Қысылтаяң уақытта бір жағадан бас, бір жеңнен қол шығарып, бір-бірімізге қолдау көрсетудің маңызы зор. Әрқайсымыздың кісілігіміз де, кішілігіміз де осындайда сыналады емес пе?!
Жаһанды жаулаған жаман дертпен күресте кез келгеніміз ерлік жасай аламыз. Оның ең қарапайымы – карантин уақытында үйде отырып, тәртіпке бағыну болса, мүмкіндігімізге қарай көпшілікке көмек беруіміз де ерлікпен пара-пар әрекет. Бетперде тігіп, әлеуметтік жағдайы төмен отбасыларына, қарттар үйі мен балалар үйіне таратып жатқан жандар туралы жазып жатырмыз. Ауданымыздағы ерікті жастардың қайырымдылық шараларын ұйымдастырып, тұрмысы төмен отбасыларына азық-түлік жеткізіп беріп, алғысын алып жатқандарынан да хабардарсыздар.
Осындай тағы бір айқын мысалды «Айдарбаев» шаруа қожалығының иесі Ерік Айдарбаев көрсетті. Өз қызметкерлері – 250 адамға, оның ішінде әлеуметтік жағдайы төмен 27 отбасына 3 млн 735 мың теңгеге азық-түлік алып, теңдей таратты. Бір-бір қаптан ұн, күріш пен қантын үлестірген Ерік Айдарбаевтың бұл ісі өзге де кәсіпкерлерге үлгі болса игі.
Абай атамыз айтпақшы, «Біріңді, қазақ, бірің дос, көрмесең істің бәрі бос».
Құралай МҰРАТҚЫЗЫ
Коронавирус індетінің таралуына байланысты елде төтенше жағдай жарияланғаны белгілі. Бұл індеттің сырқат адамның түшкіруі не жөтелуі арқылы жұғатындығы айтылса, бетперденің бұл індетпен күресте маңызы арта түсуде. Осыған орай, аудан дәріханаларын аралап, бетперденің бары не жоғы және бағасын білмекке ұмтылған едік.
Респираторлы маскалар 1200 теңге делінсе, қарапайым маска 1000 теңге деді Түрген ауылындағы дәріханалардың бірі. Қарапайым маска Алматы қаласынан жеткізілетіндіктен қазір жоқтың қасы. Ал Алматы қаласы төтенше жағдай жариялануаны байланысты жабық. Сол себепті маска тапшылығы орнап, ал бар масканың бағасы шарықтап кеткен. Осы орайда айта кеткен жөн, коронавирус ауруын жұқтырған адамдар саны 5 328 адамға жеткен, оның 32-сі қайтыс болған Оңтүстік Корея елі масканың бағасын 1 долларға дейін төмендеткен. Бұрындары бағасы 1 доллардан жоғары болған. Осындай қиын-қыстау кезең кәсіпкерлердің халыққа болысып, ең алғы қорғаныс құралы масканы қымбаттату орнына арзандату жолын қарастыруы қажеттігін білдірсе керек. Осыған орай, жақында жауапты министрлік тарапынан бетпердеге шекті баға қойылды. Масканың құны 87 теңгеден аспауы тиіс. Жақында жаңалықтардан Ақтөбе қаласының тұрғыны, 10 сынып оқушысы Әділет Амангелдиевтің әпкесі тіккен маскаларды қала көшелерін аралап жүріп тегін таратқаны туралы ақпарат тарады. Жанашыр жан масканы 70 адамға таратқан.
Мұндай мысалдар жетерлік. Қытайдың Ухань қаласында індеттің таралуы кезінде тұрғындардың барлығына маска тағу және медициналық қолғап кию міндеттелді. Ал егер маскасыз және қолғапсыз көше кезген тұрғын анықталса қатаң жазаланды. Осылай олар Ухань қаласында коронавирус ауруын түбегейлі жойғанын мәлімдеді.
Сондай-ақ, қарапайым халық үшін маска қорғану құралына айналса, кәсіпкерлер үшін пайданың көзі. Ал жалпы, масканы сатып алмай-ақ, оны қолдан жасап алудың түрлі тәсілдері көрсетілуде. Мысалға қарапайым дәкені бірнеше қабаттап, кәдімгі масканың формасы іспетті етіп тігіп алуға болады. Қанша қабат қылсаңыз да өз еркіңіз. Неғұрлым қалың болса, соғұрлым пайдалы.
Әділет САРЫБАЙ
***
Қазақта «Иттің боғы дәрі болса, дәрияға тышады» деген сөз бар. Дөрекілеу болса да, дөп айтылған сөз. Коронавирус басталғалы бері кезінде қаптап тұрған талай затты бүгінде емге таппайсыз. Ал одан бірталай мәселе туындайтыны айтпаса да түсінікті. Соның бірі – маска мәселесі.
Эпидемия пайда болғалы бері масканың қаны жерге тимей тұр. Ең әуелі, екі-ақ сағатқа жарайтын бір рет пайдалануға ғана болатын түрлерінің өзі тапшы. Дәріханалардан табу қиын, болса да бұрынғы өз құнынан бірнеше есе қымбат. Десе де, осы бағаның өзіне табылғанына қуанатын жағдайға жеттік.
Бұл мәселе «жоғарыға» да жетіп, жалпы қоғамдық сипат алды. Қазақстан Президенті Қасым-Жомарт Тоқаевтың өзі елімізде әлі күнге дейін тиісті көлемде бетперделердің жетіспейтіндігін ресми мәлімдеді.
Мемлекет басшысы халықты бетперделермен жедел қамтамасыз етуді талап етіп, еліміздің барлық азаматтарын үнемі антисептиктерді пайдалануға және бетперде тағуға шақырды. Сонымен бірге, барлық қалалардағы негізгі көшелерде азаматтарға тегін маска таратылуына жағдай жасауға шақырды әрі бұл Үкіметтің алдында тұрған аса жедел әрі шұғыл міндет екендігін атап өтті.
Соңғы кездері ауданымыздағы дәріханаларда маска мен керекті препараттардың жетіспеушілігі байқалуда. «Мен маска іздеп бірнеше дәріханаға кіріп шықтым. Бірақ бірде біреуінде маска жоқ. Алдын-ала сатылып кеткен. Маска дәріханаларда болмаса да алыпсатарлардан табуға болады. Тек бағасы өте қымбат. Бұрынғы 40 теңгелік маскалар 150-200 теңге көлемінде сатылуда»,– дейді аудан тұрғыны А.Таңжарық. Оның пікірін тағы бірнеше азамат қолдап шықты. Олардың сөзінше масканы қолдан тігіп сатып жатқандар да бар екен.
Соңғы кездері ел билігі маска мәселесін шешуге барынша күш салып жатқаны байқалады. Бұл жағынан алаңдаудың қажетсіз екені де айтылуда. Алдағы күндері масканың жетіспеушілігі өз шешімін тауып, барлығы ойдағыдай болатынына халықты сендіруде.
