Коронавирусқа қарсы іс-қимыл жөніндегі кеңесте Президент Қ.Тоқаев вакцинация басталғалы екі айдың ішінде халықтың 0,1%-ынан азы екпе салдырғанын айтып, денсаулық сақтау министріне ескерту жасаған-ды. Содан бері екі апта өтті. Вакцинациялау да жер-жерде жедел қарқын алды.

Алғашында ауданымызда Есік пен Шелектегі аудандық ауруханаларда екпе кабинеттері ашылса, бүгінде алғашқы медициналық-санитарлық көмек көрсету орталықтарында, аудан аумағындағы кейбір дәрігерлік амбулаторияларда да арнайы екпе кабинеттері жасақталды. Сондай-ақ жылжымалы екпе бригадалары құрылды. Мұндай бригаданың бірі бүгін ауданымыздағы үлкен өндіріс орындары «Adal» және «FoodMaster» компанияларына барып, қызметкерлеріне коронавирусқа қарсы вакцина салды.

Еңбекшіқазақ аудандық санитарлық-эпидемиологиялық бақылау басқарма басшысының орынбасары Д.Бақбергенұлы: «Бұл жылжымалы екпе бригадалары халыққа вакцинациялаудың қолжетімділігін арттыру және екпе алу процесін жеңілдету үшін ұйымдастырылып отыр. Адам көп шоғырланған жерлерде коронавирусты жұқтыру қаупі де жоғарылай түседі. Сондықтан қоғамдық иммунитетті қалыптастыруда үлкен кәсіпорындардың қызметкерлерін вакцинациялаудың маңызы зор. Осы орайда жылжымалы екпе бригадасына артылған жүк те салмақты», – дейді.

Еңбекшіқазақ аудандық санитарлық-эпидемиологиялық бақылау басқармасының мәліметіне сүйенсек, бүгінде «Спутник-V» вакцинасының 1-компонентін ауданда 7265 адам алған. Ал вакцинаның екі компонентін толық алған азаматтар саны – 1196 екен. 

Құралай МҰРАТҚЫЗЫ