Ұлы Абай атамыз
Ұлы хакім Абай ата
Мерекеңді тойлаймыз.
Бұндай игі іс-шараны
Бір ауыздан қолдаймыз.
Бас иеміз құдіретіңе
Мың бір алғыс жолдаймыз.
Өзің салған сара жолмен
Келе жатқан жандаймыз.
Білім таппай мақтанба деп
Жөн сілтедің сен бізге.
Орын таппай баптанба деп
Демеу болдың әлсізге.
Әрбір сөзің жатталады
Ашып айттың ақ-қараны.
Үлгі өнеге,ақ тілегің
Көкіректе сақталады.
**********
Абай ата өлеңі мен әндері
Жаттап өстім
Абай ата өлеңін.
Өлеңінен тұнып тұрған,
Табиғатты көремін.
Қыс пен жазы,
Күзі менен көктемі
Теңдесі жоқ,
Сұлу сурет дер едім.
Ести бергің келеді ғой
Абай ата есті әнін.
Бұл күндері әсем әні
Шарлап кетті жер шарын.
Биіктейді Абай ата
Күннен күнге зор тұлғаң.
Ардақтайды сені мәңгі
Артыңдағы ұрпағың
Аймара Құдайберген,
Қ. Сәтбаев атындағы орта мектептің
11 «А» сынып оқушысы
Маңдайыңнан марттың күні өпкен мың,
Жырлау үшін жер түбінен жеткенмін.
О, аналар, жүздеріңнен айналдым,
Шуағындай көктемнің.
Пайғамбардан бәсі биік тұратын,
Аналарды мәңгі жырлау мұратым.
Анашым деп жыр жазбаған сәті жоқ,
Анасына басын иген ұлы ақын.
Алла жолын әр қадамың даралар,
Ақ жаулығың болмысыңды саралар.
Арқауысың таусылмас жыр жолының,
Күндей нұрлы, гүлдей нәзік аналар.
Жүрегіңде жүйткіп аққан жылы ағын,
Жыр арнады жел тербеген құрағың.
Ортамызда есен-аман жүріңдер,
Болашақтың алаулатып шырағын.
Қуанәлі Алмасбекұлы,
Шелек тарихи-өлкетану музейінің қызметкері
Баянғали Әлімжанов айтыс ақыны, жыршы, манасшы, жазушылығымен қатар тапқыр сөздерімен, әдемі әзіл-қалжыңдарымен, орынды, орынсыз қойылған сұрақтарға, күнделікті өмірде болып жататын ойқыл-тойқыл оқиғаларға байланысты астарлы шумақтарымен танымал. Төменде «Деген екен» деген атпен жарияланған осындай өткір сөз, әзіл қалжыңдар жинағынан бірнеше үзінділер жариялап отырмыз.
Бір жолы Баянғалиға сатирик ақын Көпен Әмірбековтың немере туысы әрі құрдасы, фототілші Берсінбек Сәрсенов: «Көпенді сабап берсең, бір коньяк қоямын», – депті.
Баянғали: «Көпен екі коньяк қойса қайтем?» – деген екен.
***
Аудандық «Қазақ тілі» қоғамының Болат Бекенов бастаған қызметкерлері бір жағы творчестволық кеш өткізу, бір жағы «Казақ тілі» қоғамына қаржы жинау мақсатымен XXIII партсъезд атындағы совхоз орталығы Баймырзаға Баянғалиды алып барады. Біраз әңгіме, өлең айтылып, кеш аяқтала бергенде, ақын былай депті:
Ағайын, ажарыңды көріп тұрмыз,
Бар ғой деп азаматтар сеніп тұрмыз,
«Казақ тілі» қоғамына ақша сұрап,
Алдыңа төрт қайыршы келіп тұрмыз!
Ағамыз Болат деген бас қайыршы,
Қасында Төлеу деген жас қайыршы,
Бүгінгі «Қазақ тілі» қоғамдары
Өмірі тоймайтұғын аш қайыршы,
Көп шаруа болмай тұр ғой ойдағыдай,
Жүрміз-ау жол іздеумен толғанып-ай,
«Қазақ тілі» қоғамдарын өз жерінде
Дариға-ай, қайыршы ғып қойғанын-ай!
Бұл сөзге әрі күліп, әрі күрсінген совхоз директоры Есімбек Махметов, селолық совет төрағасы Амандық Ахметов, бас зоотехник Кеңес Мұқатов ақылдасып келіп, «Қазақ тілі» қоғамына бес мың сом ақша аударыпты. Сонда Баянғали:
Совхоздың директоры Махметов,
Селсебет төрағасы Ахметов,
Аудандық «Қазақ тілі» қоғамына
Аударды бес мың теңге рақым етіп! – деген екен.
***
«Жұлдыз» журналына Баян-ғалидың «Қиқыматтың қиссасы» атты повесі шыққанда журналист Кәрібай Мұсырманов ақынның үйіне телефон соғып, құттықтапты. Ол кезде Баянғали «Көкшетау правдасы» газетінің меншікті тілшісі, ал Кәрібай газеттің ауыл шаруашылығы бөлімінің меңгерушісі болса керек. Тағы да жұмыс бабымен мазалап, мақала сұрайды-ау деген інісінің жүрек жарды жылы сөздеріне разы боп кеткен ақын:
Айналдым, Кәрібайым Мұсырманов,
Бұл дағы достық қолды ұсынғандық,
Келгелі Көкшетауға Алматыдан
Көрдім-ау сенен тұңғыш мұсылмандық ! – деген екен.
***
Арықбалық ауданында Жұмағали Саинның 80 жылдығы болады. Ауатком төрағасы М.Шәйкенов ұзын бойлы, ірі денелі адам болса керек.
Бұл аудан кәдімгі Арықбалық екен,
Қонақжай, өзі еңбекқор халық екен,
Ауданы арық балық болғанымен
Бастығы кит секілді алып екен!- депті Баянғали.
***
– Самайды аққа берейін дегенсің бе? – депті бір күні әкімнің орынбасары Сансызбай Балтабеков. Өзі елуге келсе де, шашында бір тал ақ жоқ екен.
– Біз ептеп мимен жұмыс істейміз ғой, – деген екен Баянғали.
***
Бір жолы бастықтардың бірі Баянғалиға: «Сен бірінші орынға ат мініп, кілем алып жүрсің, баитын болдың ғой!» – депті. Сонда Баянғали: «Үкіметті жегендей болмайды екен» – депті. Тағы бір бастық: «Осы сен бір жерге барасың да , бір-екі ауыз өлең айтып, ат мініп, дүние алып келесің. Елден алып жатсың, алып жатсың...» – депті Баянғалиға. «Иә, аға, екеуміз де халықтан аламыз. Бірақ мен жырлап аламын, сіз ұрлап аласыз!» – депті сонда ақын.
