20 наурыз – Қазақстанның халық  жазушысы, Қазақстан Республикасының мемлекеттік және түркі дүниесіндегі  жазушылардың Физули атындағы сыйлықтардың лауреаты, көрнекті ақын,  Қазатком ауылының төл баласы, тума  талант  иесі, ақиық  ақын  Т.Молдағалиев  атамыздың  туған  күні. Биыл  ол  кісі  тірі  болса 87  жылдық  туған  күнін  тойлар  едік. Жерлес ақынымыздың өлеңдері әр тақырыпқа  арналған. Бір өлеңі  ауылына, дос-жаран, туысына арналса, енді бірі  туған  өлке, Отан,  туған  жерге,  кең  байтақ Қазақстанымызға арналады. Бәріміздің сүйікті қаламыз бұрынғы  астанамыз – Алматыға да көптеген жырлары жүрегін жарып шыққан.  Туған ауылы Қазаткомға  арнаған  өлеңдері қаншама!

Құлазыма жаз өткенге,                                 

Шайқалмайды іргелі ел.                               

Тұмаш келсе Қазаткомға,                             

Сен де онымен бірге кел!

Серуенделік бүгін былай,

Сен кешікпей кел тектім. 

Жиылайық бұрынғыдай,                       

Алаңына мектептің, – деп жырлаған  ақын атамыз   жылда көктемнің 20 наурызында мектепке келіп, оқушылардың ән-жырын тыңдап, қатты риза болып қайтушы еді. Өзінің құрдастарының немерелерін көріп, ақ жаулықты жеңгелерінің шапанын киіп, наурыз көжесінен дәм татып, ауыл ақсақалдарымен тілдескен ақын еріксіз көзіне қуаныштың жасын үйіруші еді. Ақын атамыз  келгенде барлық ауыл мектептің   алаңына  жиналатын еді.

Бұрынғыдай атамыз енді келмейтін болды. Алайда 20 наурыз Тұманбай атамыздың туған күні деп, ол кісінің өлең-жырларын оқып, әнін айтып, мектеп оқушылары жылда еске алып жүр. Туған жердің топырағы қашан да ыстық, одан туған Тұманбайдай ақынымыз  қашан да  дара. 

Тоқтасын ТӨЛЕУХАН,

Қазатком негізгі орта мектебінің

қазақ тілі мен әдебиеті пәнінің мұғалімі.