Бүгін «1 қыркүйек – білім күні» мерекесінде ҚР Парламенті Палаталарының бірлескен отырысында Мемлекет басшысы Қасым-Жомарт Тоқаев Қазақстан халқына арналған Жолдауын жариялады. Жолдау еліміздің алдағы әлеуметтік-экономикалық даму бағыттарын айқындайды.
Осы саяси құжатта Қасым-Жомарт Кемелұлы алдағы мақсатқа жетудің дұрыс жолын бірлесе айқындауымызға бағытталған, әлемдік қиындықтарды болжап қана қоймай, ықтимал өзгерістерден де мемлекет үшін тиімді мүмкіндіктерді қарастырған міндеттерді белгілеп бергендігін баршаңыз жақсы білесіздер.
Сол себепті де мен Жолдауда аталған бірнеше маңызды мән-жайларға жеке-жеке тоқтала отырып, осы бағыттар бойынша Сіздерге қысқаша таныстырып, бөлісуді жөн санап отырмын.
Жолдауда Қасым-Жомарт Кемелұлы «Бизнестің жол картасы» мен «Қарапайым заттар экономикасы» бағдарламаларының мерзімін 2022 жылға дейін созу туралы шешім қабылдады. Бұл мақсатқа бөлінетін қаржының көлемі кемінде 1 трлн теңге болады.
Сондай-ақ Жолдауда ең төменгі еңбекақы көлемін қайта қарау мәселесіне сөз болды. Бұл, бір жағынан, маңызды макроиндикатор деп есептеймін. Президент ең төменгі еңбекақы көлемі 2018 жылдан бері көтерілмегендігіне тоқтала отырып, әлемдегі коронадағдарыс халықтың табысына айтарлықтай зардабын енгізгендігін атап өтті. Расында да қазіргі таңда қарапайым қызметкерлердің жалақысы тым төмен. Бұл мәселені аудандық мәслихат депутаттары бірнеше рет көтеріп, тиісті сауалдар жолдаған болатын. Ал Мемлекет басшысының бұл бастамасы осы аталған жағдайды оңынан шешуге бірден бір негіз.
Сонымен қатар мәдениет қызметкерлері, қорықшылар, кітапханашылар, көлік жүргізушілердің жалақысын 2022-2025 жылдар аралығында 20 пайызға арттыру тапсырылды.
Бұдан бөлек Мемлекет басшысының Жолдауда айтқан тапсырмасына сәйкес азаматтарға тұрғын үй алу қолжетімді болу үшін «Бірыңғай тұрғын үй» бағдарламасы іске қосылатын болады. Бұл, әсіресе, жас отбасыларға баспаналы болуға септігін тигізеді деп сенемін.
Жолдаудағы әр міндет – еліміздің еңселі болашағына нық бағыт беруде. Сондықтан да «Үдере көшкен уығын сындырады, жұмыла жұмыс істеген – жұмысын тындырады» демекші, саяси құжаттың ұтымды идеялары аясына бірігіп, алдымызға қойған тарихи міндеттерді жұмыла жүзеге асыруға шақырамын.
Б.Ахметов,
Еңбекшіқазақ аудандық мәслихатының хатшысы