***
Бір күні Баянғалидың машинасына мінген бір тәжірибелі шопырлар: «Мынадай бұрылыста қайтесің? Мынадай қиылыста мына жағыңнан машиналар келіп қалса қайтесің? Қай жерде кім бірінші өтуі керек?» – деп сұрай беріпті. Сонда Баянғали: «Мен өзі кішіпейіл адаммын, ешкіммен таласпай, тоқтаймын да, бәрін өткізіп жіберемін. Олар кеткесін жол өзіме қалады ғой! – деген екен.
***
Баянғалиды біреумен шатастырған бір бастық: «Әлгі балық аулаудың рұқсат қағазын қашан әпересің?» – депті. «Мен балықтың емес, халықтың адамымын» – депті сонда ақын.
***
Мағжан Жұмабаевтың 100 жылдық тойында (Солтүстік Казақстан облысы, 1993 ж.) өткен айтысқа Көкшетау облыстық әкімшілігі ресми түрде бір жас ақынды апарыпты. Ұлы ақынның «Батыр Баян» поэмасын алаш арыстары ақталмай тұрған кезде, 1975 жылдан бері ел арасында жырлап келе жатқан Баянғалидың бұл тойдан шет қалғанына қандары қызған Көкшетаудың мәдениет саласындағы қыздары Күміс Біләлова мен Мағрипа Әбілқасова Қызылжардағы мәдениет қызметкерлері Роза Шоланова мен Сұлушаш Темірғалиқызына хабарласады. Өңкей қыздар өзара келісіп, Баянғалиды ақындардың тізіміне ақырын ғана жазып жібереді. Кызық болғанда, қосалқы құрамда барған Баянғали айтыста жеңімпаз атанып, бас бәйгеге ие болып, Көкшетауға Мағжан атасының қаракер тұлпарын мініп келеді. Қыздарға риза болған ақын былай деп өлең шығарьпты:
Мағрипа мен Күмісім,
Роза менен Сұлушаш,
Қызмет қылып жыр үшін,
Үндемей-ақ бітірді
Әкімдердің жұмысын!
Бұлт көшеді таулардың басын ала,
Күн жауады-жайнайды жасыл қала.
Мен осында тұрамын, иә, достым,
Жасыл қала – біздерге асыл қала.
Біліп қойғын, бұл қала – Есік деген,
Тербелгендей боламын бесікте мен.
Білім алып Сәтбаев мектебінде,
Еш алаңсыз есейіп өсіп келем.
Салтанатты, сәулетті менің қалам,
Бір өзіңе сыйғандай бүкіл ғалам.
Бұл мен үшін бақыттың мекені ғой,
Тек осында еркіндеп тыныс алам.
Аспанында жұлдызы жарқыраған,
Қойнауынан табылған Алтын адам.
Сыр шертеді тарихтан тауы да оның,
Сыр шертеді өзені сарқыраған.
Алтын киім киінген батыр бабам,
Сен туралы ұстаз да айтты маған.
Ел басына күн туған сол заманның,
Шежіресі көп шығар айтылмаған.
Асыл тастан шығады, ақыл жастан,
Мен тарихты сүйемін әуел бастан.
Арманым көп алысқа жетелейтін,
Жазармын деп ойлаймын әлі дастан.
Аймара Құдайберген,
Қ.Сәтбаев орта мектебінің 11 сынып оқушысы
Әйел жайлы аңыз көп қасиетті,
Ғасырлардан аңыздар асып өтті.
Шексіз түйсік, махаббат, сұлулықты,
Әйелдерге тәңірім нәсіп етті.
Қаламасын биікке шыққанды кім?
Тәуелді сол әйелге күш, тағдырың.
Әйел – үміт үзілмес, дегенменен,
Афродитадай жеңе алмас құштарлығын.
Бар әлемді келеді өрге сүйреп,
Әйел – қайсар өшпейтін кеудесінде от.
Әйел – қамқор жебейтін отбасыны,
Қасиетті Ұмайдың бейнесі боп.
Әйел – пәктік шығарған адал атын,
Әйел – тірек демейтін азаматын.
Әйел – өмір дәні ғой тіршіліктің,
Барша адамзат Хауадан таралатын.
Үйлесімі секілді заңдылықтың,
Әйелсіз ер болады мәңгі міскін.
Әйел – батыр Тұмардай топтан озған,
Әйел – тағдыр символы мәңгіліктің.
Талас-тартыс, береке, басқаның да,
Біле білсең әйел тұр бастауында.
Әйел – жұлдыз жол сілтер болашаққа,
Жарқыраған Шолпан боп аспаныңда.
Бағыты көп өмірдің тарауында,
Әйел болар жол сілтер жалауың да.
Еркек үшін өкшесі Ахилестің,
Ұжымақтың кілті де табанында.
Әйел жайлы аңыз көп, рас бәрі,
Таусылмайды, бітпейді – ұласпалы.
Әйел – бақыт, әйел – бақ, әйел – дәулет,
Кез келгенге жолықпас бірақ тағы.
Нұрсерік ТІЛЕУҚАБЫЛ
Баяғыда бір жолаушы жолаушылап келе жатып шағын бір ауылға түсіпті. Ауылдың сыйлы кісінің үйіне дәл түскен екен, ол да жолынан жығылмай қонағын жік-жапар болып күтіп алыпты. Түннің бір уағында қонақ иттің ұлығанынан оянып кетіпті. Бұл қонақ жәй қонақ емес еді. Жер бетіндегі жан - жануардың тілін меңгерген ғалым адам болатын.
Ауыл сыртынан
– Қонақтың атын жеймін! – деп ұлыған қасқырға үй иесінің иті:
– Қонағымның атын жер болсаң, сені адамдарға ұстап беремін, – деп жауап қатып тұр екен. Қасқыр болса:
– Бұл ауылды таң ата жау шабады, – деп тайып тұрыпты.
Қонақ үй иесін оятып, дереу ауылдың көшуін сұрапты. Ауылды көшіріп болған соң, ертесіне ескі жұртқа келсе көнбей қалып қойған екі үйдің шаңырағы ортасына түсіп жатыр екен.
Жаңа қоныста түстеніп отырған қонақ:
– Бұл үйдің ырысы итінде екен-ау, бұйымтай ретінде осы итті сұрармын, – деп ойлапты. Сол мезетте ит киіз үйдің туырлығын иіскепті. Қонақ:
– Ырыс туырлыққа ауды, туырлықты қалаймын, – деп ойлап отыра беріпті. Сол оймен отырғанда маңайда жайылып жүрген жетім тоқты келіп, сол туырлыққа сүйкеніп өтіпті. Бұйымтайын сұраған үй иесіне:
– Маған анау қара тоқтыны сойып, етін түгелдей асып беріңіздер. Тек бір шартым бар еттен менен бұрын ешкім ауыз тимесін, – депті.
