23 тамызда өтетін Құрылтай – ел өміріндегі маңызды саяси-қоғамдық оқиғалардың бірі. Бұл – мемлекет пен қоғам арасындағы ашық диалогты нығайтып, халықтың көкейіндегі өзекті мәселелерді талқылауға мүмкіндік беретін бірегей алаң. Құрылтайдың басты мақсаты – елдің тұрақты дамуына бағытталған бастамаларды қолдау, ұлттық бірлікті күшейту және қоғамдағы өзекті мәселелердің шешу жолдарын бірлесіп қарастыру.

Бүгінгі таңда Қазақстан жаңа даму кезеңіне қадам басты. Осындай уақытта қоғамның барлық өкілдерінің пікірін тыңдап, ортақ мүддеге негізделген шешімдер қабылдау ерекше маңызға ие. Құрылтай осы міндетті жүзеге асыратын тиімді тетікке айналып келеді. Мұнда ғылым, білім, мәдениет, кәсіпкерлік, азаматтық қоғам, жастар ұйымдары және басқа да салалардың өкілдері бас қосып, ел болашағына қатысты маңызды ұсыныстарын ортаға салады.

Құрылтайда құндылықтарды сақтау, мемлекеттік тілдің мәртебесін арттыру, жастарды қолдау, білім беру жүйесін жетілдіру, өңірлерді дамыту, әлеуметтік әділеттілік, экология және мәдени мұраны қорғау сияқты маңызды мәселелер тұрақты түрде талқыланады. Бұл тақырыптардың әрқайсысы қоғам үшін өзекті әрі елдің ұзақ мерзімді дамуына тікелей әсер етеді. Сондықтан мұнда айтылған әрбір ұсыныс халықтың сұранысы мен заман талабына сай болуы тиіс.

Құрылтайдың тағы бір ерекшелігі – халық пен билік арасындағы сенімді нығайтуға ықпал етуі. Ашық пікір алмасу арқылы қоғамдағы түйткілдер жасырылмай, оларды шешудің нақты жолдары қарастырылады. Бұл өз кезегінде мемлекеттік саясаттың тиімділігін арттырып, азаматтардың қоғамдық өмірге белсенді араласуына мүмкіндік береді.

Бүгінде Қазақстанның басты құндылығы – татулық пен тұрақтылық. Осы құндылықтарды сақтап, елдің дамуын жаңа деңгейге көтеру үшін барша азаматтың ортақ жауапкершілігі қажет. Құрылтай – дәл осы жауапкершілікті сезінуге, елдік мәселелерге бейжай қарамауға үндейтін маңызды институт. Мұнда қабылданған бастамалардың нақты іске асуы халықтың әл-ауқатын жақсартуға, өңірлердің дамуына және мемлекетіміздің өркендеуіне қызмет етеді.

23 тамызда өтетін Құрылтай – өткенді саралап қана қоймай, болашаққа бағыт-бағдар айқындайтын маңызды басқосу. Сондықтан бұл жиыннан қоғам игілігіне бағытталған тың ұсыныстар мен нақты шешімдер күтіледі. Ел бірлігі мен қоғамдық келісім нығайған сайын Қазақстанның дамуы да қарқынды бола түсетіні сөзсіз. Әрбір азаматтың пікірі ескерілетін, ортақ мақсат жолында жұдырықтай жұмылған қоғам ғана жарқын болашаққа нық қадам басады.

Жошыбаева
Гулнара Сагатовна
Облыстық аналар кеңесінің төрайымы