«Заң мен тәртіп – қоғамның берекесі мен мемлекеттің тірегі»

Қоғамның тыныштығы мен елдің тұрақтылығы кездейсоқ қалыптаспайды. Оның негізінде заңға деген құрмет, тәртіпке деген жауапкершілік және әділдікке деген сенім жатады. Осы құндылықтарды өзегіне арқау еткен «Заң мен тәртіп» идеологиясы – азаматтық қоғамның кемелденуіне бастайтын маңызды бағыт.

Заң – мемлекет өмірінің бұлжымас қағидасы, ал тәртіп – сол қағидалардың күнделікті өмірде жүзеге асуының көрінісі. Заң үстемдік құрған жерде адам құқығы қорғалып, қоғамдық қатынастар әділдік пен өзара сыйластық негізінде дамиды. Ал тәртіп орныққан ортада еңбек өнімділігі артып, елдің дамуына жол ашылады.

Әрбір азаматтың заң талаптарын сақтауы – тек құқықтық міндет емес, Отан алдындағы азаматтық жауапкершілігінің айғағы. Өйткені заңға құрмет көрсету арқылы адам өз құқығын ғана емес, өзгенің де құқығын қадірлейді. Мұндай көзқарас қоғамдағы татулық пен бірлікті нығайтып, ортақ мақсаттарға жетуге мүмкіндік береді.

«Заң мен тәртіп» идеологиясының басты ерекшелігі – оның тек құқықтық емес, тәрбиелік мәнінің де зор болуында. Бұл қағидат жастардың бойына адалдық, әділдік, жауапкершілік және отансүйгіштік қасиеттерін сіңіруге ықпал етеді. Заңды сыйлайтын ұрпақ – мемлекеттің болашағына сенімді кепіл болатын ұрпақ.

Тәртіп – мәдениетті қоғамның айнасы. Қоғамдық орындардағы әдептілік, қоршаған ортаға жанашырлық, қоғамдық мүлікке ұқыптылық пен өз міндетіне жауапкершілікпен қарау – тәртіптің күнделікті өмірдегі көріністері. Осындай қарапайым, бірақ маңызды әрекеттер елдің дамуына қызмет етеді.

Сондықтан «Заң мен тәртіп» қағидатын ұстану – уақыт талабы ғана емес, өркениетті қоғам құрудың басты шарты. Заңға сүйенген елдің іргесі берік, тәртіпке негізделген қоғамның келешегі кемел болмақ. Бұл – әділетті Қазақстанды қалыптастыру жолындағы ең маңызды құндылықтардың бірі.

маслихат депутаты Габсаттарова-Эм Айгуль Габдель-Вахитовна