«Дәрігерде үш қару бар. Олар: сөз, өсімдік, пышақ», − деп ұлы ғұлама, медицинаның атасы Ибн Сина атап кеткен. Ал, бұл айтылғандарды  қолданып, ем іздеп келген жанның дертімен күресе білген

ақ халаттылардың еңбегі орасан екені де рас. Осы салада ұзақ жылдар бойы жемісті еңбек етіп жүрген хирург дәрігер Қожабеков Ерақын Тұрғанбекұлы туралы сөз қозғамақпыз.

Ерақын Қожабеков Нарын-қол ауданы, Текес ауылында мұғалімдер отбасында дүниеге келген. Мектеп қабырғасында алғырлығымен оза шауып, 10 жылдықты үздік бітіреді. 1974-1976 жылдары Мәскеуде 2 жыл әскери борышын өтейді. Және осы уақыттары медициналық институтқа 1 жылдық дайындық курсына түседі. 1985 жылы облыстық аурухананың  интернатурасында болып, осы  жылы Шелек ауруханасында хирург болып қызмет етеді. 1993 жылы бөлім меңгерушісі болып тағайындалады.

Ғұмырының басым бөлігін адам өмірін арашалаумен өткізген Ерақын Тұрғанбекұлы қазір зейнетте. Десе те, зейнет жасына шыққаннан кейін тағы 3 жыл мерзімге келісімшартқа қол қойыпты. Білігі мен мол тәжірибесі ұжым үшін ғана емес, халық үшін де құнды болса керек.

Кейіпкеріміздің жанұясы дәрігерлерден құралған. Жұбайы Гүлмира Сеңгербекова да дәрігерлік қызмет атқарып, бүгінде зейнетке шыққан. 1 ұл, 1 қыз тәрбиелеп өсірген. Ұлы инженер, құрылысшы болса, қызы әке жолын қуған. Айгүл Ерақынқызы – сәулелі диагностика маманы. «Қызымның таңдауына тікелей ықпал етіп, араласқан емеспін. Өзі осы медицина саласын қалады. Дегенмен, анасы да дәрігер болған соң,«Алма ағашынан алыс түспейді» дегеннің жөні келді ме екен деймін», – деді Е.Қожабеков.

Ерақын Тұрғанбекұлы жылына 300-350-дей ота жасайды. Әрине, әрбірінің өз тарихы, қиындығы мен ерекшеліктері бар. «Күрделі оталар ойдағыдай аяқталған сәт – мені ерекше арқаландырып, күш-қуатымды еселей түседі. Мұның себебі кезінде мамандығымды жүрек қалауымен таңдағанымнан болар деп түйемін», – деп сөзін жеткізді хирург. Рас, хирургия – күрделі сала. Әрбір ота өмір мен өлімнің бітіспес арпалысымен өтеді. Хирургтің қолы мен қандауыры (скальпель) сәл ғана қателессе, бір адамның өмірі сол сәтте үзіліп түсуі мүмкін. Жаңылмай тапқан кәсібі бар Ерақын, машығы мол Ерақыны бар ел бақытты десек болады. Білікті хирургтің еңбегі де еленіп келеді. Қазақстан Республикасы халқының денсаулығын сақтау ісіне сіңірген айрықша еңбегі үшін «ҚР денсаулық сақтау ісінің үздігі» төсбелгісімен марапатталған. 2019 жылы ҚР денсаулық сақтау министрінің Құрмет Грамотасын алған. Сонымен қатар, Еңбекшіқазақ ауданының құрметті азаматы.

Осынша жетістіктері бола тұра, «қызметім – міндетім» деп қана, қарапайымдылықтың туын жықпай келеді Ерақын аға. Әрине, адами болмысын және қызметтегі жолын жастарға үлгі етуге тұрарлық.

– Бұл мамандыққа келерде жауапкершілікті алдыңғы орынға қою керек. Селқос таңдау – сапасыз жұмыс нәтижесіне алып келеді. Шалыс басуың – біреуді анасыз, бірін бауырсыз, бірін доссыз қалдыруың мүмкін. Түптеп келгенде, бір емес, бірнеше адамның тағдыры талқан болады. Сондықтан адам өмірімен, денсаулығымен байланысты салаға саналы түрде келуге шақырамын, −  дейді Ерақын Қожабеков.

Ілия СҰЛТАН