Н.Тілеуқабыл
Соңғы кездері коронавирус немесе карантин деген сөздерді жиі естіп жүргеніміз рас. Көршіміз Қытайда басталып, бізді ғана емес барша әлемді тітіреткен бұл аурудың алдын алу үшін не істелмей жатыр десеңші! Сонау Италия, Иран секілді елдердегі жағдайды көзбен көрмесек те естігеннен-ақ тіземіз дірілдейтіні де шындық. Бұл тажал біздің еліміздің де шекарасынан аттап, соның әсерін бәріміз сезініп жатқанымыз мәлім. Десе де осы екі сөздің қатарына тағы бір сөз қосылды. Ол – қымбатшылық.
Жығылғанның үстіне жұдырық болып мұнай арзандап, доллар көтеріліп есіміз шығып жатқанда коронавирус та ел аумағына кіріп үлгерді. Енді осы алапаттың алдын алу үшін билік барынша қатаң шаралар қабылдауға мәжбүр болды. Ол үшін вирустың таралу жолдарына тосқауыл қоюдың амалдарын жасауға көшу керек. Міне соның бірі – Алматы, Нұр-Сұлтан қалаларына кіріп-шығуға шектеу қойылып, басқа аймақтардан оқшаулануы. Яғни, карантинге жабу. Оның қатарында адамдардың топталуына тыйым салынып, кей объектілердің жабылуы да кәсіпкерлерге оңай тимесі анық.
Осындай кезде жалпы халықтың қажетті заттар мен азық-түліктерді жаппай сатып алуы белең алатыны белгілі нәрсе. Ал жаппай сатып алудың ақыры кейбір қажетті тауарлардың жетіспеушілігін тудырады. Осының кесірінен ол тауарлардың да бағасы жоғарылайды. Әсіресе азық-түлік пен дәрі-дәрмектерге сұраныс артқан сайын, тиісінше құны да жоғары бола түспек. Мұның ең тиімсіз жағы бұрынғы еңбек етіп, табыс тауып жүргендердің қатары азайып, халықтың дені тек тұтынушыға айналатындығы. Әрине, бұл жағдай көпке созылмайды, десек те экономикаға әсер етпей қоймайды.
Жоғарыдағы аталғандардың барлығы қымбатшылықтың пайда болуына жеткілікті себеп екені рас. Дегенмен олар мәңгілік емес, уақытша ғана құбылыстар. Уақыты келгенде мұнайға сұраныс артып еліміздің жағдайы жақсарып, еңсесі тіктелер. Міне, сол кезде теңге де өз құнын жоғарылатып, құнды валюталардың біріне айналар. Ал әлемді шарпыған коронавирустың да емі табылып, кезіндегі оба, сүзек, шешек секілді тарихтың қойнауында қалар. Әрине, оның бәрі мүмкін нәрсе. Мұндағы қымбатшылықтың басты қозғаушы күші әрі тарих басталғалы бері өмір сүріп келе жатқан кесірлі нәрсе – атың өшкір ашкөздік пен ынсапсыздық. Онсызда кезі келгенде опырып қалуды ойлайтын құлқынның құлдары қай кезде де болғанын жақсы білеміз.
Нарықтық экономика деп аталатын капиталистік қоғамда бағаны базар нарқы реттейді әрі әркім өзі қалаған бағасын қоюға құқылы. Ашкөздік билеген пенделер 10 теңге тұратын затты үшін 100, тіпті 1000 теңге сұраудан ауыздары қисаймайды. Еш себепсіз бағаның уақыт өткен сайын аспандап өсуінің басты, негізгі және бірден-бір себебі де, міне, осы. Осындай еліміз жан-жақты қыспақта тұрған кезеңде базарға барып аралап қайтсаңыз ашкөздіктің көкесін бойына сіңірген пенделердің түр-түрін көрер едіңіз. Егер бұл қылығының себебін білмек болсаңыз доллардың көтерілгенін сылтауратар немесе басқа бір уәж айтар. Әйтеуір, өз істерін ақтап алары анық. Бүгінде қат болып тұрған азық-түліктер мен дәрі-дәрмектердің бағасының аспандап кетуінің астарында да осы бақай есеп жатыр. Яғни, біреудің қиындығынан пайда тауып, тәуелділігінен теңге жасау. Өзі не істерін білмей тұрған бейбаққа көмектесіп, жол сілтеудің орнына қалтасын қағуға дайын тұрған пайдакүнемдерді көргенде таң қалмасқа шараң жоқ.
Кезінде О.Сүлейменов «Адамға табын, жер енді» деп асқақ жыр жазды. Адам барша әлемді, табиғатты билейтін нағыз құдай да, құдайдан былай да емес тіршілік иесі дегенге бәріміз құлай сендік. Бірақ сол адам атты екі аяқты саналы пенде қазір нарық деп аталатын монстрдың табанының астында жан даусы шығып «ойбайлап» жатыр. Бес-алты жылда бір қайталанып отыратын ұстамалы ауру сияқты «дағдарыс» деген кесапат адамзатты табанына салып, әбден илейді. Оған қарсы қолданар шарасы жоқ, бейшара пенделер көкала қойдай болып таяқ жегеннен басқаға қауқарсыз.
2008-2009 жылдардағы әлемдік қаржы дағдарысында есеңгіреген біраз елдер әлі күнге содан естерін жия алмай отыр. Алпауыт АҚШ-тың өзін дағдарыс шаңырағын шайқалтып, біраз әбігерге түсірді.
Иә, ашкөздік – айықпас ауру. Барлығы өз басымен қайғы болып жатқанда қалтасының қамын ойлайтындардың қатары аз емес. Тіптен осыны пайдаланып ұрлық-қарлық, тонаушылық істейтін арсыздарда арасында төбе көрсетіп жатады. Қашанда қиындық пен сынақ барлық халықтардың басында болған. Тек намысы мен адалдығын алға қойып, ынсабы мен нәпсісін жеңе білгендер ғана ол қиындықтан аман-сау шыққанын қарт тарих талай дәлелдеген. Ендеше осы сынақтан да ашкөздіктің аранына жұтылмай, әділеттің ақ туын желбіреткенде ғана аман өте аларымыз анық.
Нұрсерік ТІЛЕУҚАБЫЛ
Коронавирус инфекциясының таралуын болдырмау және оқшаулау шараларын күшейту мақсатында еліміздегі Халыққа қызмет көрсету орталықтарының жұмысы уақытша тоқтады. Мұндай тапсырманы Мемлекет басшысы Қасым-Жомарт Тоқаев берген болатын.
Бүгінгі таңда қазақстандықтарға мемлекеттік қызметтердің 80% «электрондық үкімет» порталы арқылы қолжетімді, сондай-ақ қажетті анықтамаларды eGov Mobile мобильдік қосымшасы және Telegram-дағы egovkzbot2.0 боты арқылы алуға болады.
ХҚО-ның тәжірибелі және арнайы оқудан өткен 1800-ден астам қызметкері, соның ішінде Алматы филиалының 50 қызметкері «1414» байланыс орталығының кеңес берушілерімен бірге азаматтарға мемлекеттік қызметтерді онлайн түрде алу бойынша көмек көрсететін болады.
Бір уақытта байланыс орталығының мамандары мыңнан астам азаматқа кеңес бере алады деп жоспарлануда. Байланыс орталықтары дүйсенбіден сенбіге дейін таңғы 9.00-ден кешкі 20.00-ге дейін жұмыс істейді. Қоңырау шалу тегін.
