«Заң мен тәртіп» – елдік сананың өлшемі

Қоғамның кемелдігі мен мемлекеттің қуаты ең алдымен заңның үстемдігімен және тәртіптің беріктігімен айқындалады. «Заң мен тәртіп» идеологиясы – азаматтардың құқықтық мәдениетін қалыптастырып қана қоймай, қоғамдық келісім мен тұрақтылықтың берік негізін қалайтын маңызды құндылық.

Заң – әділеттің шамшырағы. Ол әрбір азаматтың құқығын қорғап, міндетін айқындайды, қоғамдағы тепе-теңдік пен үйлесімділікті қамтамасыз етеді. Ал тәртіп – сол заңның өмірдегі көрінісі, қоғамдық өмірдің тынысы мен ырғағы. Заң мен тәртіп өзара сабақтас ұғымдар ретінде қоғамның дамуына жол ашып, елдің болашағына сенім ұялатады.

Қай заманда да тәртіпті қоғам өркениеттің көшінен қалмаған. Өйткені заңды құрметтеу – мемлекетке деген құрметтің белгісі, ал тәртіпті сақтау – ортақ жауапкершіліктің көрінісі. Адамдардың бір-бірінің құқығын сыйлап, заң талаптарын орындауы қоғамдағы өзара сенім мен татулықты нығайтады.

Бүгінгі таңда «Заң мен тәртіп» идеологиясы азаматтардың бойында адалдық, әділдік және жауапкершілік сияқты асыл қасиеттерді орнықтыруға қызмет етуде. Бұл қағидат әр адамның өз ісіне ұқыптылықпен қарап, қоғамдық мүддені жеке мүддеден жоғары қоя білуіне ықпал етеді. Заңға бағыну – мәжбүрліктен емес, жоғары мәдениет пен саналы таңдаудан туындауы тиіс.

Елдің ертеңі – заңды құрметтейтін, тәртіпті өмір салтына айналдырған азаматтардың қолында. Сондықтан «Заң мен тәртіп» қағидатын ұлықтау – тек мемлекеттік саясаттың бағыты емес, әрбір азаматтың өмірлік ұстанымына айналуы қажет. Сонда ғана әділетті қоғам қалыптасып, бірлігі бекем, болашағы баянды мемлекет құрылады.

Еңбекшіқазақ ауданындағы Аманат партиясының мүшесі Б.Рахимов