ЭКОЛОГИЯЛЫҚ ЕРІКТІЛІК ҰРПАҚТАРДЫ БІРІКТІРЕДІ
Таза көшелер мен абаттандырылған қоғамдық орындардың артында көбіне өз бастамасымен әрекет етуге дайын адамдардың еңбегі тұрады. Еріктілер аумақтарды тазалауға, жасыл желектерді күтіп-баптауға, экологиялық мәселелерге қоғам назарын аударуға және айналасындағыларды табиғатты қорғау жұмыстарына тартуға көмектеседі.
Мұндай бастамалар «Таза Қазақстан» идеяларын жүзеге асыруда да маңызды орын алады. Бейжай қарамайтын азаматтардың қатысуының арқасында экологиялық күн тәртібі халыққа жақындай түсіп, қоршаған ортаны қорғау тек коммуналдық қызметтердің міндеті ретінде қабылданбайды.
Әсіресе жастардың қосып отырған үлесі айрықша. Студенттер, мектеп оқушылары мен жас мамандар экологиялық-ағартушылық кездесулер ұйымдастырып, қоғамдық орындарды абаттандыруға қатысып, қалдықтарды азайтудың қарапайым жолдары туралы ақпарат тарата алады. Мұндай бастамалар нақты аумақтардың жағдайын жақсартып қана қоймай, табиғатқа жауапкершілікпен қарау мәдениетін қалыптастыруға ықпал етеді.
Сонымен қатар еріктілік тек ауқымды іс-шаралармен шектелмейді. Кейде үлкен тазалық акциясын өткізіп, келесі күні сол аумақты ұмытып кеткеннен гөрі, шағын ғана аумақты тұрақты түрде күтіп-баптаған әлдеқайда пайдалы. Жүйелі жұмыс нақты өзгерістерді көруге және қол жеткізілген нәтижені сақтауға мүмкіндік береді.
Экологиялық жобаларға әртүрлі жастағы және түрлі мамандық иелері қатыса алады. Бірі тазалық жұмыстарына атсалысуға дайын болса, енді бірі ұйымдастыруға көмектеседі, үшіншілері пайдалы ақпарат таратып немесе абаттандыру бойынша өз ұсыныстарын білдіре алады.
Мұндай жұмыстың басты шарты – еріктілік және ортақ мақсатты түсіну. Әр адам өз еңбегінің маңызды екенін және нақты пайда әкелетінін сезінуі керек.
Экологиялық еріктілік жақсы өзгерістер жасау үшін әрдайым үлкен ресурстар қажет емес екенін көрсетеді. Кейде туған өлкені таза ету үшін бірнеше бастамашыл адам, ортақ жоспар және ниет болса жеткілікті. Ал олардың қатарына өзгелер де қосылған кезде, шағын іс біртіндеп адамдардың әдеттері мен қоршаған ортаға деген көзқарасын өзгерте алатын үлкен қозғалысқа айналады.