Бұдан бөлек, «Азаматтарға арналған үкіметтің» 200-ден астам қызметкері, оның ішінде Алматы қаласы филиалының 30 маманы бейнеқоңырау арқылы қызмет алушыларды мобильдік азаматтар базасында тіркейтін болады.
Сонымен қатар, Алматы филиалының 50 маманы қашықтан жұмыс істеп, азаматтарға ұялы телефон арқылы онлайн қызмет алуға көмектеседі. Бұл ретте, 21 наурызға дейін өтініш беріп үлгерген азаматтар қызметтердің дайын нәтижесін өзі өтініш берген ХҚО-ның құжат беру секторынан алып кете алады.
Көлікті қайта тіркеген немесе жүргізуші куәлігін онлайн түрде ауыстырған автокөлік иелері дайын құжаттар мен нөмірлерді өз қалаларындағы мамандандырылған ХҚО-дан ала алады, дайын құжаттарды беру терезесі жұмыс істейді.
Дайын құжаттарды беру терезелерінің жұмыс тәртібі: дүйсенбі-жұма 9.00-ден 17.00-ге дейін, сенбі сағат 9.00-ден 14.00-ге дейін.
«Азаматтарға арналған үкімет» қазақстандықтарға барлық санитарлық талаптарды орындап, үйден шықпауға кеңес береді және керекті мемлекеттік қызметтерді онлайн алуға шақырады.
Коронавирусқа байланысты елімізде төтенше жағдай жарияланғалы кейбір сауда орындарында тұрғындардың күнделікті тұтынатын азық-түлігінің бағасы көтеріліп, Мемлекет басшысы бағаны тұрақтандыру бойынша жергілікті атқарушы органдарға нақты тапсырмалар берген болатын.
Жасыратыны жоқ, халықтың басына түскен қиындық кезінде пайданы ойлап, тауарлардың бағасын шарықтатып жіберетін саудагерлер бар. Осындай кәсіпкерлердің негізсіз әрекеттеріне тосқауыл қою мақсатында аудан әкімдігі, Есік қаласы мен ауылдық округ әкімдерімен бірлесіп күн сайын әлеуметтік маңызы бар азық-түлік тауарларының бағасына мониторинг жүргізілуде.
Аудан әкімдігінің мәліметтеріне сүйенсек, зерттеу нәтижелері көрсеткендей, азық-түлік өнімдерінің негізгі түрлерінің бағалары базарларда 2020 жылдың басымен салыстырғанда 4-5 пайызға өскен. Бағаның өсуі негізінен көкөністерде байқалады, орташа алғанда 13,7 пайыз.
Негізінен, көкеністердің бағасы «құбылмалы» болып табылады, яғни маусымға байланысты өзгеріп отырады. Сондай-ақ, азық-түлік тауарларының бағасы Алматы қаласының жеткізушілері белгілеген бағасына тікелей байланысты. Әлеуметтік маңызы бар азық-түлік тауарларының көпшілігі ауданнан тыс жерде өндірілетіндіктен және сырттан жеткізілгендіктен, жоғарыда көрсетілген тауарлардың бағасы өсуі мүмкін.
Әлеуметтік маңызы бар азық-түлік тауарларына бағаның өсуін тежеу мақсатында аудан әкімдігі, қала және округтері әкімдіктерімен бірлесіп, ауданның дүкендері мен наубайханалары арасында 161 меморандум жасалды. Меморандумның мақсаты – әлеуметтік маңызы бар азық-түлік тауарларына (10 пайыздан артық емес), 1 сұрыпты бидай ұнынан пісірілген нанға (5-6 пайыздан артық емес) ең төменгі сауда үстеме бағасы бойынша сату.
Сонымен қатар, аудан әкімдігі, «Жетісу» ӘККӨДИ» АҚ және наубайханалар арасында арзандатылған ұн сатып алуға, нанның бағасын 90 теңгеде ұстап тұру үшін үш жақты меморандумдар жасалды.
Мониторинг нәтижесінде өткен демалыс күндері ауданның супермаркеттері мен базарларында дүрлікпе байқалғаны анықталды. Төтенше жағдайға байланысты абдыраған тұрғындар азық-түлік тауарларын ірі көлемде сатып алуға көшкен. Нәтижесінде, бұл бағаның өсуіне әкеп соқтырды.
Соның өзінде сауда нүктелерінің сөрелерінде әлеуметтік маңызы бар тауарлардың тапшылығы байқалмады. Алайда, тұрғындар базарларда азық-түлік бағасының қымбаттап жатқандығын айтып шағымдануда. Осыған орай, осы аптаның басында біз де сауда орындарына барып, баға тұрақтылығын байқап қайтқан болатынбыз. Бүгінде тұрмысқа ең қажетті ұнның 50 кг қалтасы 8500 теңгеден саудалануда. Ең қажетті бұл тауар төтенше жағдайға дейін 7000 теңгенің көлемінде болған. Картоп пен сәбіз бағасы 180-200 теңгеге дейін көтерілген, яғни, 60-70 пайызға қымбаттаған. 180 теңге болған қанттың килограмы 260 теңгеден саудалануда, күріш 300 тг. Бұрындары 370 теңге болған күнбағыс майының литрі 100-120 теңгеге қымбаттап, 500 теңгеден сатылуда.
Өткен аптада карантинге жабылған Нұр-Сұлтан қаласында бір адамға сатылатын тауардың көлемі белгіленген болатын. Яғни, бір адамға 5 кг ұн, қант пен күріш, 5 литр күнбағыс майы ғана сатылады деп шектеу қойған болатын Елорда әкімдігі. Бұл, әрине, бағаны тұрақтандырып, азық-түлік қорының тапшылығын тудырмас үшін жасалған қадам. Алайда, аудан аумағында мұндай шектеу жоқ, сонымен қатар, азық-түлік пен тұрмысқа қажетті тауарлар базар мен сауда орындарында жеткілікті.
– Бүгінде біз ең қажетті деген 19 тауардың бағасын қадағалап отырмыз. Алайда, біздің кәсіпкерлер тауарларды негізінен Алматы қаласынан жеткізгендіктен, ол жақта бағаны көтеруі мүмкін. Сәйкесінше, бізде де бағалар өседі. Ал негізсіз тауар бағасын көтерген сауда орындарының иелері әкімшілік жауапкершлікке тартылады. Бұл бойынша жергілікті әкімдіктер күн сайын жұмыс жасап, мониторинг жүргізіп отыр. Егер аудан тұрғындары бағаның негізсіз көтерілу фактілерін анықтаса, жергілікті әкімдікке жүгінуіне болады – дейді кәсіпкерлік бөлімінің басшысы Нұрболат Серғали.
Сонымен қатар, елде төтенше жағдайдың енгізілуіне байланысты ауданның базарлары, азық-түлік желілері мен азық-түлік дүкендері санитарлық және дезинфинкциялық шараларды күшейте отырып, әдеттегі режимде жұмыс істейтін болады.
Сардарбек НҰРАДИН
Жақында Қырбалтабай мәдениет үйінде өнерлі балалардың жұлдызын жағу, жасөспірімдерге шығармашылық шабыт сыйлау мақсатында балалар мен жасөспірімдер және оқушылар арасында 3-республикалық «Ұлы Дала Ұрпағы» атты байқауы өтті.