Ауылдың бір жігіті тоқтыны әп-сәтте сойып тастайды. Бәйбіше етті толығымен қазанға салып асып енді әкеле бергенде үй иесінің ерке ұлы жүгіріп өтіп бара жатып, бастың құйқасынан жұлып жеп үлгеріпті. Ет үстінде ауыл иесі:
– Қадірлі қонағым, сен кеше ауылды ажалдан аман алып қалдың, сырыңды айтшы, – депті. Сонда қонақ:
– Сізге ырыс қонған екен, сол ырысыңыз ауылды асырап отыр. Ырысыңыздың иесі итіңіз екенін сездім, соны қалаймын-ау деп ойлағаным сол еді, итіңіз туырлықты иіскеп ырыс туырлыққа ауысты. Туырлықты қалайын деп отырғанымда, оған тоқты сүйкенді. Сол тоқтының етін жеп ырысты болайын деп ойлаған едім, етті мына балаңыз бірінші жеп үлгерді. Ырыс енді осы балада. Құдайдың оң назары түскен пендесі екенсіз, – деп сөзін аяқтапты қонақ.
Дереккөз: balakai.kz
Баяғыда екі көрші болыпты. Қыс келіп, алғашқы қар жауады. Бір көршісі ерте тұрып, күрегін алып, есіктің алдын қардан тазалайды. Мойынын созып, көршісінің ауласына қараса, оның есігінің алды тап-таза екен.
Ертесі күні қар түнімен жауып шығады. Әлгі жігіт одан ерте тұрып, көршісінен бұрын қар тазалап тастамақ болады. Таң сәріден тұрып, қар күреп болған соң тағы көрші аулаға қарайды. Ал ол жақ тап-таза.
Үшінші күні қар көп жауып, тізеден келіпті. Күн шыға сыртқа шыққан жігіт тездетіп ауланың қарын күреп, тазалайды. Әдеттегісінше, көршісінің ауласына мойынын созып қараса, түнде қар жаумағандай-ақ тапталып жатыр. Жігіт таңғалады.
Сол күні екі көрші көшеде кездесіп қалады. Ананы-мынаны бір сөз етіп тұрып, әлгі жігіт көршісінен: «Осы сен есігіңнің алдындағы қарды қай уақытта тазалап үлгересің?» – деп сұрайды. Көршісі: «Мен ешқашан қар тазалаған емеспін, үйіме достарым келеді. Есігімнің алды тапталып жатқаны содан болар», – деп жымия жауап беріпті.
Достарыңыз көп болсын!
Аударған: Құралай Мұратқызы
Баяғыда төрт әйелі бар сұлтан өмір сүріпті. Әйелдерінің бәрі де бірінен-бірі өткен сұлу, ақылды болыпты. Десе де, сұлтан ең мейірімді, ең жас, төртінші әйелін бәрінен де қатты жақсы көріпті. Сондықтан оған әрдайым қымбат көйлек кигізіп, баға жетпес әшекейлер сыйлап, көңілін таба біліпті.
Сұлтан жер бетіндегі ең сұлу әйел – үшінші әйеліне де ессіз ғашық болыпты. Ол өзге елдерге сапарға шыққанда үшінші әйелінің әдемілігіне ел тамсансын деп, әрдайым оны жанына ертіп жүріпті. Десе де, «Сұлу әйелім күндердің бір күнінде менен кетіп қала ма?» деген ойдан қатты қорқыпты.
Ақылы мен қулығы асқан сұлу – екінші әйелін де сұлтан құлай сүйіпті. Өйткені ол сондай ақылды, тартымды, әрі сабырлы екен. Сұлтан алдынан кесе көлденең шыққан кез келген мәселе бойынша екінші әйеліне ақыл сұрап, жүгінеді екен. Әйелі болса, барлық қиындықтан шығар жолды дұрыс көрсетіп, бар мәселенің шешімін тауып беріп отырыпты.
Ал бірінші әйелі – өзгелерінің ішіндегі жасы ең үлкені. Ол сұлтанға ағасынан қалған мұра сияқты еді. Сұлтанға өте адал болыпты. Сондай-ақ сұлтанның байлығы мен мансабы артып, ел арасында танымал болуы үшін қолынан келгеннің бәрін жасапты. Алайда сұлтанның оған ешқандай да сезімі болмапты. Бірінші әйелі сұлтанды қатты сүйсе де, ол оған мүлде назарын аудармаған екен...
Күндердің бір күнінде сұлтан қатты науқастанып қалыпты. Ақырғы күнінің жақындап қалғанын сезген ол өткен өміріне көз жүгіртіп, қалай өмір сүргенін ойлады. «Қазір төрт әйелім бар. Ал о дүниеде жападан жалғыз қаламын ғой» деп ойлаған сұлтан бірден төртінші әйелін шақырып:
— Сен әркез менің ең сүйіктім болдың. Саған мен ең жақсымды беріп, әрдайым қамқор болдым. Қазір, өлім аузында жатқанымда сен де менің жанымнан табылып, қараңғылық патшалығына менімен бірге аттануға дайынсың ба? – деп сұрапты.
— Бұл жайында тіпті армандама! – деп дүрсе қойған жас келіншек басқа ештеңе айтпастан, өз жөнімен кетіпті. Сүйіктісінің бұл сөздері науқастанып жатқан сұлтанның жүрегін одан ары ауыртыпты. Ашуланған сұлтан үшінші әйелін шақыртыпты. Сұлтан:
— Өмір бойы мен сені ғана мақтан тұтып, сұлулығыңа тамсанып өттім. Қазір, өлім аузында жатқанымда сен де менің жанымнан табылып, қараңғылық патшалығына менімен бірге аттануға дайынсың ба? – деп сұрапты.
— Әрине, жоқ! – деп жауап қайтқан сұлуы: Менің өмірім жалғасуда. Мүмкін, мен тағы тұрмысқа шығармын, – деген екен. Сұлу келіншегінен мұндай жауап естіген сұлтанның халі одан ары нашарлай түсіпті. Сонда ол екінші әйелін шақыртыпты.
— Қиналған шағымда сенен әркез ақыл сұрадым. Сен менің ақылшым әрі ең мықты көмекшім болдың. Қазір, өлім аузында жатқанымда сен менің жанымнан табылып, қараңғылық патшалығына менімен бірге аттануға дайынсың ба? – деп сұрапты сұлтан.
— Өкінішті, бірақ бұл жолы мен сенің жаныңда көмекшің бола алмаймын. Бар болғаны, сені бар жол-жоралғымен жерлеуге уәде бере аламын, – деген екен екінші әйелі. Сұлтан өмірден түңіліп, бәрінен көңілі әбден қалыпты. Сұлтан сол уақытта:
— Мен сенімен қайда болса да, баруға дайынмын және әркез жаныңда боламын! – деген дауысты естиді. Басын көтеріп қараса, алдында бірінші әйелі тұр екен. Күйеуінің науқастанып, ауыр халде жатқанын уайымдаған әйел әбден азып-тозып кеткен екен. Таңғалған сұлтан:
— Бойымда жаным барда басқаларға емес, саған көбірек көңіл бөлуім керек екенін енді ғана түсіндім! – депті.
