Мерекенің ең үлкені – еліміздің Тәуелсіздігін алған күні. Ата-бабаның қанымен, аналардың зарымен жеткен ұлы күннің қадір-қасиеті әркез биік. Осынау басты мейрамға орай аудан әкімдігінде салтанатты жиын өтті.

Тәуелсіздік тарихына аз-кем тоқталып, кешегі мен бүгінгі күннің бет-бейнесі жайында сөз қозғаған аудан әкімі Қуанышбек Қашқымбаев: «Тәуелсіздікті мәңгі сақтап тұру біздің әрқайсымызға тікелей байланысты, әрі баршамызға артылған ең үлкен міндет», – дей келе «Тәуелсіздік тұғыры биіктей берсін» деп, ұлы мейраммен құттықтады. Расымен, елдің тұтастығы мен береке-бірлігіміз, бүгінгі қадамдарымыз бен болашақ асуларымыз – осынау «тәуелсіздік» деген ұғымды біріктіретін маңызды факторлар.

Жиын барысында әкім ел мен жер үшін тер төгіп, туған өлкенің өсіп-өнуіне еңбегін сіңіріп жүрген азаматтарды марапаттады. ҚР Президентінің «Халық алғысы» мерекелік медалі жеке кәсіпкер А.Еңсебалиеваға табысталды. Сондай-ақ Ә.Жұмағалиев, С.Жұмалиев, С.Төреқұлов «Еңбекшіқазақ ауданының Құрметті азаматы» атанды. Бұдан бөлек Тәуелсіздік күніне орай арнайы мерекелік «Құрмет грамотасымен» мемлекеттік қызметкерлер мен жеке кәсіпкерлер марапатталды. Жиын шағын концерттік бағдарламаға ұласты.

Бүгінгі жеткен жетістіктеріміз бен алға қойған үлкен мақсаттарымыздың барлығы да егемендіктің арқасы. Сондықтан да осынау мерейлі мерекенің қарсаңында ел игілігіне берілетін жаңа нысандардың да салтанатты ашылуы өтті. Көктөбе мен Қорам ауылдарының халқы жаңа салынған дәрігерлік амбулатория құрылысына риза екендерін жеткізді.

Бұл Тәуелсіздік күніне арналған біздің ауданда өтіп жатқан шаралар болса, облыс орталығында – Талдықорған қаласындағы салтанатты жиында да жерлестеріміз марапатталып, ауданымыздың мерейін асырды. Алматы облысының әкімі Амандық Баталов «Nur Otan» партиясы Еңбекшіқазақ аудандық филиалы төрағасының орынбасары Қуат Байғоджаевқа Қазақстан Республикасы Президентінің «Құрмет грамотасын» табыстады. Ал еңбек ардагері Елеусіз Сұлтанғазиев «Алматы облысының Құрметті азаматы» атанса, жеке кәсіпкер Шолпан Қасымбекова «Шапағат» меделімен марапатталды.

Кезінде Әбіш Кекілбаевтың айтқан «Бодандық ұлтты қалай сынаса, бостандық одан қатты сынайды» деген сөзі еске түседі. Осынау сөздің астарын ұғынып, елдігіміздің мәңгілік болуына баршамыздың жауапты екенімізді есте ұстайық.

Құралай МҰРАТҚЫЗЫ