Алматы облысына Елордадан коронавирустық инфекцияға қарсы "Спутник V" 2-компонентінің 1 450 дозасы жеткізілді және бүгінгі күні вакцинациялау басталды. Бұл туралы «Jetisy Media» ақпараттық алаңында хабарлады.
Жетісу өңірінде 22 ақпаннан бастап екпе егудің екінші кезеңі басталды. Бүгінгі күнге дейін "Спутник V" вакцинасы 2 күн ішінде 124 адамға салынды.
Еске сала кетсек, ақпан айының басында"Медсервис Плюс "КФК" ЖШС Облыстық қан орталығының сақтау қоймасына Нұр-сұлтан қаласынан коронавирустық инфекцияға қарсы "Спутник V" 1-компонентінің 1 450 дозасы жеткізілген.
«Шалғай елді мекендерде вакцинация жүргізу қажет болған жағдайда 12 жылжымалы бригаданы іске қосу жоспарлануда. Жалпы сыйымдылығы 253 литр болатын 11 термоконтейнер дайындалды. 29 егу пунктінде екпе салдырған адамдарды бақылау үшін жеке ғимарат қарастырылған. Вакцинациялауға жататын медицина қызметкерлерінің саны – 11 192», – деді облыстың бас дәрігері Өмірзақ Ниязбеков.
24 ақпандағы мәліметке сәйкес, облыста КВИ зертханалық расталған 10 550 жағдай тіркелген, оның ішінде 4 342-інің симптомдары бар. Өңірлеріндегі эпидемиологиялық жағдайды бағалау матрицасына сәйкес Алматы облысы «жасыл» аймақта орналасқан.
«Елімізде вакцинация жоспарланған кесте бойынша жүргізілуде, бүгінгі күні барлық өңірлерде "Спутник V" вакцинасының екінші дозасы қолжетімді, оны өндіру Қарағанды фармацевтикалық зауытының базасында жолға қойылған», – деп атап өтті Алматы облыстық санитарлық-эпидемиологиялық бақылау департаменті басшысының орынбасары Асхат Чарапиев.
Меруерт АҚБАРОВА
