Құрметті аудан тұрғындары мен қонақтары!

Сіздерді Ұлыстың ұлы күні – Наурыз мейрамымен шын жүректен құттықтаймын!

Наурыз – жыл басы. Табиғат ананың түрленіп, ерекше кейіпке еніп, жасарып жаңаратын, халықтың алдағы күндерге үмітпен қарайтын ұлық мейрамы. Жер-анаға бар мейрімін төккен мерекені, тәуелсіз еліміздің көк туының астында, халқымызбен бірге ыстық ықыласпен қарсы алып отырмыз.

Түркі халықтары үшін қасиетті саналатын бұл мерекеде көпшілік бір-біріне ізгі тілектерін арнауды дәстүрге айналдырған. Қазақ халқы Наурызды «Ұлыстың ұлы күні» деп, күн мен түннің теңеліп, жан-жануардың төлдеп, адамдардың аузы аққа тиетін, жер әлем жасарып, қуаныш орнайтын күн деп ерекше баға берген. Ежелден келе жатқан дәстүр бойынша, бұл күні адамдардың бір-біріне деген реніші кешіріліп, достық пен келісім орнаған.

Халқымыз үшін ұлық мерекені ерекше мерекелеу дәстүрі қалыптасты. Әр күні дербес атауға ие болып, сол күндер аясында тәрбиелік мәні бар түрлі іс шаралар ұйымдастырылып, жалпы халықтық мерекенің мазмұны жылдан жылға ерекшеленуде.

Бұл мереке қарсаңында ұлтымыздың нақышын, салт-дәстүріміздің айқын қолтаңбасын көреміз әрі мақтан тұтамыз. Әрбіріміз жақсылықтан үміт етіп, жыл басын зор құрметпен қарсы аламыз.

Алайда, елімізде орын алып отырған пандемияға байланысты жылдағыдай орталық алаңдарға жиналып наурыз мейрамы тойланбайды. Сіздерден Алматы облысының Бас санитар-дәрігерінің қаулысының негізінде аудан аумағында карантин режимін сақтауды сұраймын.

Құрметті ағайын!

Ұлыстың ұлы күні елімізге құт-береке әкелсін. Отбасымыздың абыройы арта берсін! Халқымызға ынтымақ, елімізге молшылық, әр шаңыраққа бақыт пен шаттық тілеймін!

Ізгі тілекпен,

Еңбекшіқазақ ауданының әкімі 

Әлібек Жақанбаев