Осы аптада аудан әкімі Бинәлі Ысқақ Азия чемпионатында жүлдегер атанған ауданымыздың қос жұлдызын қабылдады.

Осы айда Өзбекстанның Ташкент қаласында өткен самбодан Азия чемпионатында 3 орын алған Аружан Арман 44 кг салмақ дәрежесінде өнер көрсеткен. Бапкері Абай Сырғабаев. Ал Мақпал Ерболатқызы 80 кг салмақ дәрежесінде Біріккен Араб Әмірлігінің Аль-Фуджера қаласындағы жасөспірім ұлдар мен қыздар арасында бокстан Азия чемпионатынан қола жүлдемен оралған.  Былғары қолғап шеберінің бапкері бокстан халықаралық дәрежедегі АІВА төрешісі Тілек Манап.

Қос спортшыны бапкерлерімен қабылдап, гүл шоқтары мен сыйлықтарын табыстаған аудан басшысы спортшыларға жағдай жасау керектігін алға тартты. Көпбалалы отбасынан шыққан қыздарға еш нәрсеге алаңдамай, тек спортпен айналысуды тапсырды. Ал туындаған қиындықтарды аудан әкімдігі өз мойнына алады.

– Спортшының бар ойы спортта, жаттығуда болу керек. Ол отбасының проблемасына, қаржылық мәселелерге алаңдамауы тиіс. Сондықтан, олардың отбасына тиісті көмек беріп, қол ұшын созу – біздің міндетіміз – деген Бинәлі Әбдіқапасұлы өзінің орынбасары мен спорт бөлімінің басшысына тапсырма берді. Сонымен қатар, әрбір спортшының өзіне ұнаған маман иесі атануға міндетті екендігін айтқан аудан әкімі қыздардың жоғарғы оқу орнына түсуіне қол ұшын беретіндігін жеткізді.

Сардарбек НҰРАДИН.