Құс еті-жеңіл сіңімді, диеталық және тұрғындар арасында кең сұранысқа ие өнім болып табылады. Себебі оны дайындау ыңғайлы және тез, онда жануарлар ақуызы, минералдар, калий, кальций, фосфор және дәрумендер бар, сонымен қатар энергетикалық құндылығы жоғары.

Бүгінгі таңда дүкен сөрелеріндегі сатылымдағы құс етінің түрі өте үлкен. Егер сіз осындай еттің белсенді тұтынушысы болсаңыз, қауіпсіз және сапалы өнімді таңдауға көмектесетін мәліметтерді білгеніңіз маңызды.

Құс еті өнімдердің қауіпсіздігіне қойылатын талаптар «Құс еті мен оны қайта өңдеу өнімдерінің қауіпсіздігі туралы» Еуразиялық экономикалық одақтың ЕАЭО ТР 051/2021 техникалық регламентінде айқындалған. Осы регламентке сәйкес жануарлардан алынатын қайта өңделмеген өнім ветеринариялық-санитариялық сараптамадан, қайта өңделген өнім декларациялаудан, ал балалар тағамына арналған құс етінен жасалған өнім мемлекеттік тіркеуден өтуі тиіс.

Құс еті өндіріс процесінде әртүрлі өңдеу әдістеріне ұшырайды,  қайта еріту кезінде бұлшықет тіндері серпімділігін жоғалтады, ал егер өнім ұзақ уақыт сақталса, ол өзінің жағымды дәмі мен хош иісінен айырылады. Бұл процестерді теңестіру мақсатында кейбір өндірушілер еттің салмағын көбейту үшін құстың бұлшықет тініне тұз ерітіндісін, фосфат ерітіндісін немесе жай суды енгізуі мүмкін. Осы ретте, техникалық регламенттің талаптарына сәйкес, құс етіндегі ылғал 4%-дан аспауы керек - ерігеннен кейін құс еті тиісінше жеңіл болуы керек. Егер мұндай мұздатылған қаптамада мұз (қар) немесе тіпті мұздатылған қан бөліктері болса - өнім ең алдымен, еріту арқылы қайтадан мұздатуға ұшырағандығын білдіреді.

Дүкен сөрелерінен құс етінен жасалған өнімдерді таңдау барысында, тағы да қандай талаптарға назар аудару керек?

• Құс етін таңдау барысында тек ұйымдастырылған сауда орындарынан, яғни дүкендер мен базарлардан сатып алғаныңыз дұрыс.
• Қаптамасына назар аударыңыз, зауыттық орамы бүлінбеген болуы және қайта қапталмауы керек. Тамақ өнімдерімен жанасуға арналмаған, ашылған, бүтіндігі (герметикалығы) бұзылған, бүлінген, ластанған қаптамадағы, сұйықтықтың іздері, т.б. ақаулары бар болса- бұл өнімнің сапасыз екендігін көрсетеді.
• Егер өнім көзге жақсы көрінсе, бұл оның «дәмді және пайдалы тағам» екенін білдірмейді. Басқа критерийлерге, яғни өнімнің сыртқы түрі, иісі,  тығыздығы мен түсіне назар аударыңыз.
• Таңбалауына назар аударыңыз, таңбалауда міндетті түрде: өндірушінің атауы және оның мекен-жайы, өнімнің түрі, дайындалған күні мен жарамдылық мерзімі, сақтау шарттары (температуралық режим) көрсетілуі тиіс;
• Егер сіз салқындатылған құс етін сатып алғыңыз келсе, оны полимерлі пакеттерге немесе полимерлі науаларға оралуы керек екенін есте ұстағаныңыз жөн. Өнімде жарамдылық мерзімі, сақтау шарттары көрсетілген, өндіруші туралы мәліметтер, тағамдық және энергетикалық құндылығы, сондай-ақ техникалық регламентте көзделген басқа да ақпарат бар затбелгі болуы тиіс.
• Егер өнім сапасына күмәніңіз болған жағдайда сатушыдан қауіпсіздігін растайтын құжаттарын көрсетуді талап етуге құқылысыз.

Рұқсат етілмеген, жабайы сауда орындардан азық-түлікті сатып алмаңыз! Азық-түлік таңдау кезінде қарапайым ережелерді ұстаныңыз, бұл сіздің денсаулығыңызды және туыстарыңыз бен жақындарыңыздың денсаулығын сақтауға көмектеседі!

Еңбекшіқазақ аудандық СЭББ басшысы М.Азербаев