Жақында аудандық полиция басқармасында ішкі істер саласында ұзақ жылдар қызмет етіп, аудан тәртібінің сақшысы болған Сембай Оразбековты еске алуға арналған волейболдан турнир өтті. Шараға полиция ардагерлер кеңесінің төрағасы, полиция генерал-майоры Сағынжан Асыл-Кеней, полиция генерал-майоры Асқар Оспанов, Сембай Оразбековтың ұлы, Алматы қалалық полиция департаменті басшысының орынбасары Ержан Оразбеков, аудан прокурорының орынбасары Расул Көпбаев,  марқұмның үзеңгілес достары мен жақындары қатысты.

Спорттық шараға келген қонақтар Даңқ аллеясына гүл шоқтарын қойып, қаза болған полиция қызметкерлерінің рухына тағзым жасады. 

– Сембай марқұм 1972 жылы қызметке келді. Еңбегін адал атқарған асыл азамат еді. Еңбекшіқазақ, Талғар аудандарының жасы мен кәрісі Сембай Оразбекұлын сыйлап құрмет тұтатын еді. Себебі, оның халқына, еліне деген сүйіспеншілігі, қызметіне деген адалдығы шексіз болды – деп әріптесін еске алды Сағынжан Асыл-Кеней. Асқар Шуашұлы да өтпелі кезеңде тәртіптің сақшысы болған марқұмның ерлігі жастарға үлгі болу керектігін жеткізді. Әке жолын қуған Ержан Оразбеков әкесінің жүріп өткен жолынан сыр шертіп, ұйымдастырушыларға ризашылығын білдірді. Тоғызбай Нұрсейітов арнау өлеңін көпшілік назарына ұсынды. Ашылу салтанатының соңында бас төреші Бекжан Балтешов жарысқа қатысушыларды ойын ережесімен таныс-тырып, сәттілік тіледі.

Турнирге аудан аумағынан бес команда қатысып, бақтарын сынады. Аудандық полиция басқармасының құрамасы қазақ-түрік лицейінен құрылған «КТЛ», «Шелек», Бірлес», «Есік» командалары өнер көрсетіп, жанкүйерлерге тамаша көңіл-күй сыйлады.

Нәтижесінде, жүлделі І орын аудандық полиция басқармасының волейболшыларына бұйырды. ІІ орынға «Шелек» командасы жайғасты. «КТЛ» ІІІ орынға табан тіреді. Жеңімпаздар Алғыс хаттармен, қаржылай сыйлықтармен марапатталды.

С.НҰРАДИН.