Құрметті Еңбекшіқазақ ауданының тұрғындары!

Әлемдердің Раббысы Алла Тағалаға шексіз шүкірлер және сүйікті пайғамбарымыз Мұхаммедке сансыз салауаттар болсын.

Сіздерді кіріп келген шарапаты мол, қасиетті Рамазан айымен шын жүректен құттықтай отырып, отбасыларыңызға амандық, дендеріңізге саулық тілеймін.

«Әрбір ақылдыға иман парыз, әрбір имандыға ғибадат парыз» деп Абай атамыз айтқандай, ораза ұстау күллі мұсылман қауымына Алла Тағала бұйырған бес парыздың бірі. Алла елшісі с.ғ.с. бір хадисінде: «Кім шын иманмен сауабын үміттеніп, Рамазан айының оразасын ұстайтын болса, бұрынғы және кейінгі күнәлары кешіріледі» деген.

ҚМДБ-ның шариғат және пәтуә бөлімінің ұйғаруымен биылғы Рамазан айы 24-сәуірден басталады. Қасиетті Қадір түні 19-мамырдан 20-мамырға қараған түнге сәйкес келеді. Сонымен қатар, биылғы жылдың пітір садақасы 370 теңге болып бекітілді. Пітір садақасы Рамазан айының басталуымен Ораза айт намазы оқылғанға дейін берілуі қажет. Сондай-ақ, Ораза айт намазы 24-мамыр күні таңғы сағат 6-30 да оқылады.

ҚМДБ-ның төрағасы, Бас мүфти Наурызбай қажы Тағанұлының хабарлауымен елімізде болып жатқан індетке байланысты Рамазан айында оқылатын тарауих намазы мешіттерімізде оқылмайды. Тарауих намазын үйімізде отбасымызбен оқуға кеңес берілді.

Алла Тағала ұстаған оразамызды қабыл етіп, жер бетінде орын алған аталмыш індеттен баршамызды сақтасын. Еліміз аман, жұртымыз тыныш болғай. Әмин!

Сапархан Айдарханұлы, 

Еңбекшіқазақ ауданының бас имамы