Ауырған адамды емдеп, сырқатынан айықтыру – расында, нағыз бақыт, ерен еңбек. Ақ халатты абзал жандардың қоғам үшін үлкен маңызға ие екенін ескере бермейтініміз де өтірік емес. Бірер жыл бұрын коронавирус кеселі бүкіл әлемнің есін алғанда, өз өмірлерін қатерге тіккен дәрігерлердің қадіріне жеткендей болдық. Маусымның үшінші жексенбісі – елімізде медицина қызметкерлерінің мерекесі. Осы орайда біз елге адал қызмет көрсетіп, алғысқа кенеліп жүрген Қызылжар ауылдық дәрігерлік амбулаториясының тыныс-тіршілігімен таныстық.

Аталған мекеменің меңгерушісі Индира Балтабаева ұжымының жұмысына тоқталды.

– Біздің дәрігерлік амбулаториямыз кезінде 4 ауылдың орталық емханасы болған. Ғимаратымызға келетін болсақ, 1988 жылы құрылысы басталып, 1990 жылдан бері жұмыс жасап келеді. Қазіргі таңда күрделі жөндеуден өтіп, 2023 жылдың қаңтарынан бастап қолданысқа берілді. Ұжымымызда 2 дәрігер, 8 медбике, 2 кіші медбике бар. Барлығы да өздеріне жүктелген міндетті жауапкершілікпен, жоғары деңгейде орындауда, – деген Индира Жұмабекқызы мекеменің қайнаған жұмысымен таныстырды.

Индира Жұмабекқызының айтуынша, аталған амбулаторияның кабинеттері түгел жабдықталған, дәрі-дәрмек тапшылығы жоқ, соңғы үлгідегі ЭКГ аппаратының да көп көмегі тиюде. Емханада күніне 35-40 науқасқа көмек көрсетіледі. Медициналық сақтандыру жұмыстары жақсы жүріп жатыр. Сақтандырылмаған жандардың саны азайып келеді. Бүгінгі таңда 3240 адам тіркеуде тұр.

Біздің Қызылжар ауылындағы дәрігерлік амбулаторияға барудағы сапарымызға себепкер болған Алия Қыстаубаева, Майгүл Миниясова есімді зейнеткерлер болатын. Медицина қызметкерлерінің мерекесі қарсаңында бүгінгі таңда ауылдарындағы амбулаторияның басшысына, ұжымына ризашылықтарын білдіріп, алғыстарын арнағысы келген екен.

– Біз зейнеткер жандар, дәрігерлердің көмегіне жиі жүгінетініміз жасырын емес. Талай дәрігердің алдынан өткеніміз де белгілі. Сондықтан ауылымыздағы қазіргі амбулаторияның сырқаттанған жандарға көрсететін қызметін жоғары бағалаймыз. Ем-шарасынан бөлек жылы жүзбен қарап, мейіріммен сөйлеп, ем іздеп келген жандармен жақсы байланыс орнатады. Ауылымыздағы ақ халатты абзал жандардан көріп жатқан мейірімділік бізді жай жатқызбай, кәсіби мерекелерінің қарсаңында редакцияларыңыз арқылы алғыс білдіріп, шынайы ниетпен құттықтағымыз келді. Бұл жеке біздің ғана емес бүкіл ауыл тұрғындарының пейілі, – деген апаларымыз Қызылжар ауылдық дәрігерлік амбулаториясының қызметкерлеріне ізгі тілегін білдірді.

Р.НАРХАНОВ.