Ават ауылындағы мәдениет үйінде  бокстан Сидней олимпиадасының чемпионы, халықаралық дәрежедегі спорт шебері Ермахан Ибраимовпен кездесу өтті. Жиынға ішкі саясат, мәдениет, тілдерді дамыту және спорт бөлімінің басшысы Ерболат Сарабеков, округ әкімі Тимур Сүлейменов,  ауыл белсенділері  мен мектеп оқушылары  қатысты. «Туған елдің жалауын жат жерде желбіретіп жүрген азаматтар жоқ емес. Әсіресе, спорт саласындағы былғары қолғап иелерінің еңбегі ерекше. Оның талай чемпиондарды дайындауда аянбай тер төгіп жүргені де үлгі боларлықтай іс», - деп Ерболат  Сарабеков  келген қонаққа сөз кезегін берді.

Бір сағатқа созылған сұхбат барысында мектеп оқушылары тарапынан түрлі сұрақтар қойылып, тұшымды жауаптар алынды.

– Спортқа ең алғаш 10 жасымда аяқ бастым. Сол кездері Жақсылық Үшкемпіров пен Серік Қонақбаевты үлгі тұттым. Ең үлкен жетістігім, ол – Сидней олимпиадасындағы жүлде. – деп әңгімесін бастады боксшы. Ол Кеңес дәуірі тұсындағы бокс пен бүгінгі тәуелсіз Қазақстанның боксын салыстырып, елімізде жастардың спортпен айналысуына барлық жағдай жасалғанын жеткізді.

Сондай-ақ, Ермахан ағамыз Қазақ боксының керемет жұлдызы болған Бекзат Саттарханов туралы тебірене сөз қозғап, жастарға үлгі боларлық тұстарын атап өтті.

– Бекзат Саттарханов – тек қана Қазақстан боксының емес, әлемдiк бокстың эталонын көрсеткен боксшы. Керемет техникасы, керемет еңбекқорлығымен қатар, керемет намысты жiгiт едi ғой. Әттең, жұлдыздай жарқ еттi де, ортамыздан кете барды. 20 жасында биік белесті бағындырып, Қазақстанның ғана емес, бірден Олимпиада чемпионы атанған Бекзаттың бойындағы намыс пен қайрат әрбір қазақ жастарының бойында болуы тиіс деп ойлаймын, – деді.

Кездесу соңында жиналған жастар  бүгінгінің батырымен ес-телік суретке түсіп, кездесуден ерекше әсермен тарқасты.

Е.АСЫЛ.