Біздің барлығымызда төрт әйел бар. Төртіншісі – денеміз. Қанша жерден әдемі, жақсы көрінгіміз келгенімен, оның еш пайдасы жоқ. Өйткені ол сымбат бізбен бірге о дүниеге бармайды.
Үшінші әйел – қызмет, мансап және ақша. Біздің өмірімізден кейін олардың барлығы басқаларға қалады.
Екінші әйел – отбасы мен жақындарымыз. Олар өмір бойы бізге көмектесіп, қамқоршы болады, бірақ біз о дүниелік болғанда жақындарымыз бізді бейітке дейін ғана шығарып салады.
Ал соңғысы, яғни бірінші әйел – біздің жанымыз. Байлық, бақыт, ақша, мансап, рақатқа бөлену жолында жанымыздың жайын ұмытып, бәріне де барамыз. Осыған қарамастан, тек жанымыз ғана әрдайым бізбен бірге болады. Сондықтан оны әркез бірінші орынға қойып, қорғап жүруді ұмытпаңыздар. Бұл өмірде бізге берілген ең үлкен сый – жанымыз. Оған көңіл бөліп, қамқор болайық.
Аударған: Құралай Мұратқызы
Мұқағали, «Ең бірінші бақытым – халқым менің» деп жырлады. Абайды ұлттың ұлы ақыны десек, Мұқағали – қазақ халқының жарық жұлдызы. Оның өлеңдерінде не құдірет бар дегенде, өз заманының адамдарымен таң азанмен бірге тұрды. Халық күрсінсе, бірге күрсінді, халық шаттанса, бірге шаттанды. Қасиетті Хантәңірі тауынан мұзбалақ қыранның көкте қалықтап жүргенін халық көрді. Бірақ қолға ұстап бағындырудан қорықты.Өйткені, ол көк аспанмен тілдесіп, туған жердің тасына дейін түгендеп, ата-бабалардың аманатын көздің қарашығындай сақтауға, әр тырнағы алмас қылыштай жарқылдап,ұлттың ұлы тұлғаларын өтірік жаламен жауына байлап матап берген, өзгенің сойылын соғып халыққа қайғы-қасірет әкелген, адамның бет пердесін киген, нағыз түр-түсі шибөрі, жылан сияқтыларды отты жырымен осып өткен, кез келген уақытта аспаннан найзағайдай жарқылдап келіп, алмас тырнақтарымен шеңгелдеп бүріп, тұтас өмірі арпалыспен өткен ақын.
Мұқағали өзінің естеліктерінде мың ойланып, мың толғанып,заманның ағымына бейімделу керек па деген сұрақты өзіне қоя отырып,ойы жан-жаққа шашырап, не істерін білмей қиналғанда тек кішкентай жүрекке Тәңірім үлкен рух бергенін сезінгендей анық та айқын қадам басқанын,мына өлең жолдарынан байқағандаймыз:
Барса келмес сапарға араластым,
Енді артыма бұрылып қарамаспын.
Жырлар жазам, дерімді деп өлемін
Қарсы алдында тұрсам да дар ағаштың, – деп жан-тәнімен ұлтты құрметтеуге, нақты айтсақсалт-дәстүрді сақтауға, тілін дінің сатпауға, Отанды сүюге үндеген ақын. Мұқағали жырларынан қуат алған ұл-қыздарымыз Тәуелсіздік әкелген 16 желтоқсанда ұлт болып ұйысып, Тәңір сыйлаған шыбын жандарын да қиюға дайын екендіктерін көрсетті. Мұқағали халықтың мұң-мұқтажын өлең арқылы жеткізіп қана қоймай, ақиқаттың ақ жолын жарқыратып салып қойды. Сол жолмен жүрген ақын халықпен бірге.Қайсыбіреулер Мұқағалиды өтірік мақтап,халыққа жағымпазданады. Мұқағалиды туралы айту үшін Мұқағалидың жолына түс,адалдықты,парасаттылықты,мейірімділікті, еліңді, жеріңді жырла.
«Ердің атын ел шығарады, елдің атын ер шығарады» дегендей халқына қызмет еткен,ұлтымыздың ұлы тұлғаларын бөле жармай,анау-мынаудан мықты еді, мың жылда бір келетінақын деген сияқты әсірелеуге жол бермей, өнерді дәріптеп, ақындарымызды құрметтей білуіміз керек. Төртеу түгел болса, төбедегі келеді» дегендей, Мұқағали жалғыз емес, ел болып арамызда жүрген Мұқағали жолымен келе жатқан ұл-қыздарымызды ұлықтай отырып, өткен күннен өнеге алып, келер күнге тектілікті, әдептілікті, ұлтжандылықты қалыптастыру, әрбір қазақ қазағым деп соққан жүректің лүпілін естігенде оған деген құрметтің жоғары екенін жеткізе білу үлкен мәдениеттілікті білдіреді. Мұқағали өлген жоқ,өйткені оның жазған өлеңдері халықтың санасын оятып, ақынға деген құрмет күннен-күнге артып,қазақтың бір қара баласы ретінде күнделікті тіршілікте бар қазақтың жүрегінен орын алған,шындықтың шыңын жырмен бағындырған халық ақыны.
Сәбетбек БАҒЫБАЕВ
Түрген ауылы Д.А.Қонаев атындағы орта мектебінде «Өрлеу» БАҰО АҚФ Алматы облысы бойынша ПҚБАИ, Еңбекшіқазақ аудандық білім бөлімімен бірлескен Дінмұхамед Ахметұлы Қонаевтың туғанына 108 жыл толуына арналған «Ұлт мақтанышы Д.А.Қонаев мұрасы негізінде ұлттық құндылықтарды ұлықтау-рухани жаңғыру кепілі» тақырыбында республикалық ғылыми-тәжірибелік конференция өтті. Конференцияға қатысушылар Д.А.Қонаев бюстіне гүл шоқтарын қойды.
Конференция – «Өрлеу» БАҰО АҚФ Алматы облысы бойынша ПҚБАИ Д.А.Қонаев атындағы орта мектебімен бірлескен «Рухани жаңғыру – мектеп оқушыларының ғылыми ізденістерін ұлттық құндылықтар аясында әлеуметтендірудің негізі» тақырыбында ғылыми-эксперименттің 3 жылдық жұмыстың қорытынды нәтижесі.
Конференция жұмысы Еңбекшіқазақ аудандық білім бөлімі әдістемелік кабинетінің меңгерушісі А.Тортаеваның құттықтау сөзімен ашылды.