Байқауда вокал, хореография, аспапта ойнау, бейнелеу өнері, қолөнер, көркем сөз өнері, ғылыми жоба жанрлары бойынша өнерпаздар сайысқа түсті. Қазылар алқасына үздікті бағалау да оңай болмады. Қатысушылардың орындаушылық шеберлігі, сахналық киімі, би қозғалысының ритмикасы, сахнада өзін-өзі еркін ұстау мәдениеті өте жарасымды болды. Десе де, ерекше дауыс мәнерімен, жұлдыздай жарқыраған Қырбалтабай ауылдық округі Ы.Алтынсарин атындағы орта мектебінің мұғалімі Ләйлә Базалиеваның жетекшілігімен көркемсөз сайысынан 4 сынып оқушылары Дарын Қайраннас және Кәусар Жанболатқызы 1 орынды қанжығасына байлады. Сонымен қатар, вокалдан жез таңдай әншілер Диас пен Мирас Бақытбекұлдары «Күрең күз» әнімен бас жүлдеге ие болып, көрермен қауымды бір серпілтті.Байқауда сахнаға алғаш қадам басып, болашағынан үлкен үміт күттірер кішкентай өнерпаздар да болды.
Ұлан ОРАЗБАЙ,
Қырбалтабай мәдениет үйінің көркемдік жетекшісі
В нынешнюю «рыночную» эпоху гуманитарные учреждения и организации, в которых царит бескорыстное гостеприимство – редчайший пример того, что истинные ценности не измеряются деньгами. Доброта, дружелюбие и сердечное отношение даются даром и принимаются только как дар. Таким очагом культуры и подлинной духовности можно смело назвать районную библиотеку. Ее маленький, но сплоченный коллектив замечательных женщин несет на себе подвижнический труд книжного просвещения.
Постоянной формой такой просветительной деятельности служат встречи библиотекарей с читательской аудиторией. Недавно состоявшийся «Бенефис читателя», который провели директор библиотеки Гульнар Жандосова, библиотекари Сания Азизова, Галина Свининникова, Ляззат Талипова, методист Гулия Саурыкова, стал маленьким культурным «форумом», на который собрались преданные книге есикчане, жители сельских округов всех возрастов и интересов. Лейтмотивом встречи была мысль, что «золотым фондом» библиотеки являются ее читатели. Ведущая Сания Азизова объявила победителей в десяти читательских номинациях: почетный читатель, читательская семья, лидер читального зала, многогранный читатель, самый юный читатель, самый эрудированный читатель, любитель поэзии, знаток истории, леди-детектив, большой читательский стаж. И каждому книголюбу-номинанту Ляззат Талипова от имени библиотеки вручила памятный подарок. Задушевные пожелания друг другу, воспоминания, даже стихи и песни звучали в течение всей встречи.
Богатый и разнообразный, постоянно пополняемый изданиями на государственном языке фонд, насчитывающий 87 тысяч книг, приветливое отношение к посетителям, добросовестное обслуживание, уют и порядок ведут к тому, что в библиотеку «не зарастет народная тропа», поддерживается и развивается любовь к чтению у молодежи. Сюда приходят и пенсионеры, и ученики начальной школы. И для всех библиотекари находят нужные книги и добрые слова.
И.ВИКТОРОВ
Әр халықтың тек өзіне тән салт-дәстүрлері мен жоралғылары болады. Оның көбі кезінде бір жақсы бастамадан не тіршілікке қажеттіліктен туындаса, бүгінде көбісінің шығу себебі ұмытылып, тіптен, қолданыстан да шығып қалған. Заман жаңарған сайын салт-дәстүрлердің де ескіруі заңдылық. Десе де, кейбір ұмытыла бастаған дәстүрлерімізді қайта жағыртсақ, одан ұтпасақ, ұтыла қоймаймыз. Қазіргі кезеңде салт-дәстүрлеріміздің кейбірі халық арасында әлі де кеңінен пайдаланылып жүр. Мәселен, айдар тағу, қонақ кәде, асар т.б. жоралғылар бізге таныс. Ал кейбірі ұмыт қалып барады. Әсіресе, жастарымыз біле бермейтін салт-дәстүрлеріміз жетерлік. Сол себепті оларды біле жүру, кей-кейде өмірде іске асыру да артық етпес.
Ақсарбас атау. Қауіп-қатерге ұшырағанында «А, Құдайым оңдасын! Мені осы қиындықтан құтқара гөр! Ақсарбас!» деп құдайы мал атайтын болған. Мұндай жағдайда «Ақсарбас!» деп үш рет айқайлаған. Сосын қауіп-қатерден аман қалғанында әлгі адам ауыл аймағын шақырып, құдайы тамақ берген. Ақсарбасқа шалынатын мал ретінде қойдың бозқасқасын, жылқының көкқасқасын, сиырдың қызыл қасқасын құрбандық ретінде атаған. Басты шарты адам ақсарбас атағанда қай малын айтса, сол малын міндетті түрде союы тиіс.
Асату. Дастарқан басында ет жеп отырғандар тоғая бастағанда, төрде отырған ақсақал қалған етті қолымен қонақтарға, жас балаларға асатады. Бұрындары ауыл балалары ет асаймыз деп қонақ келген үйдің қасында жүретін болған. Әрине, мұндағы басты мақсат – етке тою емес, керісінше құрметті адамның қолынан дәм тату. Бір жағынан қадірлі мейманға деген құрметтің белгісі іспеттес.
Ат тұлдау. Ер адам қайтыс болғанда мініп жүрген атының жал-құйрығын күзеп, оны бос жібереді де, өлген адамның жылында сол атты әкеліп сояды.
Аунату. Қазақтар үйіне келіп қонақ болған, қонып кеткен адамдардың отырған, жатқан жеріне «баламыз осы атасына тартсын, бойына осы атасының қасиеттері қонсын» деп балаларын аунатып алатын болған. Елге, ағайынға сыйлы азамат кіндік қаны тамған туған жеріне келгенде халық, туған-туыстары, дос-жарандары оны сол жердің топырағына аунатып алған. Шыңғыс Айтматов үйіне Мұхтар Әуезов келгенінде, ол отырған орындыққа ұлын аунатып алған көрінеді.
Аяғына жығылу. Кешірім сұраудың ең үлкен, кішіреюдің ең ауыр түрі – осы ғұрып. Оны орындағанда айыпты адам жанына абыройлы, қадірлі кісілерді ертіп алып, тисті адамның үйіне рұқсат сұрап кіріп, кешірім сұрайды. Айыбы үлкен болса, айыпкер өзі кінәлі болған адамның аяғына жығылып, оны құшақтаған қалпы жылап, кешірім сұрап, жалынған. «Аяғына жығылу» – әрі ғұрып, әрі жазаның бір түрі. Мұндайда аталарымыз «Алдыңа келсе атаңның құнын кеш» дейтін. Басты мақсат ауылдың амандығын, елдің тыныштығын, халықтың берекесін сақтау.
Байғазы беру. Үлкеннің кішіге, яғни балаға беретін сыйы. Жас ұл-қыз, бойжеткен, бозбала жаңа киім кигенде, жаңа зат алғанда аға, апа, ата-әжесінен, туған-туыстарынан оған байғазы сұрайды. Олар байғазыға ақша, мал, мүлік, әйтеуір бір зат беріп, құтты болсын айтады.
