Мектеп – кішкентай қоғам. Сондықтан мектеп қабырғасындағы тәртіп – болашақтағы азаматтық ұстанымның негізі. Оқушы кезден тәртіпке бағынған, өз ісіне жауап бере алған бала ертең елге пайдалы, саналы азамат болып қалыптасады. Осы орайда Талдыбұлақ орта мектебінде «Заң – қоғам тірегі, тәртіп – ел кепілі» тақырыбында Учаскелік полиция инспекторы, полиция аға лейтенанты А.Илиевпен кездесу ұйымдастырылды. 

Оқушыларға заң талаптарын түсіндіру, құқықтық сауаттылықты арттыру, қоғамдық тәртіпті сақтау мен құқық бұзушылықтың алдын алу мақсатында ұйымдастырылған шараға жоғары сынып оқушылары қатысып, заң қызметкерінен кеңес алды, өздерінің сауалдарын қойды. 

Қазіргі таңда жасөспірімдер арасында кездесетін кейбір құқықбұзушылықтар алаңдатушылық тудырады. Атап айтқанда, мектептің ішкі тәртібін бұзу, үлкенге құрмет көрсетпеу, буллинг пен кибербуллинг, түнгі уақытта үлкендерсіз жүру, зиянды әдеттерге әуестену. Осындай әрекеттердің барлығы заң алдында жауапкершілікке әкелуі мүмкін. Көп жағдайда оқушылар өз әрекетінің салдарын толық түсіне бермейді. 

Кездесу барысында инспектор Қазақстан Республикасының заңдары, жасөспірімдердің құқықтары мен міндеттері, құқық бұзушылықтың салдары, қоғамдық орындарда өзін-өзі ұстау мәдениеті туралы түсіндірме жұмыстарын жүргізді.

Кездесу оқушылардың құқықтық білімін арттырып, заңға бағыну мен тәртіп сақтаудың маңызын түсінуге ықпал етті. Оқушыларға заңды құрметтеу, жауапкершілікті сезіну жөнінде кеңестер берілді.

А.САБАНШИЕВА, 

Талдыбұлақ орта мектебі директорының тәрбие ісі жөніндегі орынбасары.