Конференцияның І бөлімінде «Өрлеу»БАҰО АҚФ Алматы облысы бойынша ПҚБАИ директорының орынбасары, саяси ғылымдарының докторы, доцент Т.Ауелгазина «Дәуірдің дара тұлғасы – Д.А.Қонаев», Д.А.Қонаев атындағы орта мектеп директорының оқу ісі жөніндегі орынбасары К.Ақтамқұлова «Қонаев өнегесі арқылы ұлттық құндылықтарды ұлықтау», Д.А.Қонаев атындағы орта мектебінің тарих пәні мұғалімі М.Кабдиев «Қонаев еңбектеріндегі ұлттық құндылықтар көрінісі», Қорам орта мектебінің қазақ тілі мен әдебиеті пәнінің мұғалімі Н.Бибаева «Елін ұмытпаған, елін ұлықтаған – нар тұлға»тақырыбында мемлекет және қоғам қайраткері, ХХ ғасырдың заңғар тұлғасы Дінмұхамед Ахметұлы Қонаев туралы өз баяндамаларын оқыды.
Телекөпір бөлімінде Нұр-Сұлтан қаласынан, Атырау, Алматы, Қызылорда, Шығыс Қазақстан облыстарынан аға оқытушылар, мектеп, колледж мұғалімдері баяндамаларын тікелей эфирде ұсынды.
Конференцияның құрметті қонақтары құттықтау сөздерін арнады.
Еңбекшіқазақ ауданының құрметті азаматы, мектептің қамқоршылық кеңесінің төрағасы Бауыржан Сабырбаев, «Казинтерсервис» ЖШС басшысы Райхан Аскарова, облыстық білім басқармасы Инклюзивті білім беру саласының маманы Құндыз Нұрпейісова, Алматы қаласы «Азия-мебель» компаниясының президенті Ерлан Кунанбаев, ақын, сазгер ҚР білім беру ісінің үздік қызметкері, Талғар ауданының құрметті азаматы, мұқағалитанушы Кәмнұр Тәлімұлы, Алматы қаласындағы Д.Қонаев мұражайының директоры Елена Кубашева, Алматы қаласындағы Д.Қонаевтың пәтер-мұражайының директоры Жаннета Серікбаева, ҚР дипломатиялық қызметінің еңбек сіңірген қызметкері, тарих ғылымдарының кандидаты Роза Сауранбаева, мемлекет және қоғам қайраткері, Еңбекшіқазақ ауданының құрметті азаматы Елеусіз Сұлтангазиев, Еңбекшіқазақ ауданының құрметті азаматы, Ы.Алтынсарин төсбелгісінің иегері, ардагер ұстаз Гүлнар Жошыбаева, Еңбекшіқазақ аудандық қоғамдық-саяси газетінің бас редакторы Хайролла Ахметжанов әсерлі әңгімелерін ортаға салды.
«Ескерген ескісін сақтайды, ел болған естісін сақтайды» демекші Дінмұхамед Ахметұлы Қонаевпен қызметтес болған, жұмыс бабымен кездескен, көзін көріп, батасын алған қонақтар Қонаев жайлы құнды естеліктермен бөлісті. Ешбір кітапта жазылмаған Д.Қонаев жайлы естелігін ҚР дипломатиялық қызметінің еңбек сіңірген қызметкері, тарих ғылымдарының кандидаты Роза Тілеубердіқызы үш тілде айтып берді.
Бүгінгі өскелең ұрпақ-тың Қазақстан мәде-ниеті, ғылымы, рухани өмірі мен сол мәдениетті жасаушыларға деген қызығу-шылықтарының күн санап арта түсуінен де ұлтымыздың ұлы тұлғаларына деген сүйіспеншілігі мен құрметі анықталады. Сондай өз ғасырының біртума перзенттерінің бірегейі ретінде тарихтың алтын парақтарында өмір жолы мен қызметі хатталып, халқының жадында мәңгілікке сақталып қалған есім – Дінмұхамед Қонаев. Абыз қайраткердің рухани байлығының тереңдігі, оның тұжырымдары мен әлеуметтік еркіндік көкжиегінің кеңдігі – дәл қазіргі уақыттағы қоғам дамуы қандай тұлғаға зәру болатындығын танытады. Конференцияның барысы қайраткердің парызы мен елжандылық қасиеті, оның адамгершілігі мен рухани ізгілігі, азаматтық батылдығы жөнінде болды. Д.А.Қонаев турасында тағылымы мол естеліктер айтылып, елге аянбай қызмет еткен жылдарындағы жетістіктері тағы бір рет сараланды.
Конференция соңында Түрген ауылдық округінің әкімінің міндетін атқарушы Мәди Бейсембаев, мектеп басшысы Римма Ахметова республикалық ғылыми-тәжірибелік конференцияның жоғары өтуіне ықпал еткен «Өрлеу» БАҰО АҚФ Алматы облысы бойынша ПҚБАИ директоры, педагогика ғылымдарының докторы, профессор Серік Кенесбаевқа, директорының орынбасары, саяси ғылымдарының докторы, доцент Толқын Ауелгазинаға, Еңбекшіқазақ аудандық білім бөліміне, келген қонақтар мен қатысушыларға алғыстарын білдірді.
Құлпынай ТҰРАРОВА,
әлеуметтік педагог
Әйтей Құлманбетұлы – XVIII ғасырда өмір сүрген, елінің бостандығы мен тәуелсіздігі үшін жоңғар қалмақтарымен кескілескен ұрыстарға қатысып ерен ерлігімен көзге түскен қолбасшы, тарихи тұлға.
Халқымыз сан ғасырлар бойы аңсап келген арманына, Аллаға шүкір XXI ғасырдың басында жетіп отыр.Өз алдына шаңырақ көтеріп, жандарын шүберекке түйіп, ата мекенін анталаған жаудың шабуылынан қорғай білген қаһарлы ата-бабаларымызды қастерлеп еске алмасақ болмайды. Мың өліп, мың тірілген қазақ жұртына бұл еркіндік, бұл бостандық айрықша қымбат.
Әйтей батыр туған жерін, туған елін ежелгі жауымыз құба қалмақтардан қасықтай қаны қалғанша қорғап, қазақ жерінен қуып шыққан, сол жолда құрбан болған қайсар ұлдарымыздың бірі екені тарихқа аян.
