Күні кеше аудан әкімі Бинәлі Ысқақ өз ортасынан озық шыққан, әр салада табысты еңбек етіп жүрген үздік жас аруларымызбен кездесіп, мерекелерімен құттықтады. Аудан бойынша 30-дан астам нәзік жанды сұлуларымыздың басын қосқан дөңгелек үстел еркін форматта өтті. Оған аудандық мәслихат хатшысы Бекет Ахметов, аудан әкімінің орынбасары Айбек Бидаев қатысып отырды.

Алғаш сөз алған аудан басшысы Бинәлі Әбдіқапасұлы ауданның өсіп-өркендеуі жолында қыз-келіншектердің ерен еңбегі бар екенін атады:

– Құрметті қыр гүліндей құлпырған қарындастарым, Сіздердің аудан дамуына қосып отырған үлестеріңіз орасан. Айталық, аудандағы 86 мектептің 80 пайызын әйелдер басқарып отыр. 7000-нан астам ұстаздар болса, оның 4000-ға жуығы нәзік аруларымыз. Сонымен қатар 87 медициналық орталықтарымыздың 27-сінің тізгінін де әйел азаматтар ұстап отыр. Бұл дегеніміз, республика бойынша ең үлкен салалар санатындағы білім мен денсаулықтың ауыр жүгін өздеріңіз арқалап жүргенді байқатып отыр. Басқа салаларда да Сіздердің табысты еңбектеріңіз бар, – деді.

Ашық әңгіме барысында аруларымыз да алғыстарын жеткізді. Жүйелі жоспар нәтижесінде аудан жастарына көрсетіліп жатқан риясыз қамқорлықты да айтты. Қорытындысында, барша дөңгелек үстелге қатысушылар аудан әкімінің Алғыс хаттарымен марапатталып, қошеметке бөленді. Дөңгелек үстелді қорытындылаған Бинәлі Әбдіқапасұлы:

– Кезінде «Қазақстанның Швейцариясы» деген зор кұрметке ие болған Еңбекшіқазақ ауданы бүгін де сол биігінен түскен емес. Шыбық тіксең, тал болған топырағы құнарлы, табиғаты көркем ауданымызбен мақтануымыз тиіс. Етегінде Алтын адам табылса, төрінде не жатқаны бір Аллаға ғана аян. Сондықтан оның құпиясын ашу, ауданның өркендеуі жолында үздіксіз еңбек ету – Сіздердің құзырларыңызда. Осы жолда Сіз біз боп ынтымақтаса жұмыс істеуге шақырамын! – деді.

Мерекелік шара «Алатау Холл» мейрамханасында ақ жаулықты аналарымызға құрмет көрсетумен жалғасты. Толығырақ 3-бетте.

Қайнар ЖҰМАҒОЖА.