Биыл «ALTYN ADAM» инновациялық мектебінің ашылғанына  бір жыл толып отыр. Осы орайда, мектеп өзінің алғашқы бір жылдық мерейтойын жоғары деңгейде атап өтті.

Мерейтойлық кештің шымылдығы «Алтын адам» оркестрінің орындауындағы күмбірлеген күймен ашылды. Содан соң мерейтойға шақырылған қадірлі қонақтар мектептегі  мәдени мұраларға көз жүгіртті. Бұл күн біз үшін өте маңызды болды, себебі, қуанышымызды бөлісуге білім саласының жанашырлары арнайы келді. Қонақтар қатарында аудандық білім бөлімінің басшысы Шолпан Қошаханова, Рахат ауылдық округі әкімінің орынбасары Руслан Қыдырғожаев, ақын, жазушы Шаяхмет Құсайынұлы, композиторлар Жанайхан Мұхтар, Қанапия Омархан болды.

Салтанатты шарада мектебіміздің іргетасын қалап, бізге заманауи білім алуға шексіз мүмкіндік жасаған, білім жолындағы ерен еңбегімен танымал тұлға, «Kapital construction» компаниясының президенті және мектебіміздің құрылтайшысы Ринат Төренияздың орны ерекше екенін атап өткім келеді. Сондай-ақ, мектеп директоры Ботагөз Шәрібек алғашқы құттықтау сөзін сөйлеп, білім ошағының болашақ даму жоспарымен бөлісті. Ардагер ұстаздарымыз бен ақсақалдар кеңесінің өкілдері де бізге ақ баталарын беріп, мерейімізді өсірді.

Мереке аясында мектебіміздің сазды әуеніміздің тұсауы кесілді. Астанадан арнайы келген композиторлар мен ақындарымыз сыйлаған бұл туынды біздің бірлігіміздің символына айналды. Ал «Алтын премия» марапаттау рәсімінде мектептің ең үздік шәкірттері мен ұстаздары түрлі номинациялар бойынша марапатталып, кештің көркін қыздырды.

 Нұрсұлу Нұрхат,

«ALTYN ADAM»» инновациялық мектебінің

10 сынып оқушысы.