Әйтей Құлманбетұлы - Шапырашты тайпасының Асыл руынан шыққан Орынбет ұрпағы. Ол 1712 жылы қазіргі Алматы облысы, Еңбекшіқазақ ауданы, Жарсу өзенінің жағасында орналасқан Бесағаш ауылында жылқышының отбасында дүниеге келген. Тарихи деректер мен ел аузындағы ұрпақтан ұрпаққа жалғасып, бізге жеткен шежіре мен аңыз әңгімелерден белгілі болғандай, Албанның Әлжан руынан шыққан беделді ел билеген батыры Қангелдінің басшылығымен, Әйтей қалмаққа қарсы көптеген соғыстарға қатысып, әбден шыңдалып өседі. Өмірінің соңғы күндеріне дейін қазақтың шүйгін жерлерін басып алып, жайлап жатқан қалмақты қуып, ерен ерлік көрсетті. Халық батыры атанды
Кескілескен көп ұрыстардың бірінде, қазақтар мен қалмақтардың жасақтары екі төбенің басына жиналып, бірін-бірі жекпе-жекке шақырады. Қалмақтар жағынан зор денелі алып жасақ Жамқайын атын ойнақтатып екі төбенің ортасындағы жазыққа шығады. Жамқайынның тұлғасын көрген қазақтар қолы абыржып тұрып қалады. Дәті шыдап, жекпе-жекке жуық маңда ешкім шыға қоймайды. Сол кезде ортадан атан төсті, жұмыр мойынды, ұзын құйрық, кең танау құлагерін ойнақтатып, Қангелді атасының батасымен жекпе-жекке Әйтей шығады. Ауыздықпен алысқан құлагерін ор текедей орғытып, Әйтей жазыққа шығып, екі жауынгер бір-біріне құйындай қарсы шабады. Басын жіберген құлагердің құйрығы жазықта ұшқан құстың құйрығындай түп-түзу болып көрінеді. Екеуі бірін-бірі көпке дейін ала алмайды. Қалмақтың қара күші басым болғанымен, айла тәсілі шамалы екен. Әйтейдің қимылына төтеп бере алмай, әбден қан сорпаға түседі. Қанша уақыт өткені белгісіз, бір кезде көз ілеспес жылдамдықпен қимылдаған Әйтей, найзамен қалмақтың кіндік тұсынан шаншып, бұрап-бұрап жіберіп тартып қалғанда, оның ішек-қарны ақтарылып, жерге екі бүктеліп түскен жауының басын Әйтей қылышпен шауып тастайды. Мұны көрген қазақ жасақтары қуанғаннан «Бақтиярлап, Қарасайлап», жер-көкті күркіретіп жібереді. Ата-бабаның әруағы қолдап, тұңғыш рет қалмақтың Жамқайын батырымен жекпе-жек соғыста жеңіске жеткен бала жігіт Әйтейдің атағы тез арада Жетісу аумағына кең тарады. Әйтейдің жұрт көзіне түсіп, соғысқа нағыз араласқан кезі осыдан басталады.
1761 жылы соғыстың беті қайтып, ел басына жеңілдік туғанымен, қолбасы Әйтейден айырылған ауыр жыл болды. Кейін Әйтейдің біраз ұрпақтары қазіргі Еңбекшіқазақ ауданының «Белшабдар» деген жерінен, бабасының қайтыс болған жеріне қоныс аударып, өз алдына бір ауыл болды. Ол ауыл бүгінде Қаскелең қаласының жанында орналасқан. 1992 жылдан бері «Әйтей» ауылы болып аталып, батырдың есімі берілді.
Тарихи деректер мен бізге жеткен шежіре әңгімелерден белгілі болғандай, Әйтей батырдың ұрпақтары негізінен Еңбекшіқазақ және Қарасай аудандарында тұрады.
2005 жылы батырдың ұрпақтары арнайы қор ашып, одан түскен қаржыға Әйтей ауылында батырдың сүйегі жатқан жерге кесене тұрғызып, үлкен ас берді. Әйтей ауылынан шыққан мемлекет қайраткерлері мен лауазымды қызмет істейтін ұрпақтары үлкен мешіт тұрғызып, мешіттің салтанатты ашылуына сол кездегі Қазақстан мұсылмандары Діни басқармасының төрағасы, бас мүфти Әбсаттар қажы Дербісәлінің өзі арнайы келіп, ақ тілегін айтқан болатын.
Сол ауылда туып өскен әрі қайраткер, әрі қаламгер ұрпағы, шежіреші, «Бәйдібек баба – алып бәйтерек» кітабын жинақтап жазушы, марқұм ағамыз Балғазиев Аубай туралы орны бөлек өңгіме. Еңбекшіқазақ ауданының әкімі болған Смади Әбдиев, екі кеңшар директорлары болған Болатбек Нурманбетов, Қазыбай Жылқыбеков бауырларымыз бүгінде өмірден озған. Ауданымыздан шығып, білдей бір мұнайлы өлкеде облыс әкімі қызметін атқарған, бүгінде жоғары қызметте жұмыс атқарып жатқан, республикаға белгілі ағайынды Алик Айдарбаев пен Ерік Айдарбаев бабамыздың ұрпақтары ретінде мақтан тұтамыз.
Еліміздің гүлденіп дамуының арқасында, ауданымыздың Қаракемер ауылдық округінде, тұтастай бір үлкен ауыл «Жаңа Сатай» салынып бітуге жақын. Сол ауылдың үлкен бір көшесіне Әйтей батырдың аты берілді. Осындай кең ауқымды игілікті істің басында жүргеніме, бабамның ұрпағы ретінде ескі көздерден естігенімді, Әйтей ұрпақтарының арасында айтылып жүрген аңыз-әңгіме туралы жазғанды жөн көрдім.
Қайырбек Далдабаев,
Талдыбұлақ ауылы
Бірде Кұң Зының (Конфуций) шәкірттері аула сыпырып жүріпті. Аулаға кіріп келген қонақ олардың бірінен: «Сен кімсің?», – деп сұрапты.
Шәкірт бала таң-тамаша қала: «Мен Кұң Зының шәкіртімін!», – деп жауап беріпті.
Қонақ: «Тамаша болды, мен сізден бір істің жөнін сұрайын деп едім», – деп жөнін айтыпты.
Шәкірт бала: «Жарайды!», – деп келісіпті. Іштей: «Сіз менен бір ғажап сұрақ сұрап, мені жаңылдырмақшысыз ғой», – деп ойлапты.
Қонақ: «Бір жылда қанша маусым бар?», – деп сұрайды.
Шәкірт ішінен мұны да сұрақ деуге бола ма деп ойлапты да: «Бір жылда төрт маусым болады ғой», – деп жауап берген екен.
Қонақ басын шайқап: «Жоқ, қателесесің! Бір жылда үш маусым болады!», – депті.
– «Сіз қателесесіз, бір жылда төрт маусым бар!»
– «Үш маусым бар!»
Осылайша екеуі бір байламға келе алмаған екен.
Ақыры былай деп бәстесіпті: «Егер төрт маусым болса, қонақ шәкірт балаға үш рет бас иіп тағызым жасауы керек, ал үш маусым болса шәкірт қонаққа үш рет бас июі керек». Кұң Зының шәкірті іштей масаттанып, бұл жол мен сөзсіз жеңіп тұрмын деп ойлап, Кұң ұстаздарына барып істің жөнін сұрауға дайындалады.
