Ауданның білім бөліміне қарасты 84 мектепте балаларды қорғау күніне орай мемлекеттік саясатты балалардың мүдделері үшін іске асыруға және олардың құқықтарын қамтамасыз етуге қоғамның назарын аудару мақсатында «Барлығы балалар үшін» ұранымен республикалық акция басталды. 20 мамыр 20 маусым аралығында өткізілетін акция барысында түрлі фестиваль-конкурстар, анимациялық шоу, акциялар, сахналық қойылымдар қашықтықтан әртүрлі форматта ұйымдастырылады. Сондай маңызды оқиғалардың бірі болып табылатын, тұңғыш ашық әнші балалар фестиваль-конкурсы 1-2 маусым аралығында өнерлі отбасы байқауларымен ұштаспақ.

Ерекше назар қиын жағдайдағы балаларға, жетім балаларға, ата-анасының қамқорлығынсыз қалған балаларға, мүгедек балаларға, аз қамтылған отбасындағы балаларға аударылады.

Акцияны балаларға арналған іс-шаралар өткізуді қамтитын 7 тақырыптық блоктарда өткізу ұсынылады. Атап өтсем, «Бала және отбасы», «Балаға мейірімді қала», «Бала құқығы – адам құқығы», «Нұрлы жол – болашаққа бастар жолым!», «Балалық шақты қорғау қоғамы», «Табысты болу құқығы» және «Құқықтық сағат». Аталмыш тақырыптар аясында түрлі іс-шаралар балалар игілігі үшін ұйымдастырылады.

Сөз соңында ел ертеңіне ашық аспан, бейбіт өмір, сәбилерге бақытты балалық шақ, әрқашанда сыңғырлаған күлкі тілеймін.

Бәтес АМАНОВА,

білім бөлімінің басшысы