Тұлғасы білім мен мейірімнен қаланған ұлағат иесі ұстаз болу – асқан жауапкершілік. Себебі, сары ауыз балапандай алдына келген баланың қанатын қатайтып, өмір айдынына бейімдеу – атанға артарлық жүк. Мұны қазіргі карантин жағдайында жақсы біліп отырмыз. Әлбетте, әр істің бір қайыры бар. Осынау ел басына төнген сын сағат бір-біріміздің қадірімізді ұғынуға, еңбегімізді бағалауға мүмкіндік берген сыңайлы. Мектеп – ұстаз – ата-ана... Арасындағы жіпсіз байланыс нәтижесі – тәрбиелі, білімді жас ұрпақ. Осы орайда Б.Майлин атындағы орта мектептің бастауыш сынып мұғалімі Гүлнұр Жұмаханова жайлы әңгіме болмақ.

Әрине, мұғалім көп. Әйткенмен, бала бойындағы қабілетті көре білу, әрбірімен жеке жұмыс жүргізу, тұлғалық қасиетін дамыту екінің бірінің қолынан келмейді. Ақиқатында, біліксіз маман, жауапсыз ата-ана бар, ал жаман оқушы жоқ. Осыны жіті ұғынған Гүлнұр Абдвалиқызы 30 жылға жуық шәкірт тәрбиелеумен айналысуда. Жуырда еңбегі еленіп, аудан әкімінің Құрмет грамотасымен марапатталды. Аудандық «Ұстаздар әулеті» байқауында үздық шығып, облысқа жолдама алды. Әке-шешесі осынау ұлы қызмет жолына ғұмырын арнаған ұстаздар әулетінен шыққан Гүлнұр Абдвалиқызы пайым-парасатымен оқушылары алдында абыройлы.

Бүгінгі жас буын – желкілдеп өскен жас шыбық іспетті. Оны қалай бұрсаң, тамыры солай бекиді. Біздің қуанатымыз – Гүлнұр Жұмаханова секілді білікті ұстаз қолында балапандарымыз тәрбиеленіп жатқандығы. Әрине, осындай ұстаздар саны еселеп өссе деген тілекпен

Б.Майлин атындағы

мектептің 3 «ә» сынып ата-аналары