші, театрымыз 2017 жылдың желтоқсан айында тағы да бір жаңа туындымен толықты. Мейіржан Әлібектің «Алдар Көсенің сиқырлы дүрбісі» атты қызықты ертегі балалар әлеміне жол тартты.
Қоюшы режиссер Жарқын Барақбаев театр қызметкерлері мен мәдениет үйінің қызметкерлерін бірлестіре отырып, әдемі спектакльдің өмірге келуіне себепші болды. Спектакль заманауи үлгіде жаңашаландырылды. Өзіміздің санамызға сіңген Алдар Көсе, бай мен кедей кейіпкерлерімен қоса, Өрмекші адам мен Макуйннің образдары балаларды қызықтыра түсті десек артық айтқандық емес. Әр қойылым сайын балалардың кейіпкерлермен бірге өмір сүріп отырғанын байқауға болады. Актерлермен бірге күліп, әрекетке қосыла жандары ашып айқайлап, неше түрлі құбылысқа еніп отырған балаларды көргенде әртістердің шабытына шабыт қосылары хақ.
Бүгінде Елбасының Болашаққа бағдар: «Рухани жаңғыру» мақаласы аясында және де Астанамыздың жиырма жылдық мерей тойына орай, Каракемер балалар театры мен мәдениет үйінің қызметкерлері аудан мен ауылдарымызды аралап, жиырма мәдениет ошағымыздың сахнасында өз өнерлерін көрсетпекші. Ондағы мақсатымыз балаларға рухани шығармашылық көңіл-күй сыйлап, саф өнердің құндылығын дәріптеу. Тағы бір айта кетерлік жайт – театрымыз Қырбалтабай ауылы мен Бәйдібек би ауылының мәдениет үйінде өнер корсетіп халықтың сүйіспеншілігіне боленіп қайтты. Олай болса өнерпаздарымызға ақ жол тілейік!
Әсел Салық,
Қаракемер мәдениет үйінің қызметкері.
Қазақ халқының көнерген ұлттық аспаптарын таныстыру, насихаттау, балалар шығармашылығын дамыту мақсатында «Қазақ халқының көнерген аспаптары мен би өнері» атты байқау өтті жақында. Бәйдібек би мәдениет үйінде шымылдығы түрілген шараны «Елім-ай» қоғамдық қоры және аудандық мәдениет үйі ұйымдастырды. Аудандық ішкі саясат бөлімі қолдау білдірді.
Иә, Мемлекет басшысы Нұрсұлтан Назарбаев «Болашақ-қа бағдар: рухани жаңғыру» атты мақаласында: «...Егер жаңғыру елдің ұлттық-рухани тамырынан нәр алмаса, ол адасуға бастайды» деген еді. Ал рухани тамырымыз ол біздің ана тіліміз, мәуелі мәдениетіміз, ұлттық салт-дәстүріміз. Осыны темірқазық етіп, тарихи соқпақта сүрленіп қалған құндылықтарымызды қозғауға күш салған қордың бұл үшінші шарасы. Бастапқыда облыстық деңгейде айтыс ұйымдастырса, ауданымызда жыршылық өнерді дамыту мақсатына кеңейтілген дөңгелек үстел де өткізген-тін. Енді міне, ауданымызда алғаш рет көнерген ұлт аспаптарын насихаттау мақсатында «Үні кетпес құлақтан» атты ұранмен байқаудың бастамашысы боп отыр. Сонымен аудан бойынша көнерген аспаптарда ойнау номинациясына 10-ға жуық үміткер қатысты. Сазсырнай, тастұяқ, асатаяқ, домбыра, шертер аспаптарының дау-сын естіген көпшілік қошеметін де аяған жоқ. Шертер аспабында ойнаған қайназарлық Арайлым Макетаева Раздықтың күйі «Аңшының зары» арқылы талайды тәнті етті. Ал екі бірдей аспапта өнер көрсеткен Қарақат Әсет тайтұяқтың сүйемелдеуімен ән де орындап берді. Әрі ойнап жатқан аспаптарының тарихымен де таныстырды. Нәтижесінде, әділ-қазылар алқасының шешімімен кіші топ яғни 15 жасқа дейінгі бүлдіршіндер арасында бірінші орынды түргендік М.Ломоносов атындағы орта мектеп оқушысы Дана Алтынбек, екінші орынды Қарақат Әсет иеленсе, космостық Фуат пен Карина (І.Жансүгіров атындағы орта мектептің 2 сынып оқушылары) үштікті қорытты. Ал үлкен топта (15-25 жас аралығы) қаракемерлік «Кемер сазы» үшінші, Космос ауылы Т.Рысқұлов атындағы орта мектептің оқушылары Мирас пен Ілияс екінші, қайназарлық Арайлым Макетаева бірінші орынды жеңіп алды.
