Ұлы ақынның, ойшылдың бір ғасыр бұрын айтқан әр сөзі – әлі күнге әрқайсымызға азық. Ғибратты сөздерінің өміршеңдігінің сыры да сонда. Тек Абайды танып-білу үшін, оның жанына терең үңілу үшін шығармаларын түсініп оқу да аздық етер. Осы орайда ұлы ақынның 175 жылдығына орай өткізіліп жатқан іс-шаралардың берері мол.
«Қазақ халқы – Абайдың халқы» деген атпен Қаракемер кәсіптік колледжінде өткен әдеби-сазды кеш – сөзіме дәлел. Ақынның образына кіріп, басына тақиясын, үстіне шапанын киген колледж оқытушысы Бекмұрат Мақсұтов төрде Абай атаның өзі отырғандай әсер қалдырды. Сол заманның көрінісін көз алдымызға келтіре алған ұйымдастырушылардың жұмысын ерекше атап өткен жөн. Өйткені оқырман әдеттегі сахнаға емес, Абай дәуіріне зер салып отырғандай күйде болды.
Тағы бір қуантарлық жайт – бәрін студенттерге сілтей салмай, оқытушылардың да сахнада өнер көрсетіп, белсенділік танытуы. «Желсіз түнде жарық ай» әнін колледж мұғалімдері хормен керемет орындап, көпшілікке үлгі көрсетті. Кеште айтылған әр шығарманың шығу тарихына тоқталып, халыққа әдемі жеткізе отырып, оқырманның оны терең түсінуіне жағдай жасады. Әрине, тек тақырыбын айтып, тақылдатып оқып беруден айырма көп бұл жерде.
Өлең де, қара сөз де оқылып, Абайдың әдемі әндері әуеледі. Мың бұрала билеген колледж студенттері оқу орнында тек кәсіптік мамандыққа баулып қана қоймай, әдебиет пен мәдениетке де тәрбиелейтінін аңғартты.
Абайдың өмірбаянынан қысқа-нұсқа мәліметтер келтіре отырып, ұлы ақынның көпшілік біле бермейтін қырларын ашуға тырысқан ұйымдастырушылар жиналған жұртты мол рухани азықпен сусындата алды. Кешке Абай атындағы Қазақ ұлттық педагогикалық университетінен арнайы келген қонақтар да колледж ұжымына алғысын білдіріп тарасты.
Құралай МҰРАТҚЫЗЫ