Босаға майлау. Жастар шаңырақ құрғанда немесе біреу жаңа үй алғанда жақын туған-туыстары келіп жаңа үйдің босағасына май жағу салтын жасайды. Ол осы үй берекелі, майдай жұғымды, көптің үйі болсын деген ниеттен туған. Босағасын майлаған адамға шаңырақ иелері кәде береді.
Қазан шегелеу. Жақын туыс, әзіл-қалжыңы жарасқан адамдардың үйіне екі-үш адам бірге барып: «Осы үйдің қазанын шегелей келдік» дейді. Бұл олардың түстеніп, ет жеуге келгендігі. Үй иесі оған әзілмен жауап қайтарып: «Жақсы болды, қазан шегелейтін адам таба алмай отыр едік» деп қонақжайлық танытады, әйелі ет асып қонақасы береді.
Мойнына бұршақ салу. Ертеде баласы жоқ адамдар мойнына көгеннің бұршағын салып, Құдайдан перзент сұрап жалбарынған, жылаған. Мойынға бұршақты бала тілегенде ғана салады.
Қымызмұрындық. Бие байлап, алғашқы қымыз ішу тойы. Құлын байлап, бие сауылып, сүті ашытылған соң екі-үш күн бойы жиналған қымызға ақсақалдар мен көрші-қолаңдар «қымызмұрындыққа» шақырылған. Яғни алғашқы қымыз адамдарға салтанатпен ұсынылып, «көпке бұйырсын» деген тілекпен беріледі.
Әмеңгерлік. Дәстүрлі құқықтық мәдениеттің негізгі институттарының бірі. Күйеуі өліп, жесір қалған әйелдің қайын ағасына немесе қайын інісіне, не болмаса жұбайының ең жақын туыстарының біріне тұрмысқа шығуы, некелесуі. Бұл қазақ қоғамында ерте заманнан «Аға өлсе, жеңге – мұра, іні өлсе, келін – мұра», «Әйел ерден кетсе де, елден кетпейді» деген қағидаға айналып, әдеттік заң нормасы ретінде қалыптасқан. Әмеңгерлік мәселесі ру ақсақалдарының басқаруымен қандас туыстар арасында мұқият талқыланған, ортақ ұйғарыммен шешілген. Тіпті ұлы Абайдың әкесі Құнанбай да Ұлжанға әменгерлікпен үйленсе, Абайдың өзі інісі Оспан қайтыс болғанда келіні Еркежанмен некелескен. Осы салттың арқасында көзі ашық қазақ жетімін жылатпаған.
Қап қағар. Қыс аяқталып, көктем басталғанда ет сүрленіп, азая бастайды. Ол ет қапта болады. Сол кезде ет асылып, аздап адам шақырылады. Бұл дәстүр «ет қайтар» деген ұғымды білдіреді, ал қаптың ең соңғысын асып, бөліп жейді.
Нұрсерік Тілеуқабыл
Ақыл мен парасат, даналық пен өнеге жылдар жылжи бойға жиналып, ақтарып кеп қалсаң қазына іспетті шашылып түседі. Бұл қария деген қазынаның бойынан табылатын қасиеттер. Осы себепті «Қариясы бар ел қазынасы бар ел» деп халқымыз тәмсіл қалдырған-ды. Берекеміз бен ынытымағымыздың негізі, тірлігіміздің тірегі қариялардың орны кез келген қоғам үшін маңызды. 22 Наурыз мерекесіне орай дәл осындай ауданымыздың қариясы, «Алтын адам» әжелер ансамблінің мүшесі, анамыз Ұлжан Жолановамен сұхбат құрған едік.
– Апа, кеңестік империяның көзін көрдіңіз. Өзіңіз жайлы және сол кездегі қазақ халқының дәстүрі мен салты жайлы айтып өтсеңіз.
– Кеңестік кезең. Ауданда жалғыз қазақ тілінде білім беретін В.Молотов атындағы мектеп-интернат бар. Онда шаруа балалары оқытылатын. Осы мектепте білімнің қайнар бұлағынан сусындап, Ұлы Отан соғысының батыры Рақымжан Тоқатаевтың көзін көріп, одан сабақ алдық. Ол сынып жетекшісі болды. 1955 жылы Рақымжан Тоқатаевтың арқасында 32 оқушы мектепті үздік бітіріп, жоғарғы оқу орнына түстік.
Оны бітіріп келіп, сол кездегі Есік көмекші мектеп-интернатында мұғалім болдым. Кейіннен оған Алханбек Мәлкеев есімі берілді. «Оқу ісінің үздігі» мәртебесін алдым. Отбасын құрып дүниеге төрт ұл әкелдім. Ол кезде салт-сана, әдет-ғұрып басқа болатын. Кеңестік империяның қол астындағы кезең салт-дәстүріміздің жаңғыруына мүмкіндік берген жоқ. Тіпті тіліміз де жоғалудың аз-ақ алдында тұрды. Ол кезде орыс тілін білмей талай мәрте өз басым қиналғаным бар.
– Ал бүгінгі дәстүрге деген халқымыздың көзқарасы қалай сіздіңше?
– Аллаға шүкір, Елбасы Н.Ә.Назарбаевтың «Болашаққа бағдар: рухани жаңғыру» мақаласы жанданған дәстүрімізді халықты өзін-өзі тануы мақсатында бұдан да әрі жаңғыртуға бағытталған бастама болып отыр. Есімде Есік қаласының базары орналасқан жерде жастар алаңы болатын. Сол жастар алаңында 1989 жылы алғаш рет наурыз мерекесін халық болып тойлаған болатынбыз. Есік көмекші мектеп-интернатындағы қазақтар біріміз ұршық иіріп, біріміз келі түйіп, Қыдыр ата болып киініп, жалпы дәстүрімізді дәріптеп алғаш рет көрініс көрсеттік. Міне, сөйтіп құрдымға кете жаздаған халық санасы қайта жаңғырып бүгінгі күнге жетті. Ал бүгінгі дәстүрге деген көзқарас менің көңілімінен шығады. Мен «Алтын адам» әжелер ансамблінің мүшесімін. Оның құрылуына себепші болған да мен десем артық айтқандық емес. Тіл мен дәстүр, салт-санамыздың жоғалып кету қаупі туындаған кеңестік кезеңде бастама көтеріп, дәстүрді жаңғырту мақсатында құрылған ансамбль күні бүгінге дейін 26 жыл болды дәстүрлі әндерімізді шырқап, ел ішінде дәріптеп жүр. Осы ретте өз атымнан және «Алтын адам» әжелер ансамблінің атынан айта кетейін, Наурыз меркесі баршамызға құтты болсын! Жыл басы қуаныш, береке, ынтымақ алып келсін. Біз ашаршылықты да көрдік, атылдық та, Ұлы Отан соғысын да өткердік, одан бұрын жоңғар шауып «Ақтабан, шұбырынды, Алқакөл сұламаны» көрдік. Халқымның өткеніне қарап, өткерген қиыншылықтарын көрсем осыншама нәубетті көріп аман қалғанына таң қалатыным бар. Демек, ел шебіне енген «коронавирус» індеті де қазақ халқы үшін қауіпті емес. Біздің жан-дүниеміз мықты. Сондықтан сабыр етіп бұл қиындықты да қиналмай өткеретінімзге сенімім мол.
