Құрметті жерлестер!
«Заманың түлкі болса, тазы боп шал» деген екен көнекөздеріміз. Расында, білекке емес, ілім-білімге сенетін дәуір есігін аштық. Алпауыт елдермен тереземіз тең болуы үшін өз ісінде тыңнан түрен салар жүрегінде жалын, көзінде оты бар жас буын тәрбиелеуіміз тиіс. Бүгінгі мемлекеттік саясат осы бағытқа басымдық беріп отырғаны ақиқат.
Ұлт Көшбасшысы, Nur Otan партиясының төрағасы Нұрсұлтан Назарбаевтың бастамасымен биылғы жылдың 17 тамызынан партияішілік праймериз бастау алды. Мұндағы мақсат айқын: ел дегенде еміреніп, жұрт дегенде жұмыла іс қылатын көшбасшыларды іріктеу. Сол арқылы ертеңгі күні елдің тізгінін ұстайтын нағыз кәсіби кемелді азаматтардың қатарын толықтыру. Осынау тұңғыш рет өткізіліп отырған республикалық партияішілік праймеризге өтініш білдіру 17-28 тамыз аралығында жүргізіледі. Егер Сіз аталған бәсеке бәсінде бағымды сынаймын десеңіз, мүмкіндігіңізді мүлт жібермеңіз.
Додаға түскен кандидаттардың үгіт жұмыстары 7 қыркүйектен 3 қазанға дейін жүргізілмек. Сәйкесінше, 14-30 қыркүйек аралығында жария пікірсайыстар өткізу қарастырылған. Өкінішке қарай, еліміздегі пандемия жағдайына байланысты партияішілік сайлауда онлайн форматта дауыс беру қалыптастырылды. Жоғарыда атаған пікірсайыстар партияның ресми аккаунттарында таратылатын «Праймериз» ақпараттық жүйесі арқылы өткізілмек.
Праймериздің қорытынды кезеңінде 1-3 қазан аралығында нұротандықтар мобильдік қосымша және арнайы веб-портал арқылы электронды дауыс бере алады. Интернет байланыстан қиындық тудырған елді мекен тұрғындары дауыс беру учаскелеріне келіп, қағаз бюллетендер арқылы таңдауын жасауға мүмкіндіктер қарастырылады.
Бүгінде ауданымызда 11 мыңға жуық Nur Otanдықтар бар. Әлбетте, «Кемедегінің жаны бір». Демек, біздің мақсат ортақ: әлеуметіміздің әлеуетін арттырып, елімізді жаңа деңгейге көтеру. Ендеше, ортақ мақсат жолында орайласатын сәт туды. Осынау саяси бәсекеде әрбіріміз белсенділік таныту арқылы жарқын болашаққа жол саламыз. Мұндайда қазақ «Кеңеспен шешкен шешімнің кемісі болмайды» дейді. Лайым, ынтымағымыз ыдырамасын, бірлігіміз бүлінбесін!