КЕЗ КЕЛГЕН ЖАСТА ДАМУДЫҢ ЖОЛЫ – КІТАП ОҚУ

Ересек адамдардың кітап оқуға көбіне уақыты жете бермейді. Жұмыс, отбасылық міндеттер мен күнделікті тіршілік күннің басым бөлігін алады. Тіпті бала кезінен кітап оқуды жақсы көрген жандардың өзі жаңа шығармалармен танысуды жылдар бойы кейінге қалдыруы мүмкін. Алайда кітап оқуға қайта оралу үшін өмір салтын түбегейлі өзгерту қажет емес. Кейде күнделікті қалыптасқан тәртіпке аздаған өзгеріс енгізудің өзі жеткілікті.

«Оқитын ұлт» жобасы мектеп оқушылары мен студенттерге ғана емес, ересектерге де бағытталған. Республикалық марафон аясында қатысушылардың әртүрлі санаттарына, соның ішінде еңбек ететін азаматтарға арналған жеке бағыттар қарастырылған.

Біреулер үшін кітап оқу күнделікті күйбең тіршіліктен бір сәтке арылудың жолы болса, енді біреулер үшін кәсіби білімін жетілдіруге мүмкіндік береді. Бірі танымал тұлғалардың өмірбаянын оқуды ұнатса, енді бірі тарихқа, психологияға, саяхатқа немесе көркем әдебиетке қызығады.

Ең алдымен, өзіңізді шынымен қызықтыратын тақырыптардан бастаған жөн. Бірден қалың роман оқуға кірісудің немесе жылына ондаған кітап оқуды мақсат етудің қажеті жоқ. Шағын әңгімелер, эсселер мен деректі проза да кітап оқуға деген қызығушылықты біртіндеп оятып, ойлы оқырман дағдысын қалыптастыруға көмектеседі.

Жақсы нәтижеге қол жеткізу үшін күн сайын кітап оқуға белгілі бір уақыт бөлуді әдетке айналдырған дұрыс. Күнделікті тұрақты түрде бөлінген 10–15 минуттың өзі уақыт өте келе берік дағдыға айналады. Кітапты қоғамдық көлікте келе жатқанда, ұйықтар алдында немесе күнделікті жұмыстар арасындағы үзілісте оқуға болады.

Ересек оқырмандарға оқыған кітаптары туралы әріптестерімен, достарымен және отбасы мүшелерімен пікір алмасу да пайдалы. Шығарманы талқылау барысында адам өз бетінше оқығанда назардан тыс қалған тұстарды байқап, жаңа ой түюі мүмкін.

Сондай-ақ мекемелер мен еңбек ұжымдарында шағын кітап клубтарын ұйымдастыруға болады. Ол үшін көп қаражат жұмсаудың қажеті жоқ: оқылатын шығарманы таңдап, оқу мерзімін белгілеп, оны талқылауға уақыт бөлу жеткілікті.

Кітап оқу мәдениеті – жаңа нәрсені білуге деген құштарлықтан басталады. Ал кітап адамға өмір бойы білімін жетілдіріп, үнемі дамып отыруға мүмкіндік береді.