2026 жылдың ақпан айында күллі мұсылман адам үшін қасиетті Рамазан айы басталады. Бұл ай – сабыр мен шүкіршілікке, рухани тазару мен ізгі амалдарға үндейтін ерекше кезең.

Рамазан – Құран Кәрім түскен, Алланың рақымы мен кешірімі молынан нәсіп болатын ай. Бұл айда парыз етілген ораза – исламның бес парызының бірі әрі пендені тақуалыққа жетелейтін ұлы ғибадат (Бақара сүресінің 183-185 аяттары). Ораза ұстау тек таңнан кешке дейін ішіп-жеуден тыйылу емес. Ол – нәпсіні тәрбиелеу, жүректі тазарту, сабыр мен шүкірді арттыру. Рамазан айында мүмін адам тілін ғайбат пен өсектен, көзін харамнан, жүрегін жаман ойдан сақтауға ұмтылады. Пайғамбарымыз Мұхаммед (с.ғ.с.): «Кімде-кім Рамазан айында шынайы иманмен және сауабын Алладан үміт етіп ораза ұстаса, оның өткен күнәлары кешіріледі», – деген. Кешірім жасау, мұқтажға көмек көрсету, құран хатым ету, пітір садақа беру сияқты сауапты амалдар орындалады.

Қазақ халқы үшін Рамазан айы ежелден береке мен бірліктің, өзара сыйластықтың айы болған. Дәстүрлі ислам құндылықтары ұлттық салт-санамен үйлесім тауып, қоғамда татулық пен түсіністікті нығайтуға қызмет етіп келеді.

Алла Тағала ұстаған оразаларымызды, жасаған игі амалдарымызды қабыл етіп, Рамазан айын баршамыз үшін рухани жаңару мен берекенің айы етсін.

Н.КУШИМБАЕВ,

Саймасай ауылы UAIS

мешітінің имамы.