Қазіргі қысылтаяң шақта тәртіпке бағынудың маңызы зор. Өзіміздің ғана емес, өзгенің де өміріне қауіп тудыратынымызды ескеріп, әр қадамды аңдап басқанымыз абзал. Десе, жауапкершілікті ұмытып, шектеуге құлақ аспайтын азаматтар да баршылық.

Оның айқын мысалы – ауданымыздағы Көксай саяжайының тұрғыны А.Е-нің әрекеті. 2020 жылы 24 наурызда 01 сағат 00 минут шамасында, төтенше жағдайдың жариялануына байланысты мемлекеттiк орган белгiлеген режим бойынша үй карантинінде болуға міндетті А.Е. талаптарды орындамай, өзінің үйден «Алтын Орда» сауда базарына шығып кеткен. Осы әрекетімен ол өзіне де, қоғамға да қауіп тудырғанын айта кету керек.

Бүгінде А.Е. өз кінәсін толығымен мойындап, әкімшілік құқық бұзушылыққа барғанын растады. Сот іс құжаттарын зерттеп, А.Е-нің түсініктемесін, аудан прокурорының көмекшісінің іс бойынша айыппұл салу қорытындысын тыңдады.

Азамат А.Е-ні Қазақстан Республикасы Әкімшілік құқық бұзушылық туралы Кодексінің 476-бабының 2) тармағында көрсетілген әкімшілік құқық бұзушылықты жасағандығы үшін кінәлі деп танып, оған осы бап бойынша әкімшілік жаза ретінде 26 510 (жиырма алты мың бес жүз он) теңге әкімшілік айыппұл салынды. Әкімшілік жауапқа тартылған адам айыппұлды қаулы заңды күшіне енген күннен бастап отыз тәуліктен кешіктірмей төлеуге тиіс.

Қаулыға риза емес жақтар Алматы облыстық сотының апелляциялық сот алқасына, Еңбекшіқазақ ауданының соты арқылы 10 (он) күн ішінде шағым және апелляциялык өтінішхат беруі мүмкін.

Жоғарыда келтірген мысалымыз баршамызға сабақ болады деп сенеміз. Қоғамды құраушы – біздің әрқайсымыз. Ендеше, қоғам алдындағы жауапкершілігімізді сезіне білейік.

М.А.Садыков, судья