Әдетте, шашы қалың қыздар кез келген шаш үлгісін қиналмастан жасап жатады. Ал шашы жұқа арулар қандай шаш үлгілерін таңдағаны жөн және оларды қалай жасауға болады? Шашты қалың көрсетудің жолдары қандай?

Жұқа шашты қыздарға шаштың боб үлгісі жақсы жараса кетеді. Оны кекілдің кез келген түрімен де, кекілсіз де кестіруіңізге болады. Кекілсіз, шашты бір жаққа жіберсеңіз, шашыңыздың жұқа екені аса білінбейді.

Шаштың пикси үлгісі де жұқалықты жасырмақ. Бірнеше «қабаттан» тұратын шаштың бұл үлгісі айтарлықтай көлемді көрінеді. Ал оның ұзындығы елдің назарын бетке бұрмақ. Әдетте, иыққа дейінгі ұзындық классика саналады. Пикси үлгісі тік шаштан бастап, толқынды шаштарға да жараса кетеді.

Сатылап кесілген шаштың бірнеше қабатқа жіктелетін пішіні ғана емес, көлемі де қараған көзге үлкен көрінеді. Оған қасыңызға дейін түсетін ұзын кекілді қоссаңыз, қалыңдығы одан сайын арта түспек.

Шаш қию үлгілерімен қатар шашты жинау, яғни сәндеу үлгілері де шаш көлеміне көп әсер етеді. Әдетте, жұқа шашқа көлем беру үшін оны астынан тарақпен әбден «түтеді» (начес). Дегенмен, бұл әдістің шашты тез «құртатынын» есіңізден шығармаңыз. Сондықтан оны жиі жасауға болмайды.  Сонымен қатар шашқа көлем беру үшін шашты бос өріп, қараған көзге қалың қылып көрсетеді. Әр өрімді екі жаққа тартып, босата отырып, оны әлдеқайда көлемді етуге болады.

Стилистер шашыңызды кептіргенде еңкейіп тұрып кептіру де біраз көмек болатынын айтады. Демек, шаш аздап болсын, көтеріліп тұрады. Сондай-ақ бұл эффект ұзаққа жетуі үшін термоқорғаныс спрейін қолдануыңызға болады.

Шаштың арасына арнайы заттарды қоса түю, бос өріп, әдемілеп жинау да шашқа көлем береді.

Табиғи шашыңыз тым жұқа болса, қатты қапаланудың да қажеті жоқ. Шашқа түрлі маска жасап, оны түбінен емдеп, қалыңдатуға да, ұзартуға да болады. Ал оған уақыт болмаса, жасанды жапсырма шаштардың да бар екенін ұмытпаңыз. Оны шаштараз мамандары ешкім біле алмастай, өзіңіздің табиғи шашыңызбен бірдей қылып жапсырып береді.

Шашты толқындатып бұйралау арқылы да оған біршама көлем беруге болады.  Әрине, бұйралай отырып, шаштың ұзындығын қысқартып алатыныңыз анық, десе де бұйра шаш әлдеқайда қалың көрінеді.

Дайындаған Құралай Мұратқызы