Елдік шешім – елмен бірге қабылданғанда мәнді

Қазақ халқының тарихында ел тағдырына қатысты маңызды мәселелерді көп болып кеңесіп, ортақ мәмілеге келудің орны бөлек. Құрылтай ұғымының да тамыры осындай елдік дәстүрмен сабақтас. Бұл – халқымыздың ақылдасуға, ортақ шешімге келуге, елдің бірлігі мен тұтастығын бәрінен жоғары қоюға деген ұстанымын білдіретін ұғым.

Сайлау – жай ғана дауыс беру рәсімі емес, азаматтың ел болашағына қатысты өз ұстанымын білдіру мүмкіндігі. Бір қарағанда, бір адамның дауысы көптің арасында елеусіз көрінуі мүмкін. Бірақ ел тағдырына қатысты үлкен шешімдердің барлығы жеке азаматтардың осындай таңдауларынан құралады. Сондықтан «менің дауысымнан не өзгереді?» деген немқұрайды көзқарас қоғамның дамуына кедергі келтіреді.

Кәсіпкер ретінде мен кез келген істің нәтижесі жауапкершілікке байланысты екенін жақсы түсінемін. Кәсіп бастау үшін де, оны дамыту үшін де нақты шешім қабылдау керек. Қай бағытта жұмыс істейміз, кіммен бірге еңбек етеміз, қандай мақсат қоямыз – мұның барлығы таңдау. Қоғамдық өмірде де осы қағида бар. Бүгінгі таңдауымыз – ертеңгі нәтижеге әсер етеді. Сондықтан сайлау кезінде де өз таңдауымызға салмақпен қарауымыз қажет.

Әсіресе, Құрылтайға сайланатын азаматтарды таңдағанда олардың елдік мәселеге көзқарасына, жауапкершілігіне, халықпен тіл табыса білуіне мән берген дұрыс деп ойлаймын. Бұл жерде қандай да бір ұйымға немесе белгілі бір ортаға басымдық беруден гөрі, ең алдымен азаматтың жеке қасиеті мен ұстанымы маңызды. Халықтың сенімін арқалайтын адам өзіне берілген мүмкіндікті жеке мүддеге емес, ортақ іске бағыттай білуі керек.

Сайлау кезінде біз көбіне «кімге дауыс беремін?» деген сұраққа ғана көңіл бөлеміз. Меніңше, оған дейін «мен таңдаған ұйым қандай болуы керек?» деген сұрақты өзімізге қойған жөн. Ол партия елдің мәселесін түсіне ме? Қоғамның түрлі пікірін тыңдай ала ма? Өзгенің пікіріне құрметпен қарай ма? Халықтың сенімін ақтауға дайын ба? Міне, осындай сауалдарға жауап іздеу – саналы таңдаудың белгісі.

Бүгінде елімізде түрлі салада еңбек етіп жүрген азаматтардың белсенділігі артып келеді. Кәсіпкерлер жұмыс орындарын ашып, мамандар өз саласында еңбек етіп, жастар жаңа бастамаларға ұмтылып жатыр. Осындай әртүрлі ортадағы адамдардың бәрін біріктіретін бір құндылық бар. Ол – елдің болашағына деген жауапкершілік.

Мен әйел кәсіпкер ретінде осы жауапкершілікті ерекше сезінемін. Әйелдің мойнында отбасының ғана емес, жұмыс ұжымының да жауапкершілігі болады. Қол астындағы адамдардың еңбегі, олардың отбасы, кәсібіңмен байланысты көптеген адамның тағдыры – барлығы сенің шешіміңе белгілі бір деңгейде тәуелді. Сондықтан шешім қабылдаудың қаншалықты маңызды екенін жақсы білемін. Қоғамдық таңдауда да дәл осындай жауапкершілік болуы керек.

Сайлауға қатысу – елдің ертеңіне алаңдайтын азаматтың нақты әрекеті. Өйткені азаматтық ұстаным тек пікір айтумен шектелмеуі керек. Әлеуметтік желіде өз ойыңды білдіру, айналаңдағы мәселеге алаңдау маңызды. Бірақ сол пікірді нақты азаматтық әрекетпен бекіту одан да маңызды. Сайлау – соның бір көрінісі.

Кейде адамдар саясаттан алыс жүруді өзіне тиімді деп қабылдайды. «Мен өз жұмысыммен айналысамын, елдің мәселесін басқалар шешеді» деген түсінік кездеседі. Бірақ қоғамда болып жатқан өзгерістердің барлығы біздің күнделікті өмірімізге әсер етеді. Экономикадағы жағдай кәсіпкерге әсер етеді. Білім беру жүйесі баланың болашағына әсер етеді. Заң мен тәртіп әр отбасының тыныштығына әсер етеді. Демек, елдегі қоғамдық өзгерістердің ешқайсысы қарапайым азаматтан бөлек тұрған дүние емес. Сондықтан елдің ертеңіне бейжай қарамау – ең алдымен өзіңнің азаматтық жауапкершілігіңді сезінуден басталады.

Құрылтай сайлауы да осы жауапкершілікті сезінуге мүмкіндік беретін маңызды кезең деп ойлаймын. Әр азамат өз дауысын саналы түрде берсе, бұл – қоғамның саяси мәдениетінің де қалыптасуына ықпал етеді. Ал сайлауға қатыспау арқылы біз өз таңдау құқығымызды пайдаланбай ғана қоймаймыз, қоғамның болашағына қатысты пікірімізді білдіру мүмкіндігін де жіберіп аламыз.

Әсіресе, жастардың сайлауға белсенді қатысуы маңызды. Себебі бүгінгі жас – ертеңгі қоғамның негізгі қозғаушы күші. Қазір қабылданып жатқан шешімдер олардың өміріне, кәсібіне, отбасына, болашақтағы мүмкіндіктеріне әсер етеді. Сондықтан жастар «бұл үлкендердің мәселесі» деп сырт қалмай, елдің қоғамдық өміріне өз көзқарасын білдіруі керек.

Сонымен бірге аға буынның да тәжірибесі маңызды. Өмірден көргені, елдің талай кезеңін өткергені бар азаматтардың қоғамға деген көзқарасы қалыптасқан. Ал жастардың жаңашылдығы мен аға буынның тәжірибесі бір-бірін толықтырғанда ғана қоғамның дамуы орнықты болады.

Менің ойымша, сайлаудың ең үлкен маңызы – азаматқа таңдау жасау құқығын ғана емес, сол таңдау үшін жауапкершілік алу мүмкіндігін беруінде. Біз кімге сенім білдірсек, соның жұмысына кейін өзіміз де баға береміз. Сондықтан бүгінгі таңдауды ертең ұмытып кетпей, оған жауапкершілікпен қараған жөн.

Ел болашағы бір ғана адамның немесе бір ғана топтың қолында емес. Ол – миллиондаған азаматтың күнделікті еңбегі, таңдауы, жауапкершілігі арқылы қалыптасады. Сондықтан Құрылтай сайлауына қатысу да осы үлкен жауапкершіліктің бір бөлігі деп қабылдауымыз керек.

Елдің ертеңі бізден алыста тұрған дүние емес. Ол – бүгінгі таңдауымыздан басталады. Сондықтан әр азамат өз дауысын жай ғана бюллетеньдегі белгі деп емес, ел болашағына қосқан азаматтық үлесі деп қабылдаса екен деймін. Меніңше, саналы қоғамның басты белгісі де – өз болашағына өзі немқұрайды қарамауы.

Шолпан ҚАСЫМБАЕВА,

аудандық мәслихаттың

депутаты, кәсіпкер.