Жарыстың ашылуында Бекет Ахметов жарысқа қатысушы жеңімпаздарға сәттілік тілей отырып:
– Жастарымыздың спортқа қарай бет бұруы – өте қуанышты жағдай. Әсіресе, бұқаралық спорттың дамуына өз үлестерін қосып жүрген сіздер секілді азаматтарды қанша мақтасақ та артық етпейді. Өздеріңізге белгілі, ауданымыздың футболы бүгінде даму үстінде. Оған дәлел, осыдан 7-8 жыл бұрын аудандық чемпионатты 15-ке жуық командамен өткізетінбіз. Ал бүгінде сол командалардың саны 45-тің айналасында. Оған қоса, көрші аудандардан келіп, чемпионатымызда өнер көрсетіп жүргендер қаншама.
Ал, бүгінгі супер кубокті жеңіп алуға келген қос команда да өткен жылы үздік ойындарымен дараланып, көзге түскен еді. Ауданымыздан сіздер секілді чемпиондар шыға берсін деген ниетпен спорт жанашыры Руслан Қалиев мына стадионға күрделі жөндеу жұмыстарын жүргізуде – дей келе саламатты өмір салтын ұстанудың маңызына тоқталып өтті.
Сондай-ақ, халықара-лық балаларды қорғау күніне орай жас футболшылар – Ташкенсаз жасөспірімдер командасына сыйлықтарын табыстап, ақ батасын берді.
Ойынның бас төрешісі Наурыз Қайыповтың ысқырығы естілісімен, футболшылар ала допты ала жөнелді. Алғашқы тайм басталысымен қос команда да өздерінің осал қарсылас емес екендігін көрсетті. Бір-біріне қайта-қайта қарымта шабуылдар ұйымдастырып, қақпаға қауіпті соққылар бағыттады. Екі команда да ойынның алғашқы бөлімінде жоғарғы деңгейдегі ойын үлгісін көрсетсе де, есеп аша алмады.
Екінші таймда «Автобекет» командасы тылсым күшке ие болғандай. Соққылары нәтижесіз болса да, 10-шы минутта бұрыштама добын сәтті шығара білді. Көтерілген пасты қақпаға бағыттаған «автобекеттік» Александр Богданов есеп ашып, өз командасын жеңіске бір қадам жақындата түсті. Қаражоталықтар да аянып қалмады. Қарсылас қақпасына екі рет жойқын соққы жасады. Бірақ, таразы басын теңестіру мүмкін болмады. Есеп 1:0. Супер кубок иегері – Есік қаласының «Автобекет» командасы. Марапаттау сәтінде жеңімпаздарға кубокті табыстаған Бекет Ахметов ойынның жоғарғы дәрежеде өткендігін айтып, екі командаға да алғысын жеткізді.
Сардарбек НҰРАДИН.
