Өзін ғана ойлаған –

Жамандықтың белгісі.

Өзгені де ойлаған –

Адамдықтың белгісі.

Үлгілі сөз білмеген –

Надандықтың белгісі.

Бар-жоғына қарамас

Анық жомарт  – ер кісі.

Шағырай шешеннің осынау жолдары бүгінгі күніміздің айқын көрінісі болып отыр. «Қашанда алған қолдан берген қол қайырлы» демекші, еліміздегі жағдайға байланысты Рахат ауылдық округіне қарасты 4 саяжай карантинге жабылды. Осындай қиын шақта мұқтаж жандарға көмек қолын созған, Рахат ауылдық округінің әкімі Қуат Ақшабаевтың бастамасымен әлеуметтік жағдайы төмен, көпбалалы, аз қамтылған жалғызбасты 100 отбасына азық-түлік таратылды.

Мына мың құбылған заманда біреуге бермек түгілі, өз басын асырай алмай жүрген адамдар қаншама. Дегенмен, олардың жақсылық, қайырымдылық жасауға деген ниеттерін көргенде еріксіз елжіреп кетесің. «Жақсының жақсылығын айт, нұры тассын» демекші, ауыл адамдары қолдарынан келген көмектерін аямай, әлеуметтік жағдайы төмен отбасыларына өз еріктерімен азық-түлікпен қатар көмір таратып, барынша жәрдемдесіп жатыр.

Қайырымдылық кез келген қоғамның және сол қоғамда өмір сүріп жатқан азаматтардың рухани кемелдігінің белгісі болып саналады. Мемлекеттен қолдау күтпей-ақ, көмекке мұқтаж жандарға қол ұшын созып, жауапкершіліктің бір бөлігін өз мойнына алатын азаматтар елімізде аз емес. Көпке үлгі болар қайырымдылық мәдениетін дамытуға бағытталған игі шаралардан өңір тұрғындарының тыс қалмағандығы қуантады.

Мақпал Шажабаева,

саяжай тұрғыны