Бейсенбі, 30 Мамыр 2024 13:31

Жаһан жүйрігінің жүлдесі

Жуырда Есік қаласындағы дене шынықтыру-сауықтыру кешені алаңында аты әлемге әйгілі атлет, КСРО-ның спорт шебері, ҚР құрметті спорт қайраткері, әлемдік марафондардың бірнеше дүркін чемпионы, елімізге еңбек сіңірген жаттықтырушы Алпыс Ермағамбетов атындағы марафон өтті.

Жарыстың ашылу салтанатында аудандық №1 балалар мен жасөспірімдер спорт мектебінің директоры Абай Сырғабаев, мәдениет, тілдерді дамыту, дене шынықтыру және спорт бөлімінің бас маманы Аманжол Ақанбаев құттықтау сөз алып, спортшыларға сәттілік тіледі. Құттықтау сөз алған жарыс иесі Алпыс Арықбайұлы да өз кезегінде жеңіл атлетика – спорттың падишасы екенін тілге тиек етіп, асыл спортқа көңіл бөлу, барынша дамыту қажеттігін айтты.

Ақши ауылы Бөлек батыр атындағы орта мектептің дене шынықтыру пәнінің мұғалімі Берік Медалханұлы:

– Спортпен тұрақты түрде алпыс жылдан астам уақыт айналысып, әлем марафондарының бірнеше рет жеңімпазы атанған, экватор бойымен жерді 5 рет айналып өткен рекордшы, сансыз белесті бағындырған Алпыс Арықбайұлы ұлтымыздың ұлы спортшысы, ұрпақ мақтанышы, – деп спорт ардагеріне алғысын білдіріп, саламатты өмір жолына тоқталып, даңқты спортшының иығына шапан жапты.