Ал би байқауына үлкен және кіші топтан 26 үміткер қатысты. Алайда, арнайы үйрететін мамандардың (хореограф) болмауынан көптеген кемшіліктер орын алды. Дегенмен Рахат округіне қарасты «Бахар», түргендік «Әдемі-ай» би топтары кәсіби шеберліктерін көрсете алды. Нәтижесінде жүзден жүйрік шыққан кіші топта Жаңашар оркугінің бүлдіршіндері үшінші, қайназарлық «Бахар» би тобы екінші, түргендік «Әдемі-ай» тобы бірінші орынды қанжығалады. Ал, сәйкесінше «Бахардың» үлкен тобы 15 жас-тан жоғары жасөспірімдер арасында біріншілікті иеленсе, «Қаражорға» биімен талайды тәнті еткен Нүрия Сәрсенәлі екінші орынға табан тіреді. «Бүркіт» образын би арқылы жоғары дәрежеде сомдаған жаңашарлық «Іңкәр» тобы үздік үшіншілікті қорытты.
Қайнар ЖҰМАҒОЖА.
Деструктивті діни ағымдар белең алған уақытта, тұрғындар арасында түсіндіру жұмыстарын жүргізіп, адасушыларды дұрыс жолға тарту – ең негізгі міндет. Осы орайда, жақында облыстық дін істері басқармасының ұйымдастыруымен Есік қаласындағы Жамбыл атындағы жастар саябағында «Экстремизм мен терроризмге жол жоқ!» атты сурет көрмесі өтті.
Шара барысында қала тұрғындары мен қонақтары діни тақырыпта салыған сурет туындыларын тамашалады. Сондай-ақ, «OPENAIR» форматында «Мұны білгеніңіз жөн» тақырыбында аудан орталығының халық көп шоғырланатын орындарында ақпараттық-түсіндіру жұмыстары өтті. Түсіндіру барысында қарапайым тұрғындар дін мамандарына сұрақтарын қойып, тұщымды жауаптар алды.
Сардарбек НҰРАДИН.
Легендарный оперный певец и дирижер Пласидо Доминго посетил ЭКСПО-2017. Короля оперы и его семью поприветствовал сам глава национальной компании Ахметжан Есимов, после чего мегазвезда направилась на гольфкаре к главному павильону ЭКСПО – «Нур-Алем». Первым делом звезда мировой величины расписалась в книге почетных гостей и написала свои пожелания.
«Какой впечатляющий, изумительный и волшебный павильон! Выставка запомнится, как одна из величайших в истории ЭКСПО! Поздравляю!», – написал маэстро.
Сразу же после этого золотой голос Испании зашел в юрту, где ему показали энергию четырех стихий. Там же ему продемонстрировали волшебное звучание кобыза. Напомним, что в столицу Казахстана Пласидо Доминго прибыл со всей своей семьей. Под впечатлением остались не только маэстро, но и его внуки.
«Я потрясен у меня нет никаких слов. Я хочу поздравить вас с такой великолепной выставкой ЭКСПО. В течение все моей жизни я посещал много разных выставок, в том числе и ЭКСПО. Выступал, как артист, певец, организовывал культурные мероприятия. Все они были большими событиями в культурной жизни человечества, но эта выставка она больше чем просто выставка. Такое ощущение, что мы попали на другую, более совершенную планету. Это торжество науки будущего», – отметил мегазвезда.
Король оперы также отметил масштабное развитие столицы. Отметим, что это не первый визит маэстро. В Астану Пласидо Доминго приезжал еще в 2009 году.
«То, насколько развился город за это время, просто не поддается никакому описанию. То, каким стал город сейчас и то, каким он был тогда, это просто великолепно. Я уверен, что у Астаны будет прекрасное будущее», – заключил Пласидо Доминго.