Әділет САРЫБАЙ
Ежелден жаңару мен жасампаздықтың бастауы, ырыс пен берекенің арқауы болған жаңа жыл мерекесі келді даламызға. Жер-жаһанды сері самалға өпкізіп, жұрттың аузын аққа жеткізіп, нұр тамшыларын аямай төккізіп, қиындықтардың бәрін өткізіп, Самарқанның көк тасын жібіткен наурыз құтты болсын!
Ұлыстың ұлы күні – Орта Азия халықтары арасындағы ең көне мереке. Қазақ халқы осы жаңа жыл мерекесін ескі заманнан тойлап, қыстан аман-есен шыққанына қуанған. Бұл мереке халқымыз үшін көктем мен еңбектің, достық пен бірліктің мейрамы болуымен бірге, салт-дәстүрлерімізді құрметтеп, ұлттық қасиеттерімізді бойына сіңіріп, жан-жақты дамыған өнегелі, өнерлі азамат тәрбиелейтін ұлттық мейрамымыз. Ұлыстың ұлы күнінде араздасқандар татуласып, өкпе-реніш ұмытылады. Алыс-жақын ағайындар бас қосып, көптен көріспеген жақындардың хал-жағдайын сұрасады.
Ауданымыздың тұрғындарын осынау татулықтың, достықтың, береке-бірлік пен молшылықтың мерекесімен құттықтаймын. Ақтың молаятын, жарықтың ұзаратын, нұрдың молығатын, тіршіліктің жаңаратын, өмірдің жаңғыратын, пейілдің түзелетін, көңілдің кеңитін кезеңінде барша аудан тұрғындарына тек жақсылық тілеймін. Наурыз оң болсын! Ақ мол болсын!
Нұрғиса ӘЛІШЕВ,
білім қызметкерлері аудандық кәсіподағының ұйымдастыру жөніндегі маманы
Наурыз айының 22-сі шығыс халықтары үшін күн мен түннің теңесіп, адамның аузы аққа, төрт түліктің аузы көкке тиген ұлан-асыр мереке. Қыстың қақаған суығын артқа тастап, көктемнің жылы шуағында шомылып, наурыз көжені сүйсіне ішетін кез. Алайда, коронавирус ауруының тарауына байланысты бүгінгі таңда карантин жарияланып, көпшілік болып кез-келген мерекені тойлауға үкімет тарапынан қатаң түрде тыйым салынды. Бүгінде 157 елге тараған індет ел шебіне де енген. Осыған орай ауданымыздың «Ахыска» этно-мәдени орталығы, түбіміз бір түрік ұлтының ақсақалдары наурызға мерекелік лебіз білдіріп және сын сағатта сабыр етіп, ынтымақ-бірлігімізді берік ұстауға шақырады.
Түрген ауылының тұрғыны, аудандық «Ахыска» этно-мәдени орталығы ақсақалдар алқасының төрағасы, 13 немере және 13 шөбере сүйген ардақты ата Хайролла Кулаев: – «Түбі бір түрік жұртының және Шығыс халықтарының мерекесі Наурыз мерекесі баршамызға құтты болсын. Жылда дәстүрлі түрде жұрт болып жұмыла атап өтетін мереке биылғы жылы індеттің тарауына байланысты бізде ғана емес, әлем бойын-ша тойлануына тыйым салынып отыр. Бұл аурудың алдын алуға жасалған дұрыс қадамдар десек, халқымызға айтарым сын сағатта ынтымақ-бірлігімізді берік ұстап, Алла тарапынан келген сынақты бірлесіп өткеруіміз қажет» – десе, ауыл ақсақалы Нияз Сулиев те: «Ынтымағы бар елді ешқандай да жау алмайды. 130 ұлт пен ұлыстарды бауырына басқан Қазақстанның көгінде үнемі ашық аспан тұрсын. Ынтымағымыз ыдырамысын. Берекеміз тасып, ырысымыз арта берсін» – деді.
Лебіздер легін аудандық «Ахыска» этно-мәдени орталығы төрағасының орынбасары Нұрмұхамед Кулаев былайша түйіндеді: – «Халқымыздың басынан нендей қиыншылықтар өтпеді. Барлығын да жеңдік. Қандай қиыншылық болмасын Наурыз мерекесі құтты болсын. Бірлігіміз берекелі, ынтымағымыз берік болсын. Баршаңызға бақыт, ырыс, береке тілейміз».
Әділет САРЫБАЙ
Наурыз – адам мен Жер ананың табиғи үндесуінің айғағы. Табиғат тынысы кеңейіп, ырысы артса, адамның да жаңаруға құлшынысы еселейтін ай. Бұл ретте жүздеген жылдар бойы қазақ халқымен бірге жасасып, ұлтымыздың салт-дәстүрі мен әдеп-ғұрпының ажырамас бөлігіне айналған Наурыз мерекесінің орны әрине ерекше. Данышпан ата-бабаларымыз бұл күнді табиғаттың айрықша белгілерін ескере отырып жақсылыққа жорыған. Бала кезден құлаққа сіңіп қалған күн мен түн теңелетін сәт деуінің сыры неде? Шығыс халықтарының жыл басы саналған наурыз мейрамы қарсаңында табиғат анада қандай өзгерістер болады? «Әз» деген тіркес мағынасы нені білдіреді? Бұл сұрақтың жауабын бірге іздеп көрейік.
Күн мен түннің теңелуін күн орталығы өз қозғалысында жер экваторын кесіп өтетін астрономиялық құбылыс деп жатады. Жалпылама алғанда әлемдік уақыт бойынша, солтүстік жарты шарда көктемгі күн мен түннің теңелуі 20 наурыз күніне сәйкес келеді екен. Бұл уақытта Күн оңтүстік жарты шардан солтүстік жарты шарға ауысады. Сол секілді күн мен түн күзде де теңеледі деген ақпарат бар. Ол қыркүйек айының 22 немесе 23 жұлдызына сәйкес. Оңтүстік жарты шарда, керісінше, наурыздағы күн мен түннің теңелуі күзгі, ал күн мен түннің қыркүйекте теңелуі көктемгі болып саналады
Қалай дегенмен осы айда табиғаттағы барлық тіршілік иелеріне жан біте бас-тайды. Қыстың соңы, көктемнің басы жыл құстары келеді. Сол себептен де болар табиғаттың тылсымы мен ғалам ғажайыптарын терең ұғына білген ата-бабаларымыз бұл күнді Жыл басы деп есептеген. Наурызды шығыс халықтары бірліктің, татулықтың, еңбектің, ізгіліктің, бақыттың мерекесі ретінде атап өтеді. Бұл күні шаттанбайтын, қуанбайтын, мейірленбейтін адам болмаған. Осы күні жақсы тілек тілеу, құттықтау, кешірім жасау, табысу сияқты адамгершілік қасиеттер көрініс тауып, кейінгі ұрпақтар сондай жақсы өнегеден үлгі алған.