Дәл осы сәтте Кұң Зы да осы маңнан өтіп бара жатқан екен.
Шәкірті: «Ұстаз, бір жылда қанша маусым бар?», – деп сұрайды.
Кұң Зы келген қонақтың өн-бойына бір қарап-ақ: «Бір жылда үш маусым бар!», – деп жауап береді. Шәкірт баланың басы айналып кете жаздады, бірақ себебін қузай кетуге жүрексінеді.
Қонақ оған: «Дереу басыңды иіп тағзым жаса!», – деп бұйырады. Шәкірт амалсыздан басын иеді.
Қонақ кеткен соң шәкірті ұстазына барып: «Ұстаз, бір жылда төрт маусымның бары анық, сіз неге үш маусым бар дедіңіз?», – деп сұрапты.
Кұң Зы: «Сен жаңағы адамның өне-бойының жап-жасыл болып тұрғанын көрген жоқсың ба? Ол шегіртке тектес адам. Шегіртке көктемде туып, күзде өледі. Ол қыс деген маусымның бар екенін мүлде білмейді. Оған тек үш маусым бар десең ғана риза болады. Ал, төрт маусым жайлы онымен бір жыл тәжікелессең де жеңе алмайсың. Сенің есең кетіп бара жатса да, үндеме. Түк етпейді, өйткені оның түсінігін өзгерту мүмкін емес», – деген екен.
Түйін
Бұл оқиғаның шын болған-болмағаны белгісіз, бірақ оның адамдарға берері бар. Егер сіз өзіңізге жолыққан осындай адамдарға төрт маусымның бар екенін түсіндірмекші болсаңыз, өз ғұмырыңыздан он жыл кем жасауыңыз мүмкін. Таласпасаңыз мейірімді, білімді адамсыз, білмесеңіз таза, көрмесеңіз еркін адамсыз, кешірім арылудың, парасат әр дүниені орынына қоюдың белгісі дүр. Әрқандай жойдақсыз адам, әрбір келеңсіз іске душар болғанда осы «Үш маусым» оқиғасын есіңізге түсірсеңіз, оның істеген ісін ойлаңыз, дәл сол сәтте сіздің көңіл-күйіңіз орнығады. Бұл әлем «үш маусымды адамдардан» аяқ алып жүргісіз екенін ұмытпаңыз.
Аударған: Мейіржан Әуелханұлы
«Жаңғыру – өткеннен қол үзіп, тек жаңа құндылықтарға жол ашу деген сөз емес. Шын мәнінде бұл – ұлттық мұраларымызды бүгінгі оң үрдістермен үйлестіре дамытуды көздейтін құбылыс. Бұл ретте, біз Абайды айналып өте алмаймыз. Себебі, ұлы ойшыл осыдан бір ғасырдан астам уақыт бұрын ұлтты жаңғыруға, жаңаруға, жаңа өмірге бейім болуға шақырған» дейді Ел Президенті Қасым-Жомарт Тоқаев өзінің «Абай және ХХІ ғасырдағы Қазақстан» атты мақаласында. Әлбетте, Абай – халқымыздың мақтанышы ғана емес, біздің ұлттық ұранымыз, ұлттық идеологиямыз, оның өлмес мұрасын алдымен өзіміз танып, сосын әлемге таныту – біздің ғұмырлық парызымыз.
Шындығында, Абайдың туғанына 175 жыл уақыт өтсе де, оның еңбектері халық жадында сайрап, оған нұрлы өмірге жол көрсетіп тұр.
Абай есімі мәңгі ұмытылмайды. Абай ілімдері бір ғасырдан аса уақыт бойы өсіп-өніп, ұлттық әдебиетімізді, мәдениетімізді, бүкіл рухани өмірімізді көркейтуде. Абайдың тамаша дәстүрлері қазір жаңа мазмұнға ие болып, кейінгі толқынға өнеге болып, ілгері дамытуы арқылы толысып келеді.
Қай халықтың болмасын мақтан тұтар асылдары мен ардақтылары аз болмаған. Қазақ халқының тарихында да ойшыл, кемеңгер ұлт мақтанышына айналған небір биік тұлғалар өткен. Сондай шоқтықты шоғырдың арасынан Абай есімі, Абай тұлғасы айрықша дараланып тұратыны анық. Көрнекті қазақ ақыны Мұзафар Әлімбаев: «Абайы бар елдің бақ-талайы бар, Абайсыз бізді өзгелер қалай ұғар?!» – деген сөзі-ақ халқымыздың маңдайындағы күні, таңдайындағы үні болған теңіздей терең данышпан бабамыздың керемет құдіретін жеткізіп тұрғандай. Біртуар қайталанбас тұлғаның ойға сыймас, қыр-сыры мол дүние. Абай – ұлттық мәдениетіміз бен тарихымыздағы ерекше, шын мәніндегі жаңашыл тұлға. Абай қамтымаған сала (тақырып) жоқ сияқты. Поэзия, өнер, философия, дін, тарих, музыка, этика, педагогика т.б салалар. Абайды әлемге танытқан заманымыздың заңғар жазушысы М.Әуезов: «Абай – дария. Мен одан шөмішпен қалқып алдым» – деген болатын әйгілі «Абай жолы» романының жазылуы туралы. Сондай дариядан барынша сусындаған жастан болашақта үлкен үміт күтуге болады. Демек, жастарды тәрбиелейтін әрбір орындарда ұлы ақын мұраларын оқып-үйреніп, оны басшылыққа алып отыру маңызды. Міне, осындай баға жетпес Абай мұрасын, Абай сөзін өрелі салт-санамызды қалыптастыруда, әсіресе, кітапханаларда, мектептерде, басқа да жерлерде маңызы зор.
«Көкірегі сезімді тілі орамды,
Жаздым үлгі жастарға бермек үшін» – деп Абай атамыз мақсат еткендей, «Бір ел – бір кітап» акциясы аясында да биылғы жылға көпшіліктің оқуы үшін М.Әуезовтың «Абай жолы» роман-эпопеясы түсіп отыр. Кітап – ұрпақтарға әсер етуші құдіретті құрал. Осы құралдың күші арқылы Абайдың әр жанрдағы шығармасы жастардың, жасөспірімдердің бойына ізгілік, адамгершілік, сұлулық сияқты асыл қасиеттерін қалыптастырады. Сондай-ақ бүгінгі қазақ кім? Мұны тану үшін кешегі қазақты білу шарт. «Тамыры жоқ ағаш, тарихы жоқ халық болмайды». Әуезов өзінің төрт томдық «Абай жолы» арқылы күллі әлемге, керек десеңіз тіпті, қазақтардың өзіне қазақ дегеннің кім екенін танытты.
Қорыта келе, Абайды тану арқылы біз өз болмысымызды танып, болашағымызды бағдарлаймыз. Бүгінде Абай есімі жеткілікті деңгейде ұлықталып жатыр. Бірақ оның шығармаларымен жаңғыру деңгейіне әлі жете қоймадық. Міне, осыны мақсат еткен Президентіміз Қасым-Жомарт Кемелұлының «Абай және ХХІ ғасырдағы Қазақстан» атты мақаласы рухани кемелденуіміздің кілті болды.
ХХІ ғасырда кез келген қоғамның парқын, түптеп келгенде, адам сапасымен өлшеу үрдісі бірінші орынға шығып отыр. Бұл ретте Абай армандаған «Бүтін адам», Абай көксеген «Толық адам» тұжырымдамасы ең озық идея ретінде бүгінгі зерделі оқырманды да бей-жай қалдырмайды. Данагөй ақынның терең ойлары мен асыл сөздері, өлеңдері мен қара сөзері қай заманда болмасын жақұттай жарқырап, көкіректерге нұр болып құйыла берері хақ. Оның мұрасы жаңа ұрпақпен бірге жасай береді.
Г.САУРЫҚОВА,
аудандық кітапхана қызметкері
Гүл қуанышы мен тас қайғысы
Ерте көктемде енді-енді жіпси бастаған жердің төсін түртіп оятып, әдемі бір гүл өсіп шықты.
– Бұл жерде қандай тамаша! – деді төңірегіне тамсана көз тастаған гүл. – Ауасы қандай тап-таза!
– Миллион жылдан бері осы көрініс, – деді терең күрсінген тас, жылда-жылда қайталана береді. Іш пыстыратыны соншалық, жарылып кете жаздайсың.
Өмірің қызықты болсын десең, дүниеге сәби көзімен қарап үйрен.
***
Саусақ
Сырқат дәрігерге мұңын шағып отыр:
– Шамасы, ұзамай өлетін шығармын... Саусағыммен қай жерімді түртіп қалмайын, сырқырап қоя береді.
Ауруды тексеріп көрген дәрігердің әңгімесі:
– Әрине, солай болады. Өйткені саусағыңыз сынған ғой.
Бар болғаны саусағыңыз сынғанмен, біздің өзімізді өліп қалатындай сезінетін кездеріміз аз емес. Дұрысы сабырдан айырылмаған.
***
Жол беріңіз!
Кезінде газет беттерінде жазылған, өмірде болған оқиға.
Америка Құрама Штаттарының флоты Канада жағалауындағы суларда әскери-теңіз жаттығуларын өткізіп жатқанда, радио торабында мынандай әңгіме болады:
– Соқтығысып қалмас үшін бағытыңызды 15 градус солтүстікке қарай өзгертуіңізді сұраймыз.
– Жоқ, соқтығысып қалмас үшін сіздердің оңтүстікке 15 градус бұрылғандарыңыз жөн болады.
– Керісінше, соқтығысып қалмас үшін сіздер солтүстікке бұрылуға тиіссіздер.
– Бұл – Америка Құрама Штаттары әскери кемесінің капитаны. Тағы да қайталаймын, бағытыңызды өзгертіңіз.
– Ал біз – Канада жағалауындағы шамшырақпыз (маяк). Яғни, бәрібір сіздердің бағыттарыңызды өзгерткендеріңіз дұрыс болмақ.
Кейде шамшыраққа соқтығысып қалмас үшін босқа дауласпаған дұрыс және жіті қимылдаған жөн.
***
Күнәһар
Екі монах ағысы қатты өзеннен өткелі жатады. Бұлардың тізеге дейін түрініп, енді дайындала бергені сол еді, бағанадан бері өзен жағалап жүрген әдемі қыз бұларға жақындайды. Өзеннен өтейін десе қорқып тұрғанын айтып, көмек берулерін өтінеді.
Монахтардың бірі үндемеген қалпы бойжеткенді иығына отырғызады да өзеннің арғы бетіне алып өтеді.
Бұған екінші монах қатты ашуланған. Ештеңе демегенмен іші алай-түлей бұрқасын болып жатыр еді. Олар монастырға жақындағанда, ашулы монах серігіне бұрылып былай дейді:
– Бұлай етуге тыйым салынған. Сенің бұлай әрекет етпеуің керек еді. Мен бұның бәрін монастыр басшылығына айтуға тиіспін.
Бірінші монах таң қала сұрайды:
– Не жайлы айтып тұрсың? Неге тыйым салынған?
– Сен өзеннен әдемі бойжеткенді иығыңа отырғызып алып өткеніңді ұмытып қалдың ба?
Бірінші монах күліп жібереді де, былай деп жауап қатты.
– Мен оны бір-ақ минутта алып өттім. Ал, сен болсаң әлі көтеріп келе жатырсың.
Адам өзгеден алдымен өзінде барды көреді. Сондай-ақ, қазақта «Әркім өз ойынан хабар береді» деген де сөз бар.
***
Патша мен данышпан
Падишах бірде кеңесшісі Бірбалдың қаншалықты данышпан екендігін тексеріп көргісі келеді де, жерге таяқшамен сызық сызады. Сосын не қысқартпай, не өшірмей қысқартуға бұйырады.
Сонда Бірбал падишах сызығының жанына одан да үлкен етіп тағы бір сызық сызыпты.
– Мінеки, әлемнің әміршісі! Енді сіздің сызығыңыз кішірейіп қалды, – депті миығынан күле жымиып.
Өмірде де осылай. Егер мықтының қасына одан да мықты біреу келетін болса, бәрі де өзгеріп шыға келеді. Қазақ мұны «Өзіңнен зор шықса, екі көзің сонда шығар», – дейді.
***
Бәрі өзіңнің қолыңда
Ертеде бір топ шәкірті бар ғұлама өмір сүріпті. Өмір бәсекесіз бола ма, осы шәкірттерінің бірі ұстазы жауап бере алмайтын сауал тауып қоюды армандапты. Сол үшін бірде қырға шығып, көбелек ұстап алады да, оны алақанына жасырған қалпы ұстазының алдына келеді:
- Ұстаз, айтыңызшы: менің қолымдағы тірі көбелек пе, өлі көбелек пе?
Шәкірт ұстаз жауабына орай көбелекті өлтіріп не ұшырып жіберуге даяр еді. Өлі десе ұшырып, тірі десе бір сығып өлтіре салмақ. Әйтеуір, өз айтары ақиқат болып шықса болды...
Шәкіртіне назар да салмаған Ұстаз сонда былай деп жауап беріпті:
- Бәрі сенің қолыңда.
Егер ақиқаттың ақиқат болмағы тек саған байланысты болса, бұл ақиқат емес.
Дереккөз: Abai.kz