Выходя из казахстанского павильона, маэстро и его внук загадали желание и кинули монету в воду. Следующим пунктом остановки по маршруту «ЭКСПО-2017» стали павильоны Австрии, Испании, а также Германии. Напомним, что король оперы прибыл в столицу Казахстана 23 июля для проведения самого престижного в мире конкурса вокалистов. Путешествие Пласидо Доминго в Астану продлится до 4-го августа.
Департамент по связям с общественностью.
Адамның рухани байлығы мәдениет болса, мәдениет үйі сол байлықтың кені. Нұра ауылының мәдениет үйінде өнердің өзегі саналатын өлең сайысына жан-жақты дайындық жасап, қонақтарын қошеметпен қарсы алды.
Аудандық ішкі саясат бөлімінің тапсырысы бо-йынша «Еңбекшіқазақ аудандық әйелдер одағы» қоғамдық қорының қолдауымен, аудандық жастар ресурстық орталығы мен Сөгеті ауылдық округінің ұйымдастыруымен «Елбасы және Астана» атты жас ақындар мүшәйрасы өтті.
31 жыл мәдениет үйін басқарып жүрген тәжірибелі директор Дәулет Тұрғанбаев бастап, осы өнер ошағында біте қайнасқан кітапхана, музей қызметкерлері қостап, бұл шараға тыңғылықты дайындалыпты. Қазақы нақыштағы ою-өрнекпен әшекейленген сахна төріне жыр сайысының тақырыбы ілініп, «Елін сүйген, елі сүйген Елбасы» және «Өнегелі өнер» деген тақырыпқа сай кітаптар көрмесі қойылды. Келген қонақтар мен жас ақындар осы кеңшардың алғашқы қазығын қағып, 30 жыл басқарған директор Сағыныш Еспергеновтың музейін аралап, көрмедегі кітаптармен танысты.
Ауылдық кітапхана қызметкері Клара Есімова жас ақындарды таныстырып, шараны жүргізді. Өзін таныстыру, төл туындысын жатқа оқу кезең-дерінен тұратын мүшәйраға 6 округтен – Тес-кенсудан Еркежан Әбілтай мен Дінмұхаммед Бекболатұлы, Қаракемерден Жадыра Конгирбаева, Қырбалтабайдан Гүлзира Бақыт, Қаратұрықтан Нұрлан Әбдінұр, Сөгетіден Бағжан Әлпия мен Мұхит Жомартов, Шелектен Думан Иманбаев, барлығы 8 қатысушы қатысып, бақ сынасты. Та-қырыпты жан-жақты ашатын жыр мазмұнына ерекше көңіл бөлінді. Әрі сахнада өзін ұстауы, талапқа сай киімі, мәнерлеп оқуы – бәрін әділ-қазылар мүшелері: қоғамдық қор төрайымы Роза Омарқызы, аудандық жастар ресурстық орталығы-ның бас кеңесшісі Сұлтан Тойғанбай мен аудандық «Еңбекшіқазақ» газетінің өңірлік тілшісі назарда ұстады. Жарыс кезеңдерінің арасында мәдениет үйінің қызметкерлері – көркемдік жетекші Жайырбек Құрамаев, директор Дәулет Тұрғанбаев патриоттық рухтағы әндерді асқақтата орындады.
Нәтижесінде, тескенсулық ең жас талант иесі Дінмұхаммед Бекболатұлы оза шауып, көш бастаса, сөгетілік Мұхит Жомартов пен қаракемерлік Жадыра Конгирбаеваның жиған балы тең түсіп, қосымша «Ауылым» деген тақырыпта бір-екі шумақ өлең құрап оқу тапсырылды. Жадыра біраз дайындалуға рұқсат сұраса, Мұхит бірден шумақ құрап:
Алтын бесік – ауылым сені еледім,
Кіндік қаным тамған жерім сен едің.
Ес білгелі өзіңде өсіп, еркелеп,
Ер жеткіздің, бақытқа мені бөледің.
Сөгетімді құрметке бөлеп келемін,
Шабытыма арқау болған өлеңім, – деп өлең өнеріне төселген талант иесі екенін танытты. Жадыра да Қаракемер туралы бір шумақ өлең құрастырып, үшінші орынды иеленді. Оза шапқан үш талапкерге диплом, бағалы сыйлық, қалғандарына алғыс хат табыс етіліп, естелікке суретке түсті. Талант таудың басында тасты жарып шығатын еңлік гүл сияқты, бәлкім келешекте музаның аламанында топ жарып шығатындар да бар шығар осы таланттардың ішінде. Лайым, солай болғай!