Бұл айда ауа райы да құбылмалы. Ал ертеде көшпелі жұртшылық наурыздың келгенін табиғаттағы өзгерістерге қарап білген. Біріншіден, наурызда күн мен түн теңеледі, жұлдыздар теңеседі, яғни Сүмбіле, Үшарқар-Таразы, Үркер және Сұлу Сары бір түзудің бойында тізіле орналасады. Есепшілер жұлдыздардың теңесуінен күн мен түннің теңелуін байқайды. Екінші, Арыстан мен Өгіз шоқжұлдыздары ғарыш алаңында шайқасқа түседі. Бұл туралы «Атасы мен анасы, Үш жүз алпыс бес баласы, Он екі ауыл шамасы, Отыз ор дуадақ, Бес балақ сан, Елу екі қарақшы» деген қазақтың жұмбағы да бар. Үшіншіден, есепшілер Әз Наурыздың келгенін жан-жануарлардың қылығынан да байқаған. Наурыздың 14-де сарышұнақ інінен шығады. Наурызда күн суық болатын болса ін аузынан ұзамайды, ал күн жылы болатын болса ұзағырақтау жерге шығады. Төртінші, күн мен түн теңелгенде тасбақа інінен аузына шөп тістеп шығады. Шөптің аты «мәриям шөп» деп аталады. Оны еппен алған адам бақытты, дәулетті болады деген сенім бар. Бесінші, күн мен түн теңелгенде, балық аунап түседі. Кейбір елдерде күн мен түннің теңелгенін осы құбылыстан байқайды.
Астрономиялық есеп бойынша наурыз айының 21-інен 22 жұлдызына қараған түні аспан денелері өзінің алғашқы айналу нүктесіне қайта айналып келеді екен. Сонда күн мен түн, ыстық пен суық, қараңғы мен жарықтың теңелетін жаратылыстың керемет сәтінде Наурыз кіреді. Неге «Әз наурыз»? Күн мен түн тепе-теңдікке жеткен кезде әуеде ғажайып бір діріл мен гуіл естіледі, сол үнді «әз» дейді. Әз өткенде бүкіл жан-жануар, күллі өсімдік дүниесінде, жалпы тіршілік әлемінің бойына қан жүгіріп, қайта түлеп жаңарады. Әздің жүргенін байқау қиын, қазір көкті де, жерді де үздіксіз гүрілдеп жататын техникалық дыбыстар басып кеткен. Ұсқынсыз нәрселерді отқа жағып, айналаны түгел адыраспанмен аластап, тазартады. «Ұлыс күн таза үйге кіреді, сонда құт-береке қоса енеді» деген сенім бар. Қайырымды істер жасалады. Наурыз қазіргі біздің сағат уақытымен межелегенде түнгі сағат үшке келеді екен. Наурызда күннің алғашқы сәулесіне маңдай тосып, шұғыласына бөленсе, адамның бойына нұрлы күш-қуат тарайды.
Қалай дегенмен, бұл уақыт табиғат пен адам бірлігінің мәңгілік мейрамын, олардың ажырамас табиғи байланысын білдіреді.
Қайнар Жұмағожа
Жуырда Еңбекшіқазақ аудандық мәслихат жанындағы тұрақты комиссиялардың біріккен отырысы өтті. Күн тәртібі де қауырт: Сыбайлас жемқорлыққа қарсы заңнаманың орындалуы бойынша бағдарламалық құжаттарды іске асыру, мемлекеттік қызметкердің этикасының сақталуы және олардың құқықтарын қорғау бойынша жүргізілген және жоспарланған жұмыстар. Бұл – бірінші мәселе. Аудан аумағындағы жолдардың жағдайы екінші боп сараланса, Есік қаласы мен ауылдық округ тұрғындарын сапалы ауызсумен қамтамасыз ету мақсатында атқарылған іс-шаралар да сарапқа түсті.
Алғашқы мәселе бойынша аудан әкімі аппаратының персоналды басқарудың бірыңғай кадр қызметі бөлімінің басшысы Айдос Молдабаев есеп берді. Мәліметіне сүйенсек, әдеп заңнамаларын бұзғаны үшін аудан бойынша 64 қызметкерге әр деңгейлі ескертулер берілген. 41 қызметкерге – ескерту, 19 қызметкерге – сөгіс, 1 қызметкерге – қатаң сөгіс, лауазымына толық сәйкес емес – 1 қызметкер. «2020 жылға арнайы жоспарға сәйкес сыбайлас жемқорлық көріністерінің алдын алу бойынша жасырын сауалнама алуды мақсат етіп отырмыз. Ауданымызда 362 мемлекеттік қызметкер жұмыс істесе, 29 лауазым бос тұр. Жақын арада конкурс жарияланып, кадрлар алынатын болады», – деді А.Молдабаев.
Есеп берушіге халық қалаулылары тарапынан қойылған сұрақтар легі көп болды. Мысалы, ауданымыздың бірқатар бөлімдеріне кадрлар дұрыс таңдалмайды. Мұрнына иісі келмейтін мамандарды қандай себеппен бөлімдерге жібересіз? Оған дәлел – аудандағы білім бөліміндегі кейінгі алып жатқан кадрлар білім саласында бір күн де жұмыс істемеген. Олар қалай ғұмырын педагогикаға арнаған азаматтарға тапсырма береді? Қысқасы, қалай жұмыс істеп жатыр? Ал аудан әкіміне 65 пайыз білім сапасын көрсеттік деп есеп беріпті. Біз бұған күмәнмен қараймыз. Ондай жағдайға жету үшін мектептеріміздің 80 пайызы басқа пәндерді былай қойғанда математикадан 90 пайыз білім сапасын көрсетуі керек яғни, әрбір түлек бестік алуы тиіс. Сіз осыған сенесіз бе? Бұндай мәселе тұрғын үй коммуналдық шаруашылығы және тұрғын үй инс-пекциясы, жолаушы көлігі және автомобиль жолдары бөлімінде де бар. Ауылдарға келіп жатқан жас мамандар әдеп этикасы тұрмақ, эстетиканы сақтамайды. Бұл өзімізді өзіміз сыйламағанмен тең, – деді аудандық мәслихаттың әлеуметтік бағыттағы салаларды дамыту мен заңдылық, құқықтық тәртіп, қоғамдық келісім, жергілікті мемлекеттік басқару және өзін-өзі басқару мәселелері жөніндегі тұрақты комиссияның мүшелері.
Нәтижесінде, осындай кемшіліктер бойынша жұмыс атқарып, бөлім басшысы алты айдан кейін қайта есеп беру туралы шешім қабылданды.
