Арнайы жұмыс сапармен облыс аумағын аралап жүрген аймақ басшысы Марат Сұлтанғазиев ауданға ат басын тіреді. Өндіріс орындары мен құрылыс нысандарына барып, жауапты мекемелерге тапсырмалар жүктеді.

Марат Елеусізұлы алдымен Қойшыбек ауылындағы «Asia Pets» ЖШС-нің үй жануарларына арналған дайын жем өндіретін зауытының жұмысымен танысты. Серіктестік құрылтайшысы Руслан Іргебаев цехты аралатып, өнім түрлерін көрсетіп, келешектегі жоспарларымен бөлісті. Былтыр қыркүйек айында іске қосылған өндіріс орнына 500 млн теңге көлемінде инвестиция тартылған. Бүгінде 25 адам тұрақты жұмыспен қамтылған. 1000 шаршы метр болатын өндіріс цехы сағатына 500 кг өнім өндіреді.

Бұдан бөлек облыс басшысы Есік қаласында салынып жатқан көпқабатты тұрғын үйлердің құрылысымен танысты. Мердігер мекеме «SHEBERBUILD» ЖШС салып жатқан тұрғын үйдің жалпы жоба құны 2,9 млрд теңге. Бүгінде 1,8 млрд теңгесі игерілген. Жұмыс сапасын көрген Марат Елеусізұлы биылға жоспарланған межені орындау қажеттігін қатаң тапсырды мердігер мекеме өкіліне.

Сонымен қатар, Марат Сұлтанғазиев белгілі себептермен құрылысы сағызша созылған Есік қаласындағы Абылайхан атындағы орта мектептің ғимаратына да арнайы барды. 1938 жылы қолданысқа берілген оқу ғимараты осыдан екі жыл бұрын күрделі жөндеуге жабылған. Бүгінде құрылыс жұмыстары аяқталуға жақын. Облыстық білім басқармасы басшысының айтуынша, жөндеу жұмыстары қараша айында аяқталуы тиіс. Нысанды аралап, ауланың абаттандыруымен танысқан аймақ басшысы басқарма басшысы мен мердігер мекеме басшысына бірқатар тапсырмалар жүктеді.

С.НҰРАДИН.