Қарта – жылқының тік ішегінің жуан бөлігі. Оны алдымен жыннан тазартып, салқын сумен әбден жуады, содан соң салқын жерге іліп қояды. Ыдысқа салып қойса, бір-біріне жабысып, иістеніп кетеді. 
Қартаны тұздап та, ыстап та сақтауға болады. Тұздап сақтау үшін оған ұсақ тұз сеуіп, 1–2 күн салқын жерге қояды. Содан кейін екі ұшынан жіппен байлап, іліп қойып кептіреді.

Ал ыстап сақтау үшін күні бойы немесе бір тәуліктей уақыт (12–18 сағат) түтінге ұстап ыстайды. Ыстап болған соң 2-3 күн кептіреді. 

Қарта пісірерде салқын суға жақсылап жуады. Қазанға су құйып, қанжылым болғанша қыздырады да үстіне қартаны салады. Сөйтіп, баяу отта пісіреді.

Дастарқанға әкелерде өткір пышақпен дөңгелектеп кесіп, жайпақ ыдысқа салады. Әсемдік үшін үстіне пияз бен аскөк турап қояды.