Қарашаның 5-7 күні Қазақстан Республикасы Тәуелсіздігінің 30 жылдық мерейтойы құрметіне арналып, Ащысай ауылының Ш. Уәлиханов атындағы мектепте осы ауылдың тумасы, аталған мектепті бітіріп, алтын ұядан арман – қияға қанат қағып, спорт қайраткері атанған Үметбеков Талғат Әшімұлының жүлдесіне арналған бокстан 2006-2012 жыл аралығындағы жасөспірімдер арасында Еңбекшіқазақ ауданының №2 балалар мен жасөспірімдер спорт мектебінің ашық біріншілігі өтті.
ҚазМУ-дің физика факультетінде оқып жүріп, бос уақытында бокспен айналысқан Талғат 1973 жылы Алматы қаласының студенттері арасында өткен жарыста 57 кг салмақ бойынша жеңімпаз атанады. Кейінгі жылдары әртүрлі турнилерге қатысып, жүлделі орындарды иеленеді. 1975 жылы «Еңбек» спорт қоғамының Қарағанды қаласында өткен ел біріншілігінде алтыннан алқа тағады. Келесі жылы Өскемен қаласында өткен республикалық ашық біріншілікте тағы да жеңімпаз атанады. Сол жылы студенттердің ХІV спартакиадасының таңдаулы командалық біріншілігінде күміс медальдың иегері болды. Ал 1978 жылы Қапшағай қаласында өткен ел біріншілігінде тағы да чемпион болды. Өзі оқыған Ащысайдағы мектепте жұмыс істеп жүріп, жасөспірімдерді бокстан жаттықтырып, аудан, облыстық жарыстарға қатыстырып, талай жеңімпаз, жүлдегер шәкірттерді тәрбиелеп шықты. Сол мектептің директоры да болып, еңбегі еленген тұлға, аптал азамат атанды.
Жерлестері ардагер азаматтың спорттағы жеңісін ұрпақтарға үлгі етіп, ауданның 18 ауылынан және Есік, Талдықорған, Алматы қалаларынан келген командалар арасында жарыс ұйымдастырыпты. Оған спорттың шыңына шыққан танымал ардагер саңлақтар – Қазақстан республикасының еркін күресі бойынша құрама командасының еңбек сіңірген бас жаттықтырушысы Мәлік Надырбеков, Қазақстан Республикасының еңбек сіңірген және Сидней олимпиадасында бокстан бас жаттықтырушы болған Тұрсынғали Еділов, ережесіз жекпе-жектің, кикбокстың майталман ардагері, КСРО-ның еңбек сіңірген шебері Сабыржан Махметов, кикбокстан халықаралық спорт шебері, әлем кубогінің иегері, қазір Шелек өңірі бойынша БЖСМ-нің директоры Елмұрат Қайыпжанов, Қаратұрық ауылдық округінің әкімі Айбек Ілебаев қатысып, сөз сөйледі. Ауыл ақсақалы Сайын Өміржанов, батагөй Асылбек Сүлейменов ақсақал жылы лебіздерін білдіріп, баталарын берді. Қонақтар мен ардагер спортшыға шапан жабылып, ауылдастары қонақжайлық құрмет көрсетіп, дастархан жайылды. Жарыста бақ сынасқан 350-ге жуық жас боксшының топ жарған 48-і алтын, 48-і күміс, 91-і қола медальдар, мақтау қағаздары мен заттай сыйлықтармен марапатталды. Команда бойынша Ащыбұлақ ауылының жас боксшылары бірінші, Қазақстан ауылы екінші, Асысаға үшінші орынды иеленді. Иә, ел болашағы – жастар тұлғаларға қарап бой түзеп, азамат болып өсері хақ.
Анарбек БЕРДІБАЕВ.