Күн тәртібіндегі екінші мәселе бойынша мінберге көтерілген аудандық жолаушы көлігі және автомобиль жолдары бөлімінің басшысы Бейбіт Искаковқа бірден сұрақтар қойылды. Оның алғашқысы Есік қаласындағы сапасыз салынған Қ.Орымбетов атындағы көше мәселесі болды. Бұл ретте бөлім басшысы: «Аталған мәселе бойынша жуырда ғана арнайы рейд жүргізіліп, орындаушыға нақты тапсырмалар берілді. Себебі, қаражат әлі аударылмады, қабылдап алу актісіне қол қойылмады. Кемшіліктерді түпкілікті жойғаннан кейін ғана акті қабылданады», – деді. Аудан орталығының Р.Тоқатаев, Абай атындағы, Алматы көшелерінің сапасы сын көтермейтіні сөз болды. Әрі ауылдық елді-мекендердегі көшелердің жағдайы сараланды. Мәслихат депутаттары туындаған мәселелер жауапты бөлім, сонымен қатар қала мен ауылдық округ әкімдіктерінің тарапынан бақылаудың жоқтығынан және жергілікті қауымдастықпен, қала, ауыл тұрғындарымен келісе жүргізілмейтіндігінен туындап отырғанын баса айтты. Жұмыла көтергеннің жүгі жеңіл екендігін жеткізді. Сол секілді «Өңірлерді дамыту» бағдарламасының да іске асуындағы кемшіліктерді су бетіне шығарды. Тіршілік күретамыры саналатын жолдар мәселесі күн тәртібінен түспейтінін ескерткен депутаттар рейд жұмыстарына халық қалаулыларын қосуды да айрықша атады.
Үшінші мәселе бойынша аудандық тұрғын үй коммуналдық-шаруашылық және тұрғын үй инспекциясы бөлімінің басшысы Дәурен Мәлібековке де есептен гөрі қойылатын сұрақтарға нақты жауап беруін сұрады.
– Қазір ауданымыздағы білім ошақтары, мемлекеттік мекемелерді газдандыру мәселесі өзекті. Сіздердің тараптан бұл тұрғыда әлі де бір нақты іс-шаралар көрінбейтінін байқаймыз. «Жау жағадан алғанда»шапқылауды қою керек, – деді Қ.Байғоджаев. Сол секілді ауылдардағы ауызсу мәселелері, Есіктегі ауызсу сапасы сөз болды. Әсересе, Қазақстан, Сөгеті, Ащысай, Түрген, Көктөбе сияқты ауылдық округтердегі тіршілік нәрінен тарылған тұрғындардың тілектерін жеткізді.
Не керек, бір жарым сағатқа созылған тұрақты комиссия отырысында тиісті бөлім басшыларына толассыз сұрақтар қойылды. Өкініштісі, бірқатар өзекті сауалдарға қанағаттанарлық жауаптар алынбады. Осы ретте кезекті есеп беру сәтіне дейін түйткілді мәселелер түйінін тарқату туралы нақты жауаптармен келуін тапсырды.
Қайнар ЖҰМАҒОЖА,
аудандық мәслихат депутаты
Наурыз мейрамы на Востоке был интернациональным праздником еще тысячелетия тому назад, а в ХХI веке обрел планетарный масштаб. В 2009 году этот древнейший праздник мира был внесен ЮНЕСКО в Репрезентативный список мирового нематериального культурного наследия человечества. В 2010 году ООН объявила 21 марта Международным днем Новруза, который способствует примирению и добрососедству всех этносов и государств.
Традиции «Ұлыстың ұлы күні» (Великий день народа), как его называли жители Великой степи, тысячелетия непрерывно передавались из поколения в поколение. В 1926 году празднование Наурыза было запрещено советской властью, которая сочла его религиозным и националистическим обычаем. Но и в советский период в казахских семьях накрывали праздничный дастархан, принимали бата от аксакалов. В виде общенародного гулянья «ростки» Наурыза пробились из более чем полувекового забвения в конце 80-х, когда включился процесс возрождения национального самосознания, исторической правды и культурного наследия. Но только с обретением Казахстаном Независимости «Ұлыстың ұлы күні» стал символом восстановленной связи времен, вступая в законные права национального достояния страны. Наурыз получил официальный статус после Указа Первого Президента Республики Казахстан от 15 марта 1991 года «О народном празднике весны — Наурыз мейрамы», а в 2001 году был объявлен государственным праздником. В 2009 году согласно Закону «О праздниках в Республике Казахстан» Наурыз мейрамы объявлен трехдневным (21-23 марта) государственным праздником с выходными днями. О том, какое значение имеет Наурыз для Казахстана, емко сказал Первый Президент РК Нурсултан Назарбаев: «Сегодня особый весенний любимый праздник, который вернулся из глубин веков. В годы независимости мы отмечаем этот праздник ежегодно. Его празднуют представители всех этносов нашей страны. Это празд¬ник дружбы, единства, праздник равноденствия, начала восточного нового года, от которого мы ждём всего хорошего и доброго».
Каков сакральный смысл Наурыза? В древней культуре номадов во время весеннего равноденствия происходит единение космоса, природных стихий и человека, очищение мира от зла, ненависти, грехов. В Наурыз прекращались войны и конфликты. По народным поверьям, накануне этого дня по земле ходит счастье, поэтому ночь накануне называется Ночью счастья. Когда Новый год в Ночь счастья перешагивал порог, казахи на почетном месте зажигали две свечи, приговаривая: «Одна лучина не станет светом». Если Новый год войдет в чистый дом, он будет свободен от болезней и несчастий. Поэтому накануне праздника хозяйки наводят в домах идеальную чистоту и порядок.
В этот день также открывают и вычищают родники, водоемы, колодцы, наполняют пустую посуду продуктами и водой из священных источников, веря, что изобилие продлится до следующего года. Традиционное приветствие в Наурыз – рукопожатие двумя руками обязательно с чередованием объятий через оба плеча. Девушки готовят для парней специальные угощения, а парни делают девушкам подарки, символизирующие чистоту, молодость, красоту. Если в марте рождаются мальчики, их называют Наурызбаями или Наурызбеками, а девочек Наурызгуль.
Главное угощение праздника наурыз коже – специальное блюдо из семи продуктов, с добавлением мяса и молока, которое представляет собой начало изобильного нового года и прощание со старым. В полдень, возле аула резали быка и варили из его мяса бель-котерер, что означает «выпрямляющий стан», поскольку бык считается одним из самых сильных животных, и пища из него придает силу и выносливость.
После дастархана устраиваются народные игры, качели «алтыбакан», соревнования по национальным видам спорта. День заканчивается айтысом, в котором два акына ведут соревнование в песенной импровизации. С заходом солнца за горизонт аульчане разжигают костер и с зажженными от него факелами обходят окрестности селения, завершая праздник.
Для восточных народов день весеннего равноденствия имеет не только символическое, но и практическое значение в отсчете времени. В одиннадцатом веке великий поэт и ученый Омар Хайям, живший в период правления султана Джалал ад Дина Малик шаха, создал календарь, названный «Летоисчислением Малика». В его основу был положен первый день, когда солнце после весеннего равноденствия вступает в созвездие Овна. По данному календарю средняя продолжительность года равна 365,2400 суткам. Отклонение от истинного солнечного года составляет всего 0,0002 суток. Хронологическое смещение в одни сутки от истинного астрономического года накапливается за 5000 лет. По григорианскому календарю, который повсеместно используют сегодня, средняя продолжительность года равна 365,2425 суткам. При этом отклонение от истинного года равно 0,0003 суткам, а ошибка в один день накапливается за 3333 года.
В Наурыз между собой равны мужчины и женщины, дети и старики, богатые и бедные. Аксакалы дают народу благословение в древних формулах: «Пусть будет благополучным народ! Пусть будет много светлого молока! Пусть этот день принесет обилие! Пусть все зло и все черные дела провалятся сквозь землю! Пусть духи предков всегда поддерживают нас!»
И.ТУРАНИН