Жерлесіміз сөгетілік Аян Байғазы дзюдодан 3-4 наурызда Анталияда өткен 2001-2003 жылғы жасөспірімдер арасындағы Еуропа кубогін жеңіп алды. Бас бапкер Ғайнолла Есенғалиев бастаған ұлдар мен қыздар арасындағы байрақты бәсекеде Қазақстан қоржыны 5 алтын, 2 күміс, 7 қоламен майланып, командалық есепте 2 орыннан көрінді.

Аян Нұра ауылындағы О.Жандосов атындағы орта мектепте 7 сыныпқа дейін білім алған. Қазіргі уақытта Талдықорғандағы облыс-тық дарынды балаларға арналған спорт мектебінде тәрбиеленіп жатыр. Алғашқы жаттықтырушысы Сәтжан Шарғыновтың айтуынша, ол 4 сыныптан бастап спорттың осы түрімен айналысқан. Түрлі додаларда 81 кг. салмақта топ жарған Аян Асхатұлы бірінші айналымдағы қарсыласы Түрік азаматын басымдықпен ұтқан. Екінші айналымда славяндық, үшіншіде канадалықты шаршы алаңда шаң қаптырған. Ақтық сында әзірбайжандықты да тізе бүктіріп, алтынды кеудесіне тақты.

Балуандық оның қанын-да бар қасиет. Себебі, әкесі Асхат Байғазыұлы да осыдан бірер жыл бұрын Еңбекшіқазақ бөрі-сінде жүлделі үшінші орын иеленген еді. – Әкем Байғазы да күрестен алдына жан салмайтын. Міне, бүгін немересі осындай биікті бағындырып отыр. Осы ретте ұлымды қазіргі уақытта жаттықтырып жүрген Рихман Найманбаевқа, сонымен қатар Анталияға баруына демеушілік көрсеткен Алматы облыстық мәслихатының депутаты, жомарт азамат Жангелді Осанға ерекше алғысымды білдіремін. Үнемі сүрінгенге сүйеу болып жүретін жанға Алла нұрын төксін! – дейді Асхат Байғазыұлы.

Қайнар ЖҰМАҒОЖА.

Суретте: (солдан оңға қарай) жеңімпаз жерлесіміз Аян Байғазы, Алматы облысы мәслихатының депутаты Жангелді Осан, Аянның алғашқы жаттықтырушысы Сәтжан Шарғынов және әкесі Асхат Байғазыұлы.