Өңір жұртшылығына хаттар мен сәлемдемелерді жеткізіп, түрлі деңгейдегі баспа басылымдарын өз оқырмадарымен қауыштырып,  көптеген төлемдерді жасауға зор мүмкіндік беріп отырған аудандық пошта байланыс торабының қоғам өмірінде алатын орны ерекше. Жақында аталған ұйымның Есік қаласындағы филиалында ұтыс ұйымдастырылып, тұтынушыларға сыйлықтар үлестірілді.

Бүгінде  «Қазпошта» акционерлік қоғамының сан салалы қызмет өтеу түрі күн сайын кемелденіп келеді. Жақынғы жылдардан бері «Қазпошта» акционерлік қоғамы өз тұтынушыларына басқа  банктермен селбестік негізіндегі тиімді несие беруді қолға алған. Осы қызмет түріне  тыңнан серпін беру үшін жақында аудандық пошта торабында «Банк Хоум Кредит» банкінен  несие алғандарға ұтыс ойынын ұйымдастырды. Ұтыс ойынына қатысқандардың арасынан Қазақстан ауылдық округінің тұрғыны Алтын Тұңғышбаеваның айы оңынан туып, теледидар олжалады. Кеудесін қуаныш кернеген зейнеткер әжей қиырдағы елді мекендерге де қызмет етіп келе жатқан пошта торабына  алғыс  айтып, ағынан жарылды. Шара барысында ұтыс ойынына қатысқандарға  түрлі сыйықтар  тарту етілді. Бұл ретте,  аудандық пошта торабының басшысы Диас Қосыбаев: «Біз қызметімізге жүгінген тұтынушыларымызды ынталандыру үшін алғаш осы ұтыс ойынын жасадық. Алда әр ай сайын ұйымдастыруды жоспарлап отырмыз.  Әр жолы ұтысқа қатысқандар түрлі тұрмыстық техникаларды тегін алу мүмкіндігіне ие болады»,  – дейді.

 Ерзат  АСЫЛ.