Алматы облысына жұмыс сапарымен келген ҚР Денсаулық сақтау министрі А.Цой КВИ-ға қарсы вакциналаудың барысымен танысты. Алдымен саяжайдағы «Болашақ» отбасылық денсаулық орталығына барды.
Орталық саяжайда тұратын 16 мыңнан аса халықтың медициналық қызметке қолжетімділігін арттыру үшін биыл 1 сәуірде ашылған еді. Әрі осы жерде бүгінде коронавирусқа қарсы екпе салу кабинеттері ұйымдастырылып, қажетті құралдармен толық жабдықталған. Министр орталықтағы вакциналау жұмыстарының барысымен танысып, вакцинаны сақтаудағы барлық талаптың ескерілгеніне көз жеткізді. Сондай-ақ медициналық құжаттаманың дұрыстығын тексеріп, пациенттерге медициналық көмек көрсету алгоритмі туралы ойымен бөлісті. Екпе салдырған тұрғындармен пікірлесіп, олардың хал-жағдайын сұрады.
Одан кейін министр Еңбекшіқазақ көпсалалы ауданаралық ауруханасында барды. Аурухананың бас дәрігері Жәмилә Әбеуова медициналық мекеме жайлы жан-жақты баяндап берді. Мұнда амбулаториялық-емханалық, дәрігерге дейінгі, дәрігерлік, білікті, шұғыл медициналық және мамандандырылған көмек көрсетеді, клиникалық-зертханалық диагностика жүргізіледі. Ауруханада бір ауысымына 500 келушіге арналған емхана жұмыс істейді және 455 төсектік стационар бар.
Коронавирусқа қатысты аудандағы ахуалға тоқталған Жәмилә Әбеуовадан қажетті дәрі-дәрмек қорының бар-жоғын сұраған министр қоймаға арнайы барып, өзі тексеріп көрді. Ауруханадағы коронавирусқа қарсы екпе орталығының жұмысына оң бағасын берді.
Жалпы, ауданда екпе орталықтарынан бөлек, жылжымалы екпе бригадалары да ұйымдастырылған.
Құралай МҰРАТҚЫЗЫ