Анарбек БЕРДІБАЕВ.
Халықаралық ЭКСПО-2017 көрмесіне Жетісу өңірінің шеберлері қатысып, «Шығыс базары» этноауылында «Қазақтың қолөнері – төл өнері» көрмесін өткізіп жатыр. Жетісу өңірінде гобелен, зергерлік өнер, керамика, кесте тігу, киіз басу, ағаш, металл, тері, сүйек сынды материалдармен жұмыс істеу жан-жақты дамып келеді. Келуші қонақтар жоғарыда аталған дүниелердің жасалу барысын да тамашалай алады.
Бұл өнер салаларымен айналысып жүрген шеберлердің еркін шығармашылық ізденіс, көркем идеяларды жүзеге асыру мақсатында шынайы шексіз мүмкіншіліктер жинағанын көреміз. ЭКСПО-ның басты мақсаты – «Болашақ энергиясы» тұжырымдамасын талқылау болса, шеберлер көрмесінің мақсаты – Тәуелсіз Қазақстанның ұлттық өнерін әлемге таныстыру болып табылады.
Тәуелсіз жас мемлекетіміз үшін ЭКСПО-2017 көрмесін өткізудің маңызы өте зор демекпін. Себебі, бұл көрме – мемлекетіміздің мығымдығын, еліміздің еңселілігін, ежелгі тарихымызды, өнерімізді, дәстүрімізді және халқымыздың қонақжайлығын, айналып келгенде ұлттың ұлылығын көрсететін тұс. Алдағы уақытта ЭКСПО-2017 еліміздің мерейін көкке көтеріп, тарихта қаларына сеніміміз кәміл.
Ағила Әзиева.
Cуретте: «Ұста Дәркембай атындағы қолөнер музейінің» басшысы Дәулет Дәркембайұлы ҚР мәдениет және спорт министрі А.Мұхамедиұлына қолөнер жәдігерлерін көрсетуде.
Астанада сейсенбі күні «ЭКСПО – 2017» халықаралық көрмесі аясында Алматы облысы Мәдениет күндерінің ашылу салтанаты өтті. Арқа төріндегі ауқымды шараға облыс әкімі Амандық БАТАЛОВ, Астана қаласының әкімі Әсет ИСЕКЕШЕВ, ҚР Мәдениет және спорт министрі Арыстанбек Мұхамедиұлы, сондай-ақ, «Астана ЭКСПО – 2017» Ұлттық компаниясы» АҚ басқарма төрағасы Ахметжан ЕСІМОВ қатысты. Жетісудың өнерін паш еткен шара «Қазақстан» орталық концерт залында ұйымдастырылды.
Зал облыстың өнерін тамаша-лауға келген көрерменге лық толды. Сүйінбай атындағы облыстық филармония өнерпаздары мен «Алатау әуендері» шығармашылық ұжымы астаналықтарды ерекше әсерге бөледі. «Жетісу – жұмақ мекені» деп аталған концерттің шымылдығы әйгілі сазгер Мұқан Төлебаевтың «Біржан – Сара» операсымен түрілді. Концерт М. Төлебаев атындағы халық аспаптары оркестрінің, республикалық байқаулардың жүлдегері, дирижер Арман Аманжолов жетекшілік еткен хор сүйемелдеуімен ашылды. Өнерпаздардың талантына астаналықтар бас иіп, қайта-қайта қошеметпен қол соқты. Аталған оркестрден бөлек, «Алтынай», «Сазген», «Адырна», «Құлансаз» секілді әйгілі ансамбльдердің өнерін Астана тұрғындары ыстық ықылас-пен қабылдады. Қара домбыра көмейінен төгілген «Махамбет» күйі залда отырғандардың рухын жанып, мерейін асқақтатты. Күй құдіретіне елтіген көрермен ерлікке толы тарихқа қайта оралғандай әсер алды. Ұлжан Айнақұлова мен Бейбіт Мұсаның орындауындағы «Той бастар» әні думан көрігін жандандыра түсті.
