«Біз біргеміз» акциясы аясында елдің түпкір-түпкірінде жасалып жатқан игі істердің қатары көп. Қазіргі қиын-қыстау кезеңде кез келген көмектің игілігін әрқайсымыз жіті түсіндік. Қолымыздан келгенінше көмегімізді аямау – адами парызымыз.
«Нұр Отан» партиясының бастамасымен Еңбекшіқазақ ауданындағы «Атамекен» ұлттық кәсіпкерлер палатасы Іскер әйелдер кеңесінің тікелей қатысуымен ауданымыздағы 3600 көпбалалы отбасын бетпердемен қамту үшін алғашқы 1000 дана маталы бетперде тігілді. Мұның бәрі де тегін таратылады. Бірнеше рет жуып қолдануға болатын бұл бетперделер таза мақта матадан тігілген.
Бұл бетперделер (гигиеналық тұмшаларды) ауданның Іскер әйелдер кеңесінің мүшесі, «Атамекен» ҰКП 2019 жылғы «Жас кәсіпкер» бағдарламасының түлегі, Есік қаласында орналасқан ЖК «Тынайбекова Г. К.» бизнес-тігін цехы бар Әсем Тынайбекованың басқаруымен тігіп шығарылды. Тігін цехын анасы Гүлнар Қожанқызы Тынайбекова басқарады. Ел басына күн туғанда бірігіп іс қылу – ортақ парыз. Ендеше, бірлігімізге сызат түспей, ел іргесі бүтін болсын.
Шолпан ҚАСЫМБАЕВА,
Еңбекшіқазақ ауданы «Атамекен» ҰКП Іскер әйелдер кеңесінің төрайымы.