Жерлесіміз, Шелек ауылының тумасы Інжу Баққожа U 17 Әлем Чемпионатында 43 келі салмақ дәрежесінде еркін күрестен қола жүлдегер иесі атанды.

7-тамыз күні Шелек ауылының мәдениет үйінде Грекия мемлекетіндегі Афина қаласында өткен әлем чемпионатында жүлделі ІІІ орын иеленіп, елге оралған Інжу Баққожаны тұрғындар зор қуанышпен қарсы алды.

Алғашқы жаттығуын №2 Шелек балалар мен жасөспірімдер спорт мектебінде бапкер Анаят Зайнаудиновтың қарамағында бастап, шеберлігін шыңдаған Інжу, еркін күрестен үш дүркін Қазақстан Республикасының жеңімпазы атанған.

2024 жылы Ресей Федерациясы Якутияда (Саха) өткен сегізінші халықаралық «Азия балалары» ойындарының күміс жүлдегері. Вьетнам мемлекеті Вунгтау қаласында жасөспірімдер арасында өткен Әлем чемпионатында күміс медальға қол жеткізді..

Міне, енді Афинадағы әлем чемпионатында қола медальды қанжығасына байлап, беделі өсіп, елге оралды. Шелек ауылы әкімінің орынбасары Бауыржан Доғалов батыр қыз – Інжуді құттықтап сөз сөйлеп, әкімнің алғыс хатын, гүл шоғы мен сыйлығын табыстады. Ауыл ақсақалы Елеусіз Сұлтанғазиев ақсақал батасын беріп, жақсы тілегін жеткізді. Алдағы уақытта да әлемдік деңгейдегі жарыстарда үлкен жеңістер тіледі.

Анарбек МӨКІШҰЛЫ.