«Өнерде шекара жоқ» деген рас-ау. Халықаралық бай-қаулардың жеңімпазы Жомарт Тәкебаев, Асхат Мәдиев, Тілек Нағымбаев итальяндық әндерді шырқай жөнелгенде зал тағы да сілтідей тынды. «О, Соломио», «Ғашықсарбаз», «Герцогтың әні» секілді әлемге танымал туын-дыларды жетісулық өнерпаздар нақышына келтіре шырқады. Кеште «Талдықорған әуендері», «Шапағат» шығармашы-лық ұжымдары және Қанат-Айтгүл Құдайбергеновтер «Солай» әнін орындады. Көрермен «Бахор» тобының биін де жоғары бағалады.
Концерттен кейін көрермендер өздерінің алған әсерімен бөлісіп жатты. Солардың қатарында белгілі қазақ спортшысы Нұрбақыт Теңізбаевтың анасы Рысжан апай да бар. Ол ұйымдастырушыларға алғыс айтып, үлкен әсерге бөлен-генін тілге тиек етті. Ал Астана қаласының тұрғыны Сәуле Омарова мұндай кештің есінде мәңгі сақталатынын жеткізді. Сәуле жетісулық жерлестері мен осындай мерекеде жолыққанын жақсы ырымға балап, барлық облыс тұрғындарына татулық, тыныштық және зор денсаулық тіледі.
Салтанатты шараға 400-ге жуық өнер адамдары атсалысуда. Жетісу өлкесінің тұрғындары Есілдің ерке қаласында қызықты көрмелер, қойылымдар, спорттық іс-шаралар, концерттік бағдарламалар ұйым-дастыру үстінде. Райымбек пен Қабанбай батырдың, Балпық би мен Қабылисаның, Сүйінбай мен Жамбылдың, Мұқағали мен Тұманбайдың кіндік қаны тамған өлке өнерпаздары Сарыарқа даласын төрт күн бойы ән мен жырдың бесігінде тербетті.
Баспасөз құралдарынан.
Суретте: ауданымыздың өнерлі азаматтарының бірі Құрманғазы Қадыров қолөнер туындысымен Алматы облысының әкімі А.Баталовты таныстырды.
Округ әкімінің орынбасары Мәди Бектасов алаңға жиналған жұртты ел болашағы балалар күнімен құттықтап, қамқоршысынан айырылған, мүмкіндігі шектеулі, жағдайлары нашар отбасылар-дың балаларына балмұздақ, түрлі тәттілер таратты. Өнерлі бүлдіршіндердің әр ұлт тілінде ән айтып, биленген билері тамашаланды.
Баршамызды бал тілімен баурайтын,
Бала деген бір бақыт қой жайнайтын.
Ата-ананың арманы мен тілегін,
Бала емес пе бал-бұлақ боп жалғайтын, – демекші, «Бәйтерек» балабақшасы педагогтары мен бүлдіршіндерінің осы мерекеге орай бір жылдық шығармашылық концерті болды.
Адам өміріндегі ең үлкен бақыт – ұрпақ тәрбиелеу десек, сол тәрбие мен білімнің қандай деңгейде екені осы шарада көрініс тапты. Бүлдіршіндер балабақшада алған тәлімі мен үйренген өнерін тамашалатты. Бал тілімен баршаны баурап, олар «Әдемі-ай», «Егемен ел – Қазақстан», «Ай дидарлы анашым», «Қошақаным», «Катюша», «Привет лето» тағы басқа әндерді орындаса, әскери, түрлі маманның, ұлттық киімдер киіп, «Домбыра», «Танец с колесами», «Көктем шуағы», «Теңізшілер», «Аспазшылар» билерін мың бұрала билеп, Мұқағали, Абайдың өлеңдерін жатқа оқыды. Педагогтар болса Құрманғазының «Балбырауын» күйін күмбірлетіп, хормен «Өз елім» тағы басқа патриоттық әндерді асқақтатты.
Концерт соңында бір жылда аудан облыс, республика бойынша қол жеткізген жетістіктері аталып өтті. Тәрбиеші – педагогтардан Салтанат Қондыбаева «Біз бейбітшілік үшін», Айгерім Анисова «Қыс ғажайыптар мерзімі», Парида Байғожаева «Наурыз – көктем», Мадина Отарбаева «Тәуелсіздік тұғыры биік», Күлзия Малжанбаева М.Мақатаевтың туған күніне орай «Жырлайды жүрек» республикалық байқауларда бүлдіршіндері жеңімпаз, жүлдегер атанғаны үшін диплом, алғыс хаттармен марапатталса, облыстық аудандық байқау, сайыстары өзі өз алдына бір-бір төбе. Қысқасы, Шығармашылық концерт жоғары деңгейде өтті.
Туа аурушаң болып арнайы балалар үйінде тәрбиеленіп жатқан мекемеде де бұл мереке ерекше аталып өтілді. «Тұсаукесер» рәсімі жасалып, ән айтылып, би биленді, Округ әкімдігі бүлдіршіндерге арнап, түрлі ойыншықтар сыйлады. Сөйтіп, бар жақсылық бұл күні балаларға жасалды. Өйткені:
Тәуелсіздік ел арманы аңсаған,
Ер бабалар терін төккен, шаршаған.
Бүгін міне, бар әлемге танылған,
Қазақ елі үміт артам мен саған, – деп алдыңғы аталар мен ағалар жолын қуып, өсіп келе жатқан бүлдіршіндер – еліміздің болашағы.
Анарбек БЕРДІБАЕВ.
Шебердің қолы ортақ
Өзі түйін түймеген,
Зат қадірін біле ме?
Өзі түсіп күймеген,
От қадірін біле ме?
Ағаш жонып көрмеген,
Шот қадірін біле ме? – деп танымал шебер, марқұм Дәркенбай Шоқпарұлы айт-пақшы, қолынан іс келмейтін адамдар заттың да, оттың да, шоттың да қадірін білмейтіні анық. Ал, Ақтоған ауылының тұрғыны Ақберген Шубаев осы үшеуінің де қадірін біліп, одан үйлестіріп, алуан түрлі кәдесыйлар, басқа да дүниелер жасап жүрген қас шебердің өзі.
Бабалар қашап кеткені,
Тарихтың көне беттері.
Тайсалмай тағдыр тезіне,
Сарғайып бізге жеткені, – деп Ақберген Батырханұлы жырлағандай, бабалардан қалған өнерді жалғастырып, ағаштан ою ойып, темірден түйін түйіп жүрген азамат. Біз керексіз деп мән бермейтін нешетүрлі заттардан тың дүние жасап шығару тек талантты танытып қана қоймайды, көрегендікті де қажет етеді. Қисайып немесе небір пошымдағы ағаштан, не тамырдан әлдебір бейнені елестетіп, оны жасап шығару – шебер-лік емей немене. Жүнді, теріні өңдеп, малдың мүйізін, асығын, сүйегін сүріп, кәдеге асыру – зат қадірін, ал сол затты ығына, бейіміне қарай жонып, шауып іске асыру шот қадірін білгендік. Енді, темірді отқа балқытып, неше түрлі өрнектеп кәдеге асыру – от қадірін білгендік. Міне, сондай қасиет Ақберген шебердің бойынан табылады.
Отбасы Отаны Қазақстанға көшіп келіп, Ақберген Алматы қаласындағы №9 мектеп-интернатында білім алады. Өзі оқып алған техник, гидротехник мамандығымен бірге, жастайынан әкесінен үйреніп, дағдыланған қолөнер саласын да қатар алып жүреді. 1990 жылдан Дәркенбай Шоқпарұлының қармағында тәжірибе жинақ-тайды. 1991-2000-шы жылдары мектеп оқушыларына қолөнер саласы бойынша үйірме ашып, жұмыс жүргізеді. Ақтоған мекте-бінде шебердің бұйымдарына арналған арнайы бұрыш та бар. Қазір оның қолынан шыққан туындылары осы өңірдің отбасыларында баршылық. Тапсырыс бойынша түрлі бұйымдар жасау-мен айналасуда. Ел көбінесе еліктің не басқа жануардың сирағы мен тұяғынан сапталып, қайыспен өрілген қамшы, ұлттық өрнектермен әшекейленген ерто-қым, белдік, торсық, тағы басқа да бұйымдарына қызығушылық танытып, тапсырыс береді екен.
Ақберген шебер ғана емес, ақындық талабы да таудай екен. Сәті түскен кезде қағаз бетіне ойдан туған шумақтарын түртіп қоятын да әдеті бар. Мен оны Шелекте тапсырыс берген адамдарға, қамшы, ағаш рамкаға кенептен не өңделген теріден керіліп, алуан-алуан бейнелер салынған бұйымдар жасап әкеліп жүрген кезде жолықтырдым. Мына суреттегі дүниелер соның бір дәлелі ғана. «Ел іші – өнер кеніші» деген осы емес пе?
Анарбек БЕРДІБАЕВ.