Өткен аптада өңірімізге Алматы облысының әкімі Амандық Баталов келіп, аудан әкімін тағайындады. Сонымен қатар жүзеге асып жатқан ірі жоба – Есік топтық су құбырының құрылысымен танысып, күрделі жөндеуден өткен Әймен орта мектебіне барды.
Әкімдікте өткен мәслихаттың кезектен тыс сессиясында депутаттардың қолдауымен Әлібек Жақанбаев аудан әкімі қызметіне тағайындалған болатын.
Жиын барысында Амандық Ғаббасұлы облыс бойынша атқарылып жатқан жұмыстарға тоқталып өтті. Жол жөндеу, ауызсу мәселесін шешу, әлеуметтік нысандар салу, көгілдір отын тарту, инженерлік-коммуникациялық желілер жүргізу бойынша ауқымды жұмыстар қолға алынуда. Бүгінгі таңда облыс бюджеті 750 млрд теңгені құрап отыр. Осыдан бес-алты жыл бұрын бұл көрсеткіш екі есе аз болған.
Сондай-ақ Амандық Ғаббасұлы ауыл шаруашылығы, кәсіпкерлік, туризм саласы бойынша киелі мекеннің әлеуеті зор екенін айтып, аудан басшысына жетекші салаларды дамытып, инвесторларды тартуға күш салу керектігін айтты.
Ауданымызға жасаған сапары барысында облыс басшысы Есік қаласының жоғарғы жағында құрылысы жүріп жатқан Есік топтық су құбырының жұмыс барысымен танысты. Құны 4 млрд 478 мың теңге болатын ауқымды жоба «Жұмыспен қамтудың жол картасы» бағдарламасы аясында жүзеге асуда. Былтыр басталған құрылыс алаңында бүгінде 68 адам жұмыс істейді. Мердігер «Сапа Құрылыс-2007» жауапкершілігі шектеулі серіктестігі ұзындығы 40 шақырымнан асатын ауызсу құбырын жүргізу жұмыстарын 2022 жылдың мамыр айында аяқтауды жоспарлап отыр. Есік қаласы мен жақын орналасқан Бөлек, Әймен, Қызылжар, Қарасай, Қайназар, Көктөбе, Рахат және Өрікті ауылдарында тұратын 100 мыңнан астам тұрғынды сапалы тіршілік нәрімен қамтамасыз ететін жобамен танысқан Амандық Ғаббасұлы оған оң бағасын берді.
Әймен ауылындағы орта мектептің ғимараты 1991 жылы салынған. 420 балаға арналған оқу ордасының тозығы жетіп, сапасы сын көтермей тұрған. Былтыр «Жұмыспен қамтудың жол картасы» бағдарламасы аясында 437 млн теңгеден астам қаржы бөлініп, күрделі жөндеу жұмыстары жүргізілген. «Энерго Холдинг LTD» ЖШС құрылысты уақытында аяқтап, бүгінде 390 оқушы білім алуда. Оқу орнына арнайы барған облыс әкіміне ұстаздар қауымы мектепті жаңғыртуға қолдау көрсеткені үшін ризашылығын білдірді.
Сардарбек НҰРАДИН
