Бойында міні жоқ, періштедейін бір сұлу соңынан әлдебір жігіттің қалмай келе жатқанын байқайды. Бұрылып:

— Артымнан неге келе жатсың? – деп сұрайды. Жігіт:

— О, сүйкімді ару, сенің көз сүріндірер сұлулығың мені жіпсіз байлап, соңыңнан ертіп қойды. Мына халық мен туралы «музыкалық аспаптарда шебер ойнайтын, поэзия өнерін жетік меңгерген сылқым, әрі қыздардың жүрегін жаулаушы нағыз сері» деуші еді. Ал мен басқаға емес, тек саған бар махаббатымды сыйлағым келеді. Өйткені сен менің жүрегімді жаулап алдың! Жүрегім тек сен деп соғады, – дейді.

 Жігітке біраз уақыт үнсіз қарап тұрған сұлу:

— Сен қалай мені сүйіп қалдың? Менің сіңлім менен өткен сұлу, әрі тартымды. Әне, ол сенің соңыңнан келе жатыр, – дейді.

 Лезде тоқтай қалған жігіт артына бұрылып қарағанда жасы жетіп, белі бүкірейген, арқасына ескі жамылғы жапқан кәрі кемпірді көреді. Жігіт сұлу қызға қарай адымдай басып:

— Айтшы, сұлуым, мына сен сияқты періштенің ауызынан өтірік сөз қалай шықты? – деп сұрайды. Оған жымия қараған қыз:

— Досым-ау, маған сезіміңді білдіргенде сен де өтірік сөйледің ғой. «Жүрегім тек сен деп соғады» дей тұрып, басқа қызға басыңды бұрып қарауға қалай дәтің барды? – дейді.

Сезімдеріңізге адал болыңыздар!

Аударған: Құралай Мұратқызы

Шығыс тәмсілі

Дереккөз: pritchi.ru