Жадырап жайнаған гүл көктемнің сұлу мерекесі қарсаңында аудан әкімі Бинәлі Ысқақ ауданымыздағы қыз-келіншектер мен ақ жаулықты аналарымызды «Алатау-Холл»

мейрамханасында

ақ дастархан басында құттықтады.

Жыл сайын дәстүрге айналған шараға мәслихат хатшысы Бекет Ахметов, әкім орынбасары Айбек Бидаев, облыстық мәслихат депутаты Жангелді Осан, кәсіподақ төрағасы Ильян Жәкеев қатысып, аруларға ақ тілектерін жеткізді.

Алғашқы болып сөз алған аудан әкімі бұл жолы барлық аналардың жүрегін тебірентті. Ізгі ниетін білдірген Бинәлі Әбдіқапасұлы:

– Ана – құдіретті күш, асыл жан. Оларға қандай жақсылық жасасақ та борышымызды өтей алмаймыз. Ақындардың ана жайлы өлеңін оқыған кезде мен де осы әдемі шумақтарды анама арнасам екен дейтінмін.

Шеше, сен бақыттысың жыламағын,

Жай түсіп жатқанда да құламадың.

Тәңіріңнен мен едім ғой сұрағаның,

Сондықтан жыламағын, жыламағын – деп, Мұқағали Мақатаевтың «Шеше, сен бақыттысың, жыламағын» атты өлеңін оқып, аналар қауымының шексіз ризашылығына бөленді. Анаға деген шексіз махаббатты бір өлеңге сыйғызған ақиық ақынның өлеңдеріне жүректері елжіреген көпшілік, еріксіз көздеріне жас алды. Бинәлі Әбдіқапасұлы шараға шақырылған әрбір анаға гүл шоқтары мен сыйлықтарын ұсынып, Алғыс хаттармен марапаттады.

Кейіннен, Бекет Ахметов, Ильян Жәкеев ақ тілектерін арнады. Жангелді Осан отбасының емес, елдің анасы атанып, көпке үлгі болып жүрген ақ жаулықтыларға қаржылай сыйлық жасап, ақ батасын алды.

Қуаныш Сарбасова, Көкен Өтегенова, Алмагүл Орынбетова, Күлжамал Табаева, Земфира Брушкевич сынды асыл жандар жиылғандардың атынан алғыстарын жеткізді.

С.НҰРАДИН