Аталмыш тақырыпта Т.Молдағалиев атындағы аудандық мәдениет үйінің алдында акция өтті жуырда. Жиынға Есік қаласындағы  «Алтын Адам» және «Айдос» кафелерінің иелері, «Сұлтан» сауда орталығының басшысы, ауылдық округтердің әкімі аппаратының тіл саласына жауапты мамандары, Есік қаласы әкімдігінің мамандары, БАҚ өкілдері және жеке кәсіпкерлер қатысты.

Аудан бойынша халыққа қызмет көрсету нысандары мен қоғамдық көліктердегі деректемелер және көрнекі ақпараттарда, мемлекеттік мекемелердің сыртқы және ішкі хабарландыру тақталары мен ақпараттық тақталарының, жарнамалардың заң талаптарына сәйкес ресімделуін, олардың сауатты жазылуын қамтамасыз ете отырып, бұл іске аудан жұртшылығын кеңінен жұмылдыруды мақсат тұтты.

Аудандық мәдениет және тілдерді дамыту бөлімі басшысының уақытша міндетін атқарушы Ақмарал Қанапина:

Бүгін барлық өңірлерде, «Қазақстан Республикасындағы тілдерді дамыту мен қолданудың 2011-2019 жылдарға арналған мемлекеттік бағдарламасын» орындау мақсатында, 2019 жылдың маусым айынан тамыз айының соңына дейін «Тіл тазалығын сақтайық» акциясы өтеді. Жарнама – бұл тек ақпарат қана емес, тілді қалыптастырушы, тілдің дамуына ықпал етуші құрал, ой мәдениеті, сыртқы жазу мәдениеті. Сондықтан тіл тазалығын алдымен өзімізден, кішігірім жарнамалық мәтіннен бастау керек, – деп шараны ашып, сөз кезегін облыстық  «Тіл» оқу-әдістемелік орталығы» коммуналдық-мемлекеттік мекемесінің Еңбекшіқазақ аудандық филиалының меңгерушісі Нұрсұлу Рахымбаеваға берді. Мемлекеттік тілдің мәртебесі және бүгінгі күндегі жағдайы туралы түсінік беріп, алдағы уақытта атқарылатын жұмыстарға тоқталды. Сонымен қатар, шараға келген жеке кәсіп иелеріне мемлекеттік тілді үйрену орталығына келіп, тегін курстан өтулеріне болатындығын ескертті. Және де латын әліпбиін үйренуге ниет білдірген немесе бүгінгі күнде белең алған жарнама саласы бойынша сауатты аударма жасауда әдістемелік көмек көрсететінін де айта кетті. Шараға келген өзге ұлт өкілдерінің жеке сұрақтарына да жауап беріп, өз тарапынан қолдау көрсетуге дайын екенін білдірді өз сөзінде.

Аудандық «Еңбекшіқазақ» газетінің, «mezet.kz» желілік басылымының  бас редакторы Хайролла Ахметжанов:

–Өзің тұрып жатқан елдің мемлекеттік тілін білмеу тек қонақтарға, ақылы кем адамдарға немесе басқыншыларға ғана тән» деген екен классик. Сондықтан заң бойынша да, өмірдің талабы бойынша да орыс тілінде оқыған қазақ азаматтарына да, басқа диаспоралардың өкілдеріне де мемлекеттік тілді білу – парыз. Сонымен қатар, жарнама, хабарландыру мекемелердің, кәсіпорындардың маңдайшалары сауатты да заң талабына сәйкес болу керек. Яғни, мәтін алдымен мемлекеттік тілде содан кейін ресми тілде жазылуы керек. Бұдан басқа, жарнаманың сауаттылығы және оның көркем болуы, дизайнының көз тартатын болуы мәдениетіміздің бір бөлігі десек артық емес. Сондықтан біздің аудан орталығындағы, елді мекендердегі жарнамалар көңілге қонымды емес, – деп аудандағы ірі сауда орындарындағы, сауатсыз жарнамаларды атап көрсетті.

Сондай-ақ, Қ.Сатпаев атындағы орта мектептің информатика пәнінің мұғалімі Асия  Сулиева қазақ тілін жетік меңгерген өзге ұлт өкілі ретінде сөз мәдениеті ғана емес,  жазу мәдениетіне де аса мән берген жөн екендігін баса айтты. Себебі сыртқы жазу мәдениеті көзге таңбадай басылып, тілдің мәртебесіне нұқсан келтіретін құбылыс дей келе, жазу мәдениетінің сауаттылығына мән берсек деген идеясын алға тартты.

Шара соңында Ақмарал Абдоллақызы туған тілімізді шұбарламай, мәдениетті, тұнық, анық сөйлеуге, ауданымыздың айнасы болатын жарнамаларымызды жарыққа шығарарда сауатты және жоғары деңгейде көрсетуге атсалысуға шақырды.

Сонымен қатар, ауылдық округтердің әкімі аппаратынан келген тілге жауапты мамандарға акцияның басталғандығын еске салып, жұмысшы топтың округтерге шығатын ескертті. Жеке кәсіп иелерімен аралау барысында қандай заңдылыққа тоқталу керектігіне де тоқталды.

Жансая ЫСҚАҚ