Өткен демалыста  Есік қаласындағы  орталық   стадионда футболдан  аудандық чемпионат  өз  жалауын желбіретті.

Айбынды Әнұранмен    басталған спорттық  шараға аудандық  ішкі саясат, мәдениет және тілдерді дамыту, спорт бөлімі басшысы  Дархан Ахметов пен   орынбасары Ермек Самсыбеков, спорт мамандары мен футбол жанкүйерлері  қатысты. Жарыстың ашылу салтанатында қатысушыларға сәттілік тілеген  Дархан  Ахметов  футбол ойынының  маңызына тоқталып өтті: 

Бұрын ауданымыздың біріншілігінде  30-дан астам команда  жүлдеге таласатын.  Арада үзіліп қалған доп додасы бүгін қайта  жалғасын тапты.  Жарысқа  үмітін үкілеп келген  барша  командаларға сәттілік  тілеймін. Бұл додадан жүлде алған командалар, облыстық жарыс-тарда да үздіктер қатарынан көрінетін болады. Кезінде ауданымыз облыс көлеміндегі  талай футбол додасына топ жарған болатын. Біз сол дәстүрді қайта жалғастырумыз керек, – деді. Жарыс шымылдығын  Қазақстан  ауылдық округі мен Қаракемер  ауылының  командасы ашты. Аталған  доп  додасына  ауданның бас төрешісі Наурыз Сетнасипов  төрелік етті.

Төрешінің ысқырығы шалынысымен  командалар ала доптың аламанын  қыздыра түсті. Осылайша, 1 таймда есеп ашылмады. Ойынның екінші бөлімі де командалардың бір-бірінің қақпасына жасаған қарымта шабуылдарымен басталды. Қазақстан ауылының футболшылары қарсыластың қақпасынан саңылау тапты.  Алайда ойын соңына таман өз  қақпасының жанында қазақстандық  футболшы ойын ережесін бұзып, қаракемерліктер  айып добын соғып, есепті  теңестірді.

Ал екінші кездесуде Көктөбе ауылдық округінің  командасы қырбалтайлықтарды 2:1 есебімен тізе бүктірді.   Аудандық  ішкі саясат, мәдениет және тілдерді дамыту, спорт бөлімінің мәліметінше, осы жылғы чемпионатқа 8 команда қатысып, өз бақтарын сынайды. Аудандық доп додасы демалыс күндері жалғасын тауып, ай соңында мәресіне жетеді.

Е. АСЫЛ.