Алматы облысындағы көзтартар мекендердің бірі-айдынды Алакөл. Бүгінде бұл маңда 264 демалыс орны 23 336 демалушыға қызмет көрсетуде. Ауданда туризм қарыштап қарқын алуда. Оның басты себебі де, өңір басшысы Амандық Баталовтың жіті бақылауына алғандығында.

Облыс әкімінің тапсырмасы аясында Алакөл ауданынынң әлеуметтік-экономикалық дамуы турасында өткен баспасөз-мәслихатында, аймақтың әлеуетін жақсартуға үлес қосып отырған бірегей саланың аяқ алысы жайында, алқалы жұрттың алдында аудан әкімі Алмас Абдинов айтып берді.

Осыдан екі жыл бұрын Алакөлдің әсемдігін көрмекке келген бұқараның жалпы саны 1,5 млнға жеткен болатын. Өткен жылы ел аумағындағы пандемиялық ахуалға байланысты 798 мың турист айдынды мекенде демалды. Ал үстіміздегі жылы 1 млн. турист келіп, құны 5 млрд. 270 млн.теңгенің сауықтыру қызметі көрсетіледі деп жоспарланып отыр.

Биылғы жылы аталмыш сала да басымдылық беріліп отырған бағыт –экотуризм. Алакөл жерінде де қарқынды жұмыстар жүзеге асуда. Соның бір дәлелі Лепсі ауылдық округінде 25 орынға лайықталған демалыс аймағының қызмет көрсетуі. Негізгі нысанаға ілінген туристік саладан түсер түсімді арттыру үшін Алакөлде «Жоңғар Алатауы «мемлекеттік ұлттық табиғи паркінде» 6 маршрут әзірленіп, туристерді қабылдауға сақадай сай тұр.
Сонымен қатар, аудан әкімі Алмас Абдиновтың айтуынша, биылғы жылы кәсіпкерлер есебінен 1310 орынды 10 нысанды қолданысқа беріп, аудан экономикасына 3,6 млрд.теңгенің инвестициясы тарту көзделген.
Туристерге қолайлы жағдай жасау мақсатында демалыс аймағын орталықтандырылған ауыз су, кәріз жүйелері мен жол құрылыстары салынуда, жыл аяғына дейін қолданысқа берілмек.

«Тәулігіне 6,5 мың текше метр канализациялық тазарту нысанының құрылысына ағымдағы жылы 3,5 млрд.теңге қарастырылып жұмыстар жоспар бойынша атқарылып, 2022 жылы пайдалануға беріледі. Және де Алакөл көл жағалауының 13,5 шақырымына бекіту жұмыстары жүргізілуде»,-деді аудан әкімі Алмас Абдинов.

Алматы облысының солтүстік-шығыс бөлігінде орналасқан мекенге келушілер ел аумағының түкпір-түкпірінен, сондай-ақ алыс-жақын шет елдерден де келіп жатады. Қиыр шеттен ат арылтып келемін деуші туристер үшін әуежайдың жұмыс істеп тұрғанын еске саламыз. Дәл осы әуе кемесі тұрақтайтын Үшарал әуежайынның жалпы құны 7,5 млрд.теңгені құрайтын ұшып-қону алаңын және азаматтық навигациялық жүйелерін қайта жаңғырту жұмыстары басталатындығын ерекше атап өткен жөн. Нәтижесінде әуе рейістерінің саны артып, керім сұлулықты көруге келушілер саны да көбейе түспек. Туризмді дамыту – әлемдік бәсекелестік кеңістігіне кірудің үлкен мүмкіндігі екенін естен